Ĩvuku ya Kelĩ ya Asumbĩ
3 Yeolamu mwana wa Aavu ambĩĩie kũsumbĩka Isilaeli e Samalia mwakanĩ wa 18 wa Mũsumbĩ Yeosavati wa Yuta, na asumbĩkie myaka 12. 2 Nĩwaendeeie kwĩka kĩla kĩthũku methonĩ ma Yeova, ĩndĩ ti mũno ta ĩthe wake kana inyia wake, nũndũ nĩwavetangie kĩtuĩ kya ũthaithi kya Mbaali kĩla ĩthe wake waseũvĩtye. 3 Ĩndĩ nĩwalũmanilye na naĩ ila Yelovoamu mwana wa Nevati watumĩte Aisilaeli meka. Ndaaĩvathana nasyo.
4 Yu ĩndĩ, Mesa mũsumbĩ wa Moavi nĩwaĩthasya malondu, na nĩwanengae mũsumbĩ wa Isilaeli koti wa tũtena twa malondu 100,000 na ndũũme 100,000 ite ndile wʼĩa. 5 Ĩndĩ yĩla Aavu wakwie oou, mũsumbĩ wa Moavi nĩwangʼendeie mũsumbĩ wa Isilaeli. 6 Na kwoou Mũsumbĩ Yeolamu auma Samalia mũthenya ũsu na oombanyʼa Isilaeli yonthe kwondũ wa kaũ. 7 O na ĩngĩ, nĩwatũmanie vala ve Mũsumbĩ Yeosavati wa Yuta, ayasya: “Mũsumbĩ wa Moavi nũngʼendeie. No ũendanyʼe nakwa tũkokite na Moavi?” Nake amũsũngĩa amwĩa: “Nĩngũka. Nyie ndi kĩvathũkanyʼo naku. Andũ makwa no ta andũ maku. Na mbalasi syakwa no ta mbalasi syaku.” 8 Na ĩndĩ amũkũlya: “Twĩambata twĩsĩle va?” Nake amũsũngĩa: “Twĩĩsĩla weũnĩ wa Etomu.”
9 Na kwoou mũsumbĩ wa Isilaeli aendanyʼa na mũsumbĩ wa Yuta na mũsumbĩ wa Etomu. Na ĩtina wa kũthyũlũlũka mĩthenya mũonza, mathelelwa nĩ kĩwʼu kya kũtũmĩwa nĩ ala maĩ kambinĩ na indo ila maĩ nasyo. 10 Na mũsumbĩ wa Isilaeli asya: “Mwa ũũ nĩ thĩna! Yu Yeova aete asumbĩ aa atatũ vamwe, ayenda o kũmanengane kwʼokonĩ kwa Moavi!” 11 Na ĩndĩ Yeosavati akũlya: “Vaa vai mwathani wa Yeova tũtonya ũmũkũlya ũtao wa Yeova?” Na ũmwe wa athũkũmi ma mũsumbĩ wa Isilaeli asũngĩa: “Twĩ na Elisa mwana wa Savati, ũla wetĩkĩĩasya moko ma Eliya kĩw’ũ.”* 12 Na ĩndĩ Yeosavati asya: “Ndeto ya Yeova yĩ vamwe nake.” Na kwoou mũsumbĩ wa Isilaeli na Yeosavati na mũsumbĩ wa Etomu matheea vala ũĩ.
13 Na Elisa eea mũsumbĩ wa Isilaeli atĩĩ: “Nyie nĩ na ũndũ mwaũ naku?* Thi kũla kwĩ athani ma ĩthe waku na athani ma inyia waku.” Ĩndĩ mũsumbĩ wa Isilaeli amwĩa: “Aiee, nĩkwĩthĩwa Yeova nĩwe wũmbanĩtye asumbĩ aa atatũ nĩ kana amanengane kwʼokonĩ kwa Moavi.” 14 Na Elisa eewʼa ũu amwĩa: “Vate nzika, o tondũ Yeova wa nguthu ũla nthũkũmaa* wĩ thayũ, ta kethĩwa ndinengete Mũsumbĩ Yeosavati wa Yuta ndaĩa, ndiũsisya kana kũũsũanĩa. 15 Yu ĩndĩ, ndeteei mũkũni wa wathi.”* Na yĩla mũkũni ũsu wa wathi wambĩĩie kũinga mũio wake wa wathi oou, kwʼoko kwa Yeova kwooka ĩũlũ wa Elisa. 16 Na asya, “Ũũ nĩwʼo Yeova ũkwasya: ‘Ĩnzai mĩtaũ kĩla vandũ mwandanĩ ũũ,* 17 nĩkwĩthĩwa ũũ nĩwʼo Yeova ũkwasya: “Mũiona kĩseve, na mũiona mbua; ĩndĩ mwanda ũũ nũkusũa* kĩwʼũ na mũikĩnywʼa, inywʼĩ, indo syenyu, na nyamũ ila ingĩ mwĩ nasyo.”’ 18 Ĩndĩ ũsu no ũndũ mũnini methonĩ ma Yeova, nĩkwĩthĩwa nũkũnengane Moavi o nayo mokonĩ menyu. 19 No nginya mwanange ndũa syonthe mbiĩĩe na ndũa syonthe sya vata, na nĩmwaĩlĩte kũtemanga mĩtĩ yonthe mĩseo, na mũilinda nthongo* syonthe sya kĩwʼũ, na mũyĩkya mavia isionĩ syonthe nzeo sya nthĩ nĩ kana mũsyanange.”
20 Na yĩla kwakyee, ĩvinda ya nthembo ya lĩu ya kwakya, kĩwʼũ nĩkyookie na mĩtũkĩ kyumĩte ngalĩko ya Etomu, na nthĩ yausũa kĩwʼũ.
21 Na Amoavi onthe meewʼa kana asumbĩ asu nĩmookĩte mamokite, moombanyʼa aũme onthe ala maĩ matonya kũkua mĩio ya kaũ,* na mathi kũmovya mũvakanĩ. 22 Na yĩla mookĩlile kwakya tene, sua nĩyaathĩte kĩwʼũnĩ kĩu, na Amoavi me ngalĩko ĩla ĩngĩ masisya kĩwʼũ kĩu moonie kĩ kĩtune ta nthakame. 23 Na masya: “Ĩĩ nĩ nthakame! Vate ndĩi asumbĩ asu nĩmoaana na ũvyũ. Kwoou yu ĩndĩ, we Moavi, enda wĩyosee mũtavo!” 24 Na yĩla Amoavi malikile kambinĩ ya Isilaeli, Aisilaeli nĩmookĩlile na mambĩĩa kũmakũna, namo masemba mamakĩĩte. Na Aisilaeli malika Moavi, na maendeea kũkũna Amoavi ala meethĩana namo. 25 Na maomboanga ndũa syoo, na kĩla mũndũ ekya ĩvia isionĩ syonthe nzeo sya nthĩ ĩsu nginya masyusũsya mavia; o na nĩmalindile nthongo* syonthe sya kĩwʼũ, na matemanga mĩtĩ yonthe mĩseo. Mũthya, no ngũta sya mavia sya ndũa ya Kili-alesethi syatiiwe iũngye, na ala mekasya mavia na ikũtha mathyũlũlũka ndũa ĩsu na mamyananga.
26 Na yĩla mũsumbĩ wa Moavi woonie kana nĩwaemwa nĩ kaũ, nĩwoosie aũme 700 makwete mbyũ nĩ kana mokite mamanthĩte ũndũ meũvĩta nginya ngalĩko ĩla yĩ mũsumbĩ wa Etomu; ĩndĩ maemwa. 27 Na kwoou oosa mwana wake ũla mũkũũ, ũla waaĩlĩte kũsumbĩka vandũ vake, na amũvĩvĩsya ũkũtanĩ ethĩwe nthembo ya kũvĩvwʼa. Na Isilaeli mathatĩwa mũno, na kwoou maeka kũmũkita na masyoka nthĩ yoo.