Kwosana na Maliko
8 Mĩthenyanĩ ĩsu, ĩkomano ĩnene ya andũ nĩyoombanie ĩngĩ, na mayaĩ na kĩndũ maya. Kwoou eeta amanyĩwʼa make, na amea: 2 “Nĩngũmewʼĩa tei andũ aa nũndũ yu mekalĩte nakwa mĩthenya ĩtatũ na mai na kĩndũ maya. 3 Na namombũũkya menũke mayĩwʼa nzaa, * nĩmeũvalũka nzĩanĩ, na amwe moo maumĩte kũasa mũno.” 4 Ĩndĩ amanyĩwʼa make mamũkũlya: “Mũndũ atonya kumya va mĩkate ĩanĩtye kũvũnyʼa andũ aa onthe, na vandũ vaa vaitwĩe andũ?” 5 Nake amakũlya: “Mwĩ na mĩkate yĩana ata?” Namo mamwĩa: “Mũonza.” 6 Nake ayĩa ĩkomano yĩkale nthĩ. Na ĩndĩ oosa ĩla mĩkate mũonza, atũnga mũvea, amĩtilanga, na ambĩĩa kũmanenga amanyĩwʼa make, namo maaĩa ĩkomano. 7 O na maĩ na tũkũyũ tũte twingĩ, natwʼo atũathima na amea maaĩe ĩkomano. 8 Kwoou maya na mavũna, na moosanyʼa tũlungu tũla twatialĩte mausũsya ikavũ mũonza nene. * 9 Vaĩ aũme ta 4,000. Na ĩndĩ amombũũkya.
10 Na vau kwa vau alika ĩsiwanĩ * vamwe na amanyĩwa make na mathi kĩsionĩ kya Ndalimanutha. 11 Na Avalisi mooka kũu na mambĩĩa kũneenanyʼa nake, maimwĩa meenda amonyʼe kyama kuma ĩtunĩ, nĩ kana mamũtate. 12 Kwoou avevũũka mũno vevanĩ wake na asya: “Nĩkĩ nzyawa ĩno ĩkwenda kwonwʼa kyama? Nĩ wʼo nĩngũmwĩa, vaiĩ kyama kĩkonwʼa nzyawa ĩno.” 13 Amina kũneena ũu amatia, alika ĩsiwanĩ ĩngĩ, na ainga mũingo ũla ũngĩ wa ũkanga.
14 Ĩndĩ moolwa nĩ kũkua mĩkate, na mayaĩ na kĩndũ ĩsiwanĩ ate o mũkate ũmwe. 15 Na amakanyʼa ateũmavitha kĩndũ, akĩmea: “Ĩkalai mwĩ metho; ĩsũvĩanei na ĩlawa ya Avalisi na ĩlawa ya Elote.” 16 Kwoou mambĩĩa kũkũlanyʼa ene kwa ene nĩkĩ matanakua mĩkate. 17 Amanya ũu, amea: “Nĩkĩ mũũkũlanyʼa ĩũlũ wa kwĩthĩwa mũte na mĩkate? O na yu mũiũmanya kana kũelewa? O na yu mũi na ũmanyi ngoonĩ syenyu? 18 ‘O na kau mwĩ na metho, nũndũ mũteona; o na kau mwĩ na matũ, nũndũ mũteĩwʼa?’ No mũũlilikana 19 yĩla natilangile ĩla mĩkate ĩtano kwondũ wa aũme 5,000, mwoosanisye tũlungu mwausũsya ikavũ siana ata?” Mamwĩa: “Ĩkũmi na ilĩ.” 20 “Yĩla natilangile mĩkate mũonza kwondũ wa aũme 4,000, mwoosanisye tũlungu mwausũsya ikavũ siana ata nene?” * Namo mamwĩa: “Mũonza.” 21 Nake amea: “O na yu mũikũelewa?”
22 Na mavika Vethisaita. Na kũu andũ mamũetee mũndũ waĩ kĩlalinda, na mamwĩsũva amũkiite. 23 Na amũkwata ũla mũndũ kĩlalinda kwʼoko na amũtwaa nza wa ũtũi. Ĩtina wa kũmũtwʼĩla mata metho, amwilĩĩla moko na amũkũlya: “Nũkwona kĩndũ?” 24 Na mũndũ ũsu ookĩlya metho na asya: “Nĩngwona andũ namo mailye ta mĩtĩ, ĩndĩ nĩmeũthi.” 25 Na Yesũ ailĩĩla moko ĩngĩ methonĩ ma mũndũ ũsu, na avowʼa, na ambĩĩa kwona nesa. 26 Na kwoou amwĩaĩa enũke, akĩmwĩa: “Ndũkalike ũtũinĩ ũũ.”
27 Na Yesũ vamwe na amanyĩwʼa make mauma motũinĩ ma Kaisalea ya Vilivu, na me nzĩanĩ ambĩĩa kũmakũlya amanyĩwʼa make atĩĩ: “Andũ measya ninyie ũũ?” 28 Namo mamwĩa: “Yoana Mũvatisi, ĩndĩ angĩ measya Eliya, namo angĩ measya, ũmwe wa athani.” 29 Nake amakũlya: “Inywʼĩ nenyu mwĩasya ninyie ũũ?” Vetelo amũsũngĩa, amwĩa: “We nue Klĩsto.” 30 Nake Yesũ ameaĩa kwa ũito maikatavye mũndũ o na ũmwe ĩũlũ wake. 31 O na ĩngĩ, ambĩĩa kũmatavya * kana no nginya Mwana wa mũndũ akwatwe nĩ mathĩna maingĩ na ailewa nĩ atumĩa na anene ma athembi na aandĩki na ayũawa, na ĩtina wa mĩthenya ĩtatũ aithayũũka. 32 Yesũ aneenaa ndeto isu ũtheinĩ. Ĩndĩ Vetelo amwosa na amũtwaa vandũ ũtee na ambĩĩa kũmũkanyʼa. 33 Nake eethyũũa, asisya amanyĩwʼa make, na amũkanyʼa Vetelo, akĩmwĩa: “Thi ĩtina wakwa, Satani! nũndũ mosũanĩo maku nĩ ma andũ, ĩndĩ ti ma Ngai.”
34 Na ayĩta ĩkomano vamwe na amanyĩwʼa make, na amea: “Ethĩwa mũndũ o na wĩva nũkwenda kũngatĩĩa, nĩ elee mwene, na aikua mũtĩ wake wa mathĩna * na ayĩendeea kũngatĩĩa. 35 Nũndũ mũndũ o na wĩva ũla wendaa kũtangĩĩa thayũ wake akawasya, ĩndĩ mũndũ o na wĩva ũla waasya thayũ wake kwondũ wakwa na kwondũ wa ũvoo mũseo akaũtangĩĩa. 36 Kwa wʼo, mũndũ atonya kũunĩka ata akakwata nthĩ yonthe ĩndĩ ayasya thayũ wake? 37 We mũndũ, kwa wʼo, atonya kũnengane kyaũ atũngĩwe thayũ wake? 38 Nũndũ mũndũ o na wĩva ũla ũkambĩwʼĩa nthoni kana ewʼĩe nthoni ndeto syakwa nzyawanĩ ĩno ya ũlaalai * na yĩ na naĩ, Mwana wa mũndũ o nake akamwĩwʼĩa nthoni yĩla wĩũka vamwe na alaĩka atheu ũtheunĩ mũtisu wa Asa wake.”