Kwosana na Maliko

9 O na ĩngĩ amea: “Nĩ wʼo nĩngũmwĩa kana ve amwe maũngamĩte vaa matakasama kĩkwʼũ nongi nginya mambe kwona Ũsumbĩ wa Ngai ũsumbĩkĩte wĩ na vinya.” 2 Na mĩthenya thanthatũ ĩtina wa vau, Yesũ oosa Vetelo, Yakovo, na Yoana na ambata namo me oka kĩĩmanĩ kĩtũlu. Na mũvwʼano wake waalyũka e vamwe namo; 3 na ngũa syake sya ĩũlũ syambĩĩa kũkengakenga, na syeethĩwa syĩ nzaũ mũno kũvĩtũka ũndũ mũvũi wa ngũa o na wĩva ĩũlũ wa nthĩ ũtonya kũivũa ikeũva. 4 Na Eliya na Mose mamaumĩlĩla, namo nĩmaneenaa na Yesũ. 5 Nĩvo ĩndĩ Vetelo wamwĩie Yesũ: “Lavai, nũseo kwitũ kwĩthĩwa vaa. Kwoou eka twambe maeema atatũ, yĩmwe yaku, yĩngĩ ya Mose, na yĩngĩ ya Eliya.” 6 Kwa wʼo, o na ndeesĩ atonya kwasya ata, nũndũ maĩ na wia mwingĩ. 7 Na ĩtu yooka na yamavwʼĩka, na wasya wauma ĩtunĩ yĩu, ũkyasya: “Ũũ nĩwe Mwana wakwa mwendwa. Mwĩwʼei we.” 8 Na o mĩtũkĩ masisya ngalĩko syonthe na mayaaona mũndũ ũngĩ vamwe namo, ate o Yesũ.

9 Na matheeete kuma kĩĩmanĩ, nĩwameaĩe kwa ũito maikatavye mũndũ o na ũmwe ĩũlũ wa maũndũ ala moona nginya ĩtina wa kũthayũũka kwa Mwana wa mũndũ. 10 Nĩmeekĩie ndeto isu ngoonĩ syoo, * ĩndĩ makũlanyʼa ene kwa ene kĩla kyoonanawʼa nĩ kũthayũũka kwake. 11 Na mambĩĩa kũmũkũlya, makyasya: “Nĩkĩ aandĩki maasya kana no nginya Eliya ambe kũka?” 12 Nake amea: “Eliya nĩwe waĩ ambe kũka na kũtũngĩĩa maũndũ onthe; ĩndĩ ũu ũkonanĩtye ata na ũndũ kũandĩkĩtwe ĩũlũ wa Mwana wa mũndũ kana no nginya akwatwe nĩ mathĩna maingĩ na aivũthwʼa? 13 Ĩndĩ nĩngũmwĩa kana, kwa wʼo, Eliya nĩwookie na mamwĩka maũndũ o na meva ala mendaa, o tondũ kũandĩkĩtwe ĩũlũ wake.”

14 Na yĩla mookie vala vaĩ amanyĩwʼa ala angĩ, nĩmoonie ĩkomano ĩnene yĩmathyũlũlũkĩte na vaĩ aandĩki maneenanasya namo. 15 Ĩndĩ ĩkomano yonthe yamwona oou, yasengʼa mũno na yasemba vala ũĩ yĩmũkethye. 16 Kwoou ayĩkũlya: “Mwĩneenanĩasya kyaũ namo?” 17 Na mũndũ ũmwe waĩ ĩkomanonĩ yĩu amũsũngĩa, amwĩa: “Mũmanyĩsya, nĩngũeteie mwana wakwa nũndũ e na veva ũtumaa ataneena. 18 Yĩla veva ũsu wamũkwata, nũmũvalũkasya nthĩ na ayumwa nĩ ĩvũyũ kanywʼanĩ, aivevetanyʼa maeo, na aithela vinya. Nĩnĩmakũlilye amanyĩwʼa maku mawumye, ĩndĩ mainatonya kwĩka ũu.” 19 Nake amasũngĩa, amea: “Inywʼĩ nzyawa ĩte na mũĩkĩĩo, ngaendeea kwĩthĩwa nenyu ĩvinda yĩana ata? Nĩendeea kũmũmĩĩsya nginya ĩndĩĩ? Mũetei vaa nĩĩ.” 20 Kwoou mamũetee kamwana kau, ĩndĩ yĩla veva ũsu wamwonie, vau kwa vau wambĩĩa kũkathingithangya mũno. Na kavalũka nthĩ, na kaendeea kwiliita kaumĩtwe nĩ ĩvũyũ kanywʼanĩ. 21 Nĩvo ĩndĩ Yesũ wakũlilye ĩthe wako: “Kethĩĩtwe kaikwatwa nĩ ũndũ ũũ kwa ĩvinda yĩana ata?” Nake asya: “Kuma ke o kana kanini, 22 na mavinda maingĩ nũkekasya mwakinĩ o na kĩwʼũnĩ nĩ kana ũkoae. Ĩndĩ ethĩwa nũtonya kwĩka ũndũ, twĩwʼĩe tei na ũitũtetheesya.” 23 Yesũ amwĩa: “Atĩ wĩasya, ‘Ethĩwa nũtonya’! Maũndũ onthe nĩmatonyeka kwa ũla wĩ na mũĩkĩĩo.” 24 Na vau kwa vau ĩthe wa kana kau aneena na wasya mũnene na amwĩa: “Nĩ na mũĩkĩĩo! Ndetheesye vala nde na mũĩkĩĩo!”

25 Na yĩla Yesũ woonie kana ĩkomano nĩyeekalaatĩte yũkĩte vala maĩ, akanyʼa ũla veva mũvuku na awĩa: “We veva ũtumaa mũndũ ataneena na atewʼa, nĩngũkwĩaĩa, uma nthĩnĩ wako na ndũkaakalike ĩngĩ!” 26 Ĩtina wa veva ũsu kũkaya na wasya mũnene na kũthingithangya kana kau mavinda maingĩ, wauma na kekala ta kakwʼũ, kwoou andũ aingĩ mambĩĩa kwasya: “Nĩ kakwʼũ!” 27 Ĩndĩ Yesũ akakwata kwʼoko akokĩlya, nako kaũngama. 28 Na yĩla walikile nyũmba, amanyĩwʼa make mamũkũlya ũũ vate andũ angĩ: “Nĩkĩ tũemiwe nĩ kũwumya?” 29 Nake amea: “Veva wa mũthemba ũũ ũtonya kumwʼa kwĩsĩla o mboya.”

30 Na mauma vau mathi na mavĩtĩla Kalilii, ĩndĩ ndendaa mũndũ o na ũmwe amanye ĩũlũ wa ũndũ ũsu. 31 Nũndũ nĩwamanyĩasya amanyĩwʼa make na kũmea: “Mwana wa mũndũ nũkũvũnyanĩwa kũla kwĩ andũ, namo makamũaa, ĩndĩ o na ooawa, akathayũũka ĩtina wa mĩthenya ĩtatũ.” 32 Ĩndĩ mayaaelewa ndeto syake, na nĩmakĩaa kũmũkũlya.

33 Na mavika Kavelinaumi. Na e nyũmba nthĩnĩ, amakũlya atĩĩ: “Mwĩneenanĩasya kyaũ nzĩanĩ?” 34 Namo makilya, nũndũ me nzĩanĩ nĩmaneenanasya ene kwa ene maikũlanyʼa nũũ ũla mũnene katĩ woo. 35 Kwoou ekala nthĩ na ameta ala Ĩkũmi na Elĩ, na amea: “Ethĩwa mũndũ o na wĩva nũkwenda kwĩthĩwa e mbee, no nginya ethĩwe e ĩtina wa onthe, na mũthũkũmi wa onthe.” 36 Na ĩndĩ oosa kana kanini, akaũngamya katĩ woo; na akailĩĩla moko ituonĩ, na amea: 37 “Mũndũ o na wĩva ũla ũthokasya kamwe ka syana nini ta kaa ĩsyĩtwanĩ yakwa, anthokasya nyie; na mũndũ o na wĩva ũla ũnthokasya ndanthokasya nĩ nyioka, ĩndĩ anthokasya vamwe na Ũla wandũmie.”

38 Yoana amwĩa: “Mũmanyĩsya, nĩtwonie mũndũ ũkumasya ndaimoni aitũmĩa ĩsyĩtwa yaku, na twatata kũmũsiĩĩa, nũndũ ti ũmwe witũ.” 39 Ĩndĩ Yesũ asya: “Mũikatate kũmũsiĩĩa, nũndũ vaiĩ mũndũ wĩka kyama kĩnene ĩsyĩtwanĩ yakwa na ĩtina wa ũu ayambĩĩa kũneena naĩ ĩũlũ wakwa. 40 Nũndũ mũndũ o na wĩva ũla ũteũleana naitũ e ngalĩko yitũ. 41 Na mũndũ o na wĩva ũla ũmũnengae kĩkombe kya kĩwʼũ mũnywʼe nũndũ mwĩ ma Klĩsto, nĩmũtavya wʼo, ndakasya ĩtuvi yake nongi. 42 Ĩndĩ mũndũ o na wĩva ũla ũlulutĩkasya kamwe ka tũũ tũnini twĩ na mũĩkĩĩo, nĩ kavaa akoveewa ngingonĩ ĩvia ya kũthia yĩla yĩthyũũkawʼa nĩ ĩngʼoi na ayĩkwʼa ũkanganĩ.

43 “Na ethĩwa kwʼoko kwaku nĩkũũtuma ũlulutĩka, kũtile. Nĩ kavaa ũkakwata thayũ ũte na kwʼoko kũmwe kwĩ kũlika na moko elĩ Ngienanĩ, * mwakinĩ ũtatonya kũvowʼa. 44* —— 45 Na ethĩwa kũũ kwaku nĩkũũtuma ũlulutĩka, kũtile. Nĩ kavaa ũkakwata thayũ ũte na kũũ kũmwe kwĩ kwĩkwʼa na maaũ elĩ Ngienanĩ. * 46* —— 47 Na ethĩwa itho yaku nĩyĩũtuma ũlulutĩka, yĩkye kũasa. Nĩ kavaa kũlika Ũsumbĩnĩ wa Ngai wĩ na itho yĩmwe kwĩ kwĩkwʼa wĩ na metho elĩ Ngienanĩ, * 48 vala kĩinyũ kĩtakusaa na mwaki ũtavoawʼa.

49 “Nũndũ no nginya mwaki wĩĩtĩkĩwʼa andũ ta asu, o tondũ mũndũ wĩtĩkasya mũnyũ. 50 Mũnyũ nĩ mũseo, ĩndĩ mũnyũ waasya mũsamo, ũtonya kũtũngĩĩwa mũsamo wawʼo ata? Ĩthĩwai na mũnyũ nthĩnĩ wenyu, na mũyĩthĩwa na mũuo katĩ wenyu.”