Kwosana na Lũka
14 Na ĩvinda yĩngĩ nĩwaendie kũya lĩu nyũmbanĩ ya mũtongoi ũmwe wa Avalisi mũthenya wa Savato, na nĩmamũsyaĩĩsye nesa. 2 Na sisya! mũndũ ũmwe waĩ na ũwau wa mwimbo * aĩ mbee wake. 3 Kwoou Yesũ akũlya ala meesĩ Mĩao nesa na Avalisi: “Nĩ ũndũ wosanĩte na mĩao kũvosya mũndũ mũthenya wa Savato, kana ti ũndũ wosanĩte na mĩao?” 4 Ĩndĩ mavindya. Nake akwata ũla mũndũ amũvosya, na amwĩa athi. 5 Na ĩndĩ amea: “Nũũ katĩ wenyu ũla nzaũ yake kana mwana wake avalũka kĩthimanĩ mũthenya wa Savato, ũtamũkusasya na mĩtũkĩ akamumya?” 6 Na mayaatonya kũmũsũngĩa.
7 Na ĩndĩ amanenga ngelekanyʼo ala mathoketwʼe yĩla woonie mayĩnyuvĩa kũndũ kũla kwa ndaĩa. Ameie atĩĩ: 8 “Yĩla wathokwʼa nĩ mũndũ mbokanĩ ya mũtwaano, ndũkekale kũndũ kũla kwa ndaĩa. No vethĩwe ve mũndũ ũngĩ wĩ ndaĩa kwĩ we ũthoketwʼe. 9 Na ĩndĩ ũla ũmũthoketye mwĩ elĩ ayũka na aikwĩa, ‘Eka ũũ ekale vau ũilyĩ.’ Na ĩndĩ ũyuma vau wĩwʼĩte nthoni ũithi kwĩkala ĩtina. 10 Ĩndĩ yĩla wathokwʼa, enda ũkekale ĩtina, nĩ kana ũla ũkũthoketye ooka akwĩe, ‘Mũnyanyawa, enda mbee.’ Na ĩndĩ ũkakwata ndaĩa methonĩ ma aeni ala angĩ. 11 Nũndũ kĩla mũndũ wĩnenevasya akanyivwʼa, na mũndũ o na wĩva ũla wĩnyivasya akanenevwʼa.”
12 Ĩtina wa ũu, atavya mũndũ ũla wamũthoketye: “Yĩla wavanga kũseũvĩsya andũ lĩu wa mũthenya kana lĩu wa wĩoo, ndũkathokye anyanyau kana ana-a-au kana andũ ma mũsyĩ kana atũi maku ala athwii. Nũndũ o namo no mese kũũthokya, na mayĩthĩwa no ta meũkũĩva. 13 Ĩndĩ yĩla wavangĩthya mboka, thokya ala ngya, syonze, ala au mamutha, na ilalinda; 14 na ũkeethĩwa wĩ mũtanu, nũndũ mai na kĩndũ matonya kũkũĩva nakyo. Nĩkwĩthĩwa ũkaĩvwa ĩvinda ya ũthayũũkyo wa ala alũngalu.”
15 Yĩla ũmwe katĩ wa ala mathoketwʼe weewie ũu, amwĩa: “Nĩ mũtanu mũndũ ũla ũĩsaa * Ũsumbĩnĩ wa Ngai.”
16 Yesũ amwĩa: “Mũndũ ũmwe nĩwaseũvisye lĩu wa wĩoo, na athokya andũ aingĩ. 17 Na atũma ngombo yake saa wa lĩu wa wĩoo wavika nĩ kana ĩkatavye ala mathoketwʼe, ‘Ũkai, nũndũ kĩla kĩndũ nĩkyũmbanyʼe.’ 18 Ĩndĩ onthe mambĩĩa kũnengane itumi sya kũlea. Wa mbee amwĩa, ‘Nĩnathooie mũũnda na nĩenda kũthi ngawone; nĩngũũkũlya ũndekee.’ 19 Na ũngĩ asya, ‘Nĩnathooie ngʼombe ĩkũmi, * na nĩendete kũisisya; nĩngũũkũlya ũndekee.’ 20 Nake ũngĩ asya, ‘No ĩndĩ nĩnatwaanie, na nũndũ wa ũu nditonya kũka.’ 21 Kwoou ĩla ngombo yooka na yatavya vwana wayo maũndũ asu. Nake vwana ũsu athata, na eea ngombo yake, ‘Umaala mĩtũkĩ ũthi nzĩanĩ ila nene na tũsĩlanĩ twa ndũa, na ũiete vaa ngya na syonze na ilalinda na ala au mamutha.’ 22 Ĩtina wa ĩvinda ĩla ngombo yasya, ‘Vwana, nĩneeka ũndũ wambĩaĩa, ĩndĩ ve o mwanya.’ 23 Kwoou ũla vwana eea ĩla ngombo, ‘Umaala ũthi nzĩanĩ na tũsĩlanĩ na ũimathingʼĩĩsya moke, nĩ kana nyũmba yakwa yusũe. 24 Nũndũ nĩngũmwĩa, vaiĩ ũmwe wa ala nĩĩthoketye wĩsama lĩu wakwa wa wĩoo.’”
25 Na vaĩ ĩkomano ĩnene yaendanĩtye nake, na eethyũũa, na ayĩa: 26 “Mũndũ o na wĩva ũla ũngatĩĩaa na ailea kũmena * ĩthe wake na inyia wake na mũka wake na syana syake na ana-a-inyia na eĩtu-a-inyia, ĩĩ, o na thayũ wake mwene, ndatonya kwĩthĩwa mũmanyĩwʼa wakwa. 27 Mũndũ o na wĩva ũla ũtakuaa mũtĩ wake wa mathĩna * na aingatĩĩa, ndatonya kwĩthĩwa mũmanyĩwʼa wakwa. 28 Kwa ngelekanyʼo, nũũ katĩ wenyu ayenda kwaka mwako mũtũlu ũtambaa kwĩkala nthĩ akeka masavu nĩ kana amanye kana e na mbesa ianĩtye sya kũũmina? 29 Alea kwĩka ũu, nũtonya kwambĩĩsya mũsingi na ayĩemwa nĩ kũũmina, na onthe ala memwonaa mayambĩĩa kũmũthekeea, 30 makyasya: ‘Mũndũ ũũ anambĩĩie kwaka ĩndĩ aemwa nĩ kũmina.’ 31 Kana nĩ mũsumbĩ wĩva aithi kũkita na mũsumbĩ ũngĩ ũtambaa kwĩkala nthĩ na kũsũanĩa kana we, e na asikalĩ 10,000, nũtonya kũkĩlya vinya ũla ũngĩ wũkĩte kũkita nake e na asikalĩ 20,000? 32 Ĩndĩ ethĩwa kwa wʼo ndatonya kwĩka ũu, nũtũmaa kĩkundi kya andũ kĩkaneene na mũsumbĩ ũla ũngĩ e o kũasa, na aimantha mũuo. 33 O ta ũu, manyai nesa kana vaiĩ ũmwe wenyu ũtonya kũtwʼĩka mũmanyĩwʼa wakwa atambĩte kũtia malĩ yake na syĩndũ syake.
34 “Vate nzika, mũnyũ nĩ mũseo. Ĩndĩ mũnyũ waasya mũsamo, ũtonya kũtũngĩĩwa mũsamo wawʼo ata? 35 Ndwĩthĩawa na ũtethyo o na ũmwe mũthanganĩ kana vũũnĩ. Andũ mekaa kũwĩkya ĩtheka. Ũla wĩ na matũ ma kwĩwʼa, nĩewʼe.”