Kwosana na Lũka

9 Nĩvo ĩndĩ wametie ala Ĩkũmi na Elĩ na amanenga vinya na ũkũmũ wa kumya ndaimoni syonthe na wa kũvosya mowau. 2 Na amatũma makatavanyʼe Ũsumbĩ wa Ngai na maivosya, 3 na amea: “Mũikakue kĩndũ kwondũ wa kyalo, o na ndata o na lĩu o na mũkate o na mbesa; * o na mũikethĩwe na ngũa ilĩ. * 4 Ĩndĩ mũsyĩ o na wĩva ũla mwĩlika, ĩkalai vau nginya yĩla mwĩuma kũu. 5 Na vandũ o na va vala mũteũthokwʼa, mũyuma ndũanĩ ĩsu, tuangai kĩtoo kĩla kĩ maaũnĩ menyu nĩ kana ũu wĩthĩwe ũkũsĩ kwoo.” 6 Na ĩndĩ mathi mesĩla kĩsionĩ na motũinĩ, maitavanyʼa ũvoo mũseo na kũvosya andũ kĩla vandũ.

7 Na Mũsumbĩ * Elote * nĩweewie ĩũlũ wa maũndũ onthe ala maendeee kwĩkĩka, na athĩnĩka mũno nũndũ amwe maasya kana Yoana nũnathayũũkiwʼe, 8 ĩndĩ angĩ namo maasya kana Eliya nĩumĩlile, na angĩ makyasya kana nĩ ũmwe wa athani ma tene ũthayũũkie. 9 Na Elote asya: “Yoana nĩnĩnamũtilile mũtwe. Nũũ ĩndĩ, ũũ ngwĩwʼa maũndũ aa ĩũlũ wake?” Kwoou nĩwendaa kũmwona.

10 Yĩla atũmwa masyokie nĩmatavisye Yesũ maũndũ onthe ala meekie. Na ĩndĩ amosa na mathi me oka ndũanĩ yĩtawa Vethisaita. 11 Ĩndĩ yĩla ĩkomano yamanyie ũndũ ũsu yamũatĩĩa. Na amathokya nesa na ambĩĩa kũneena namo ĩũlũ wa Ũsumbĩ wa Ngai, na avosya ala maĩ na vata wa kũvowʼa. 12 Kwaĩ kũnambĩĩa kũtuka. Ala Ĩkũmi na Elĩ mooka, na mamwĩa: “Ũmbũũkya ĩkomano, nĩ kana andũ mathi motũinĩ ala me vakuvĩ na mĩũndanĩ makamanthe vandũ makome na maimantha lĩu, nũndũ vandũ vaa tũĩ vaitwĩe andũ.” 13 Ĩndĩ amea: “Manengei kĩndũ maye.” Namo masya: “Tũi na kĩndũ kĩngĩ eka mĩkate ĩtano na makũyũ elĩ, ate o ithyĩ ene tũendie tũkathooe lĩu kwondũ wa andũ aa onthe.” 14 Kwa wʼo vaĩ aũme ta 5,000. Ĩndĩ amea amanyĩwʼa make atĩĩ: “Matavyei mekale nthĩ ikundi sya andũ ta 50.” 15 Na meeka ũu na onthe mekala nthĩ. 16 Na oosa ĩla mĩkate ĩtano na ala makũyũ elĩ, asisya ĩũlũ ĩtunĩ na aiathima. Na ĩndĩ aitilanga na ambĩĩa kũnenga amanyĩwʼa maaĩe ĩkomano. 17 Na andũ onthe maya mavũna, na moosanyʼa ikavũ 12 sya tũlungu tũla twatialile.

18 Ĩtina, aendeee kũvoya e weka, amanyĩwʼa mooka vala ũĩ, na amakũlya: “Ĩkomano yĩasya nyie ninyie ũũ?” 19 Namo mamũsũngĩa, masya: “Yoana Mũvatisi, ĩndĩ angĩ measya Eliya, namo angĩ measya kana nĩ mwathani ũmwe wa tene ũthayũũkie.” 20 Na ĩndĩ amakũlya: “Inywʼĩ nenyu mwĩasya ninyie ũũ?” Vetelo asũngĩa, asya: “We nue Klĩsto wa Ngai.” 21 Na ĩndĩ amakanyʼa kwa ũito na ũlũmu, na ameaĩa maikatavye mũndũ o na ũmwe ũndũ ũsu, 22 ĩndĩ amea: “No nginya Mwana wa mũndũ akwatwe nĩ mathĩna maingĩ na ailewa nĩ atumĩa na anene ma athembi na aandĩki na ayũawa, na mũthenya wa katatũ aithayũũkwʼa.”

23 Na ĩndĩ aendeea kũmatavya onthe atĩĩ: “Ethĩwa mũndũ o na wĩva nũkwenda kũngatĩĩa, nĩ elee mwene, na aikua mũtĩ wake wa mathĩna * kĩla mũthenya na ayĩendeea kũngatĩĩa. 24 Nũndũ mũndũ o na wĩva ũla wendaa kũtangĩĩa thayũ wake akawasya, ĩndĩ mũndũ o na wĩva ũla waasya thayũ wake kwondũ wakwa, ũsu nĩwe ũkaũtangĩĩa. 25 Kwa wʼo, mũndũ atonya kũunĩka ata o na akakwata nthĩ yonthe ĩndĩ ayasya kana ayananga thayũ wake? 26 Nũndũ mũndũ o na wĩva ũla ũkambĩwʼĩa nthoni kana ewʼĩe nthoni ndeto syakwa, Mwana wa mũndũ o nake akamwĩwʼĩa mũndũ ũsu nthoni yĩla wĩũka ũtheunĩ wake mũtisu na wa Asa na wa alaĩka atheu. 27 Ĩndĩ nĩmũtavya wʼo kana ve amwe maũngamĩte vaa matakasama kĩkwʼũ nongi nginya mambe kwona Ũsumbĩ wa Ngai.”

28 Kwa wʼo, mĩthenya ta nyanya ĩtina wa kũneena ndeto isu, nĩwoosie Vetelo, Yoana, na Yakovo, na ambata namo kĩĩmanĩ akavoye. 29 Na aendeee kũvoya, ũthyũ wake waalyũka na ngũa syake syeeũva na syakena mũno. 30 Na sisya! aũme elĩ nĩmaneenaa nake; aũme asu maĩ Mose na Eliya. 31 Maumĩlile na ũtheu mũtisu na mambĩĩa kũneena ĩũlũ wa ũndũ waĩ athi, na o mĩtũkĩ ũndũ ũsu waĩ wĩanĩe athi Yelusaleme. 32 Na Vetelo na ala waĩ namo maĩ na too mwingĩ mũno, ĩndĩ yĩla maamũkie vyũ, nĩmoonie ũtheu wake mũtisu na ala aũme elĩ maũngamĩte vamwe nake. 33 Na aũme asu mayuma vala ũĩ, Vetelo amwĩa Yesũ atĩĩ: “Mũmanyĩsya, nũseo kwitũ kwĩthĩwa vaa. Kwoou eka twambe maeema atatũ; yĩmwe yaku, yĩngĩ ya Mose, na yĩngĩ ya Eliya.” Ĩndĩ ndeesĩ ũndũ ũkwasya. 34 Na aendeee kũneena maũndũ asu, ĩtu yooka na yambĩĩa kũmavwʼĩka. Na ĩtu yĩu yĩendeee kũmavwʼĩka, makwatwa nĩ wia. 35 Nĩvo ĩndĩ wasya waumie ĩtunĩ yĩu, ũkyasya: “Ũũ nĩwe Mwana wakwa, ũla ũnyuvĩtwe. Mwĩwʼei we.” 36 Na wasya ũsu ũendeee kũneena, moona Yesũ e weka. Ĩndĩ mavindya na mayaatavya mũndũ o na ũmwe mĩthenyanĩ ĩsu ũndũ o na wĩva katĩ wa maũndũ ala moonie.

37 Mũthenya ũla waatĩĩe, yĩla matheeie kuma kĩĩmanĩ, ĩkomano ĩnene yooka yakomana nake. 38 Na sisya! mũndũ ũmwe ĩkomanonĩ yĩu aneena na wasya mũnene, akyasya: “Mũmanyĩsya, nĩngũkwĩsũva ũtetheesye mwana wakwa, nũndũ nowe mwana wakwa e weka. 39 Na sisya! ve veva ũmũkwataa, na o mĩtũkĩ aikaya na wasya mũnene, na ũimũthingithangya aumĩtwe nĩ ĩvũyũ kanywʼanĩ, na ũmumaa na vinya ĩtina wa kũmũũmĩsya. 40 Nĩsũvie amanyĩwʼa maku mawumye, ĩndĩ maemwa.” 41 Yesũ asũngĩa, asya: “Inywʼĩ nzyawa ĩte mũĩkĩĩo na nthyoeku, ngaendeea kwĩthĩwa nenyu ĩvinda yĩana ata na kũmũmĩĩsya nginya ĩndĩĩ? Mũete mwana ũsu waku vaa.” 42 Ĩndĩ kamwana kau kaendete vala ũĩ, ndaimoni ĩsu yakavalũkya nthĩ na yakathingithangya na vinya mũno. Ĩndĩ Yesũ akanyʼa veva ũsu mũvuku na avosya kamwana kau na akanengane kwa ĩthe wako. 43 Na andũ onthe nĩmasengʼie mũno nũndũ wa ũtonyi mũnene wa Ngai.

Na onthe maendeee kũsengʼa nũndũ wa maũndũ onthe ala weekaa, amea amanyĩwʼa make atĩĩ: 44 “Ĩthukĩĩsyei nesa na mũililikana ndeto ii, nũndũ Mwana wa mũndũ nũkũvũnyanĩwa kũla kwĩ andũ.” 45 Ĩndĩ mayaaelewa nĩ kĩla waneenaa. Kwa wʼo, nĩmavithĩtwe ũndũ ũsu nĩ kana maikaũelewe, namo nĩmakĩaa kũmũkũlya ĩũlũ wa ũneeni ũsu.

46 Na ngananĩo syookĩla katĩ woo ĩũlũ wa nũũ ũla mũnene katĩ woo. 47 Na Yesũ amanya mosũanĩo ma ngoo syoo, na oosa kana kanini akaũngamya ũtee wake, 48 na amea: “Mũndũ o na wĩva ũla ũthokasya kana kaa kanini ĩsyĩtwanĩ yakwa, anthokasya nyie; na mũndũ o na wĩva ũla ũnthokasya, athokasya Ũla wandũmie. Nũndũ ũla wĩkuaa ta mũnini katĩ wenyu inywʼonthe ũsu nĩwe mũnene.”

49 Yoana asũngĩa, asya: “Mũmanyĩsya, nĩtwonie mũndũ ũkumasya ndaimoni aitũmĩa ĩsyĩtwa yaku, na twatata kũmũsiĩĩa, nũndũ ti ũmwe witũ.” 50 Ĩndĩ Yesũ amwĩa: “Mũikatate kũmũsiĩĩa, nũndũ mũndũ o na wĩva ũla ũteũleana nenyu e ngalĩko yenyu.”

51 Na mĩthenya ĩendeee kũthengeea * nĩ kana ambate ĩũlũ, nĩwatwie vyũ kũthi Yelusaleme. 52 Kwoou atũma andũ mathi mbee wake. Na mathi malika ũtũinĩ ũmwe wa Asamalia nĩ kana meke mĩvango kwondũ wake. 53 Ĩndĩ mayaamũthokya, nũndũ nĩwatwʼĩte vyũ * kũthi Yelusaleme. 54 Yĩla amanyĩwʼa make Yakovo na Yoana moonie ũu, masya: “Mwĩaĩi, nũkwenda twĩte mwaki ũtheee kuma ĩtunĩ ũmamine?” 55 Ĩndĩ ethyũũa na amakanyʼa. 56 Kwoou mathi ũtũinĩ ũngĩ.

57 Na maendete nzĩanĩ, mũndũ ũmwe amwĩa: “Nĩngũkũatĩĩa kwʼonthe kũla wĩthi.” 58 Ĩndĩ Yesũ amwĩa: “Mbĩwa syĩ na maima na nyũnyi sya yayaya syĩ na ndala, ĩndĩ Mwana wa mũndũ nde na vandũ va ũkomya mũtwe wake.” 59 Na amwĩa ũngĩ: “Ĩthĩwa mũatĩĩi wakwa.” Nake mũndũ ũsu asya: “Mwĩaĩi, nenga mwanya nambe kũthi kũthika ĩthe wakwa.” 60 Ĩndĩ amwĩa: “Eka akwʼũ mathike akwʼũ moo, ĩndĩ we enda ũkatavanyʼe kwʼonthe Ũsumbĩ wa Ngai.” 61 Na ũngĩ asya: “Nĩngũkũatĩĩa Mwĩaĩi, ĩndĩ nenga mwanya nambe kũthi ngatianĩe ũvoo na andũ ma mũsyĩ wakwa.” 62 Nake Yesũ amwĩa: “Vaiĩ mũndũ ũkwataa mũlaũ na aisisya maũndũ ala me ĩtina waĩlĩte kwondũ wa Ũsumbĩ wa Ngai.”