Motalo

35 Na Yeova aendeea kũneena na Mose e yalatanĩ ĩtindimalu ya Moavi vakuvĩ na Yolotani kũu Yeliko, ayasya: 2 “Neena na Aisilaeli ũmatavye kana nĩmaĩlĩte kũnenga Alivai ndũa sya kwĩkala kuma ũtiĩwanĩ ũla meũkwata, na nĩmaĩlĩte kũnenga Alivai isesi ila ithyũlũlũkĩte ndũa isu. 3 Nĩmo makatũaa ndũanĩ isu, na isesi isu ikeethĩawa kwondũ wa indo syoo, malĩ syoo, na nyamũ ila ingĩ syonthe me nasyo. 4 Na isesi sya ndũa ila mũũnenga Alivai ikeethĩawa syĩ na ũthanthau wa mĩkono 1,000* kuma ũkũtanĩ kũthyũlũlũka ndũa. 5 Mwaĩlĩte kũthimaa nza wa ndũa mĩkono 2,000 ngalĩko ya wumĩlonĩ wa sua, mĩkono 2,000 ngalĩko ya ĩtheo, mĩkono 2,000 ngalĩko ya ũthũĩlonĩ wa sua, na mĩkono 2,000 ngalĩko ya ĩũlũ, na ĩ ndũa yaĩlĩte kwĩthĩwa katĩkatĩ. Isu nĩsyo ikethĩawa isesi sya ndũa syoo.

6 “Ndũa ila mũũnenga Alivai syĩĩthĩwa syĩ ndũa 6 sya kwĩvitha, ila mũndũ ũla woaa ũngĩ ũkakĩĩaa vo, na nĩmũũmanenga ndũa ingĩ 42. 7 Kwoou ndũa syonthe ila mũũnenga Alivai syĩĩthĩwa syĩ 48, vamwe na isesi syasyo. 8 Mũkanenga Alivai ndũa isu kuma ũtiĩwanĩ wa Aisilaeli. Ethĩwa kĩkundi nĩ kĩnene kĩkanengane ndũa mbingangĩ, na ethĩwa kĩkundi nĩ kĩnini kĩkanengane ndũa ninangi. Kĩla kĩkundi kĩkanenga Alivai ndũa imwe syakyo kwosana na ũtiĩwa ũla kĩkwatĩte.”

9 Na Yeova aendeea kũneena na Mose, ayasya: 10 “Neena na Aisilaeli na ũimea atĩĩ: ‘Yu mũkilyĩ kũinga Yolotani mũlike nthĩ ya Kanaanĩ. 11 Na nĩmwaĩlĩte kwĩnyuvĩa ndũa itonya kũvikĩka na mĩtũkĩ nĩ kana syĩthĩwe ndũa sya kwĩvitha, na vau nĩ vo mũndũ ũla woaa ũngĩ* kũte kwenda kwake ũkakĩĩaa. 12 Ndũa isu ikatũmĩawa kwĩvitha mũĩvanĩsya wa nthakame, nĩ kana mũndũ ũla ũwaĩte ũngĩ ndakoawe nginya yĩla ũkaũngama silanĩ mbee wa ũmbano. 13 Ũu nĩwʼo mũkatũmĩaa ndũa thanthatũ sya kwĩvitha ila mũũnyuva. 14 Mwĩnyuva ndũa itatũ mũingo ũũ wa Yolotani na ndũa itatũ nthĩ ya Kanaanĩ nĩ kana syĩthĩwe ndũa sya kwĩvitha. 15 Ndũa isu thanthatũ ikeethĩwa wĩvitho kwondũ wa Aisilaeli, kwondũ wa mwĩkali wa ũeninĩ, na kwondũ wa mũndũ ũla ũthamĩĩe kĩsionĩ kyenyu; mũndũ o na wĩva ũla woaa ũngĩ* kũte kwenda kwake akakĩĩaa kũu.

16 “‘Ĩndĩ ethĩwa akũna mũndũ ũla ũngĩ na kĩndũ kya kyũma* na mũndũ ũsu akwʼa, ũsu nĩ mũaani. Vate ndĩi mũaani ũsu aĩlĩte kũawa. 17 Na ethĩwa amũkima na ĩvia yĩtonya kũmũaa na aikwʼa, ũsu nĩ mũaani. Vate ndĩi mũaani ũsu aĩlĩte kũawa. 18 Na ethĩwa amũkũna na kĩndũ kĩseũvĩtwʼe na mũtĩ kĩtonya kũmũaa na aikwʼa, ũsu nĩ mũaani. Vate ndĩi mũaani ũsu aĩlĩte kũawa.

19 “‘Mũĩvanĩsya wa nthakame nĩwe waĩlĩte kũaa mũaani ũsu. Akomana nake, we mwene nĩwe waĩle kũmũaa. 20 Ethĩwa mũndũ nĩwasukuma mũndũ ũkũmũmena kana ekya kĩndũ amũkime e na kĩeleelo kya kũmũũmĩsya* na akwʼa, 21 kana ethĩwa mũndũ ũkũmena ũngĩ nĩwamũkũna na kwʼoko kwake, na akwʼa, vate ndĩi ũla wakũnana aĩlĩte kũawa. Ũsu nĩ mũaani. Mũĩvanĩsya wa nthakame aĩlĩte kũaa mũaani ũsu akomana nake.

22 “‘Ĩndĩ ethĩwa mũndũ nĩwasukuma ũngĩ kana amũkima na kĩndũ ate na kĩeleelo kya kũmũũmĩsya* na ndamũmenete na ndeĩvangĩte kwĩka ũu, 23 kana ethĩwa amũtumba na ĩvia atamwene na mayĩĩ na ũmaitha kana ndeũmanthaa ũndũ ũtonya kũmũũmĩsya, na mũndũ ũsu nĩwakwʼa, 24 ũmbano waĩlĩte kũsilanyʼa ũla wakũnana na mũĩvanĩsya wa nthakame, kwosana na motwʼĩo asu. 25 Nĩvo ĩndĩ ũmbano ũkamũvonokya ũla ũaanĩte kuma kwʼokonĩ kwa mũĩvanĩsya wa nthakame na aitũngwa ndũanĩ yake ya kwĩvitha ĩla wakĩĩie, nake no nginya aendeee kwĩkala vau nginya yĩla mũthembi mũnene ũla wetĩkĩiwʼe mauta matheu ũkakwʼa.

26 “‘Ĩndĩ ethĩwa mũndũ ũsu ũaanĩte nĩwakĩla mũvaka wa ndũa yake ya kwĩvitha ĩla wakĩĩie 27 na mũĩvanĩsya wa nthakame aimwĩthĩa nza wa mũvaka wa ndũa yake ya kwĩvitha na aimũaa mũndũ ũsu ũaanĩte, mũĩvanĩsya ũsu ndakethĩwa na ĩvĩtyo ya kwĩtĩkya nthakame. 28 Nĩkwĩthĩwa no nginya aendeee kwĩkala ndũanĩ yake ya kwĩvitha nginya yĩla mũthembi mũnene ũkakwʼa. Na mũthembi mũnene akwʼa, mũndũ ũsu ũaanĩte akeethĩwa atonya kũsyoka kĩsionĩ kyake. 29 Maũndũ asu makeethĩawa me ũtwʼĩo kwondũ wenyu yĩla mũũtwʼa sila nzyawanĩ syenyu syonthe kwʼonthe kũla mũkethĩwa mũtwĩe.

30 “‘Mũndũ o na wĩva ooaa mũndũ* ũngĩ, aĩlĩte kũawa nũndũ nĩ mũaani, ĩndĩ aĩlĩte kũawa o ethĩwa ve andũ* matonya kũkũsĩĩa ũndũ ũsu; ethĩwa ũkũsĩ no wa mũndũ ũmwe, vai mũndũ* waĩlĩte kũawa. 31 Mũyaĩlĩte o na vanini kwosa wovosyo kwondũ wa thayũ wa mũaani waĩlĩte kũawa, nũndũ vate ndĩi nĩwaĩlĩte kũawa. 32 Na mũyaĩlĩte o na vanini kwosa wovosyo kwondũ wa mũndũ wakĩĩa ndũanĩ yake ya kwĩvitha nĩ kana asyoke kĩsionĩ kyake na aindeea kwĩkala kwʼo mũthembi mũnene ate mũkwʼũ.

33 “‘Mũyaĩlĩte o na vanini kũvukya nthĩ ĩla mũtwĩe, nũndũ nthakame nĩvukasya nthĩ, na vai kĩndũ kĩtonya kũete wĩwʼanĩthyo kwondũ wa nthakame ĩla yetĩkwʼa ĩ nthĩ ate o nthakame ya ũla wamĩtĩkya. 34 Mũyaĩlĩte o na vanini kũvukya nthĩ ĩla mũtwĩe, nũndũ noyo nyie nĩtwĩe; nĩkwĩthĩwa nyie, Yeova, nĩtwĩe katĩ wa andũ ma Isilaeli.’”