Kwa Alomi
6 Yu twĩasya ata? Nĩtwaĩle kũendeea kwĩkala naĩnĩ nĩ kana ũseo mwingĩ wongeleke? 2 Aiee! Nũndũ nĩtwakwie maũndũnĩ ma naĩ, tũtonya kũendeea kwĩkala naĩnĩ ata? 3 Kana mũyĩsĩ ithyonthe ala twavatisiwe nthĩnĩ wa Klĩsto Yesũ twavatisiwe nthĩnĩ wa kĩkwʼũ kyake? 4 Kwoou, twathikiwe nake kwĩsĩla ũvatiso witũ nthĩnĩ wa kĩkwʼũ kyake, nĩ kana o ũndũ Klĩsto wathayũũkiwʼe kwĩsĩla ũnene wa Asa wake, o naitũ twĩkale thayũ mweũ. 5 Ethĩwa twĩ ngwatanĩo vamwe nake mũvwʼanonĩ wa kĩkwʼũ kyake, tũkeethĩwa twĩ ngwatanĩo vamwe nake mũvwʼanonĩ wa ũthayũũkyo wake. 6 Nũndũ nĩtwĩsĩ kana mwĩkalĩle witũ wa tene nĩwaathĩĩiwe mũtĩnĩ vamwe nake nĩ kana mwĩĩ witũ wĩ na naĩ wĩthĩwe ũte na vinya, na nĩ kana tũikaendeee kwĩthĩwa twĩ ngombo sya naĩ. 7 Nũndũ mũndũ ũla wakwʼa ethĩawa athaĩtwʼe kuma naĩnĩ yake. *
8 O na ĩngĩ, ethĩwa nĩtwakwie vamwe na Klĩsto, nũtũĩkĩĩĩte kana tũkekala thayũ vamwe nake. 9 Nũndũ nĩtwĩsĩ kana Klĩsto ndakwʼa ĩngĩ, nĩkwĩthĩwa yu nĩmũthayũũkye, na kĩkwʼũ kĩimũsumbĩkĩte. 10 Nũndũ kĩkwʼũ kĩla wakwie, akwie ĩvinda o yĩmwe nĩ kana avete naĩ, atakakwʼa ĩngĩ, ĩndĩ thayũ ũla we wĩkalaa, ekalaa kwondũ wa Ngai. 11 O ta ũu, ĩtalei ta mwĩ akwʼũ maũndũnĩ ma naĩ ĩndĩ ta mwĩ thayũ kwondũ wa Ngai kwĩsĩla Klĩsto Yesũ.
12 Kwoou, mũikaeke naĩ ĩendeee kũsumbĩka ta mũsumbĩ nthĩnĩ wa mĩĩ yenyu ĩla ĩtonya kũkwʼa kwa kwĩthĩwa mwĩ ewi kwa mawendi ma mwĩĩ. 13 O na mũikaendeee kũnengane mĩĩ * yenyu yĩthĩwe mĩio ya kaũ kwondũ wa ũla ũte ũlũngalu, ĩndĩ mwĩnengane kwa Ngai ta ala me thayũ kuma kĩkwʼũnĩ, na mũinengane mĩĩ * yenyu kwa Ngai ta mĩio ya kaũ kwondũ wa ũlũngalu. 14 Nũndũ naĩ ndyaĩle kũmũsumbĩka, nĩkwĩthĩwa inywʼĩ mũi ungu wa mĩao ĩndĩ mwĩ ungu wa ũseo mwingĩ.
15 Kwoou yu twĩasya ata? Yo nĩtwaĩle kwĩka naĩ nũndũ twĩ ungu wa ũseo mwingĩ ĩndĩ tũi ungu wa mĩao? Aiee! 16 Nũndũ mũtesĩ kana mweeyumya kwa mũndũ o na wĩva mwĩthĩwe mwĩ ngombo mbĩwi, mwĩthĩawa ngombo sya ũsu mwĩwʼaa? No mwĩthĩwe ngombo sya naĩ ĩla ĩetae kĩkwʼũ kana sya wĩwi ũla ũetae ũlũngalu. 17 Ĩndĩ nĩngũmũtũngĩa Ngai mũvea nũndũ o na kau mwaĩ ngombo sya naĩ, nĩmweewie kuma ngoonĩ momanyĩsyo ala mwanengiwe. 18 Ĩĩ, na nũndũ nĩmwathaiwʼe kuma naĩnĩ, nĩmwatwʼĩkie ngombo sya ũlũngalu. 19 Nĩneena o ta mũndũ nũndũ wa wonzu wa mwĩĩ wenyu; nũndũ o tondũ mwanenganie mamutha menyu methĩwe ngombo sya ũvuku na ũtũli wa mĩao ũla watumaa mũtũla mĩao, o ta ũu nenganai mamutha menyu methĩwe ngombo sya ũlũngalu ũla ũetae ũtheu. 20 Nũndũ yĩla mwaĩ ngombo sya naĩ, mwaĩ athasye maũndũnĩ ma ũlũngalu.
21 Nĩ matunda meva ala mwasyaaa ĩvindanĩ yĩu? Nĩ maũndũ ala yu mũmewʼĩaa nthoni. Nũndũ mũminũkĩlyo wa maũndũ asu nĩ kĩkwʼũ. 22 Ĩndĩ nũndũ yu mwĩ athasye kuma naĩnĩ na mũkatwʼĩka ngombo sya Ngai, mũsyaaa matunda kwa nzĩa ya ũtheu, na mũminũkĩlyo nĩ thayũ wa tene na tene. 23 Nũndũ ĩtuvi ya naĩ nĩ kĩkwʼũ, ĩndĩ mũthĩnzĩo ũla Ngai ũnenganae nĩ thayũ wa tene na tene kwĩsĩla Klĩsto Yesũ, Mwĩaĩi waitũ.