Valũa wa Mbee kwa Akolintho
3 Kwoou, ana-a-asa, ndyaaneena nenyu ta andũ ma kĩ-veva, ĩndĩ ta andũ ma kĩ-mwĩĩ, ta twana tũnini nthĩnĩ wa Klĩsto. 2 Namũnengie ĩia, ĩndĩ ti lĩu mũmũ nũndũ mũyaĩ na vinya, o na yu mũinamba kwĩthĩwa na vinya, 3 nĩkwĩthĩwa mwĩ o ma kĩ-mwĩĩ. Na nũndũ mwĩ na kĩwĩu na ĩteta katĩ wenyu, ũu ti kwonany’a kana mwĩ o ma kĩ-mwĩĩ na mwĩkaa o ta andũ ma nthĩ? 4 Nũndũ yĩla ũmwe ũkwasya, “Nyie nĩ wa Vaulo,” na ũngĩ akyasya, “Nakwa nĩ wa Avolo,” mũikwĩka o ta andũ ma nthĩ?
5 Avolo nũũ? Na Vaulo nũũ? Nĩ athũkũmi ala matethasya wĩa ũla Mwĩaĩi wamanengie, ala kwĩsĩla kwoo mwatw’ĩkie etĩkĩli. 6 Nyie nĩnavandie, na Avolo nĩwanyithisye, ĩndĩ Ngai aendeea na kwĩany’a, 7 nĩ kana wĩthĩe ũla wa vata ti ũla ũvandaa kana ũla ũnyithasya, ĩndĩ nĩ ũla wĩanasya, nake nĩ Ngai. 8 Ũla ũvandaa na ũla ũnyithasya nĩ kĩndũ kĩmwe, * ĩndĩ kĩla mũndũ akakwata ĩtuvi yake kwosana na wĩa wake. 9 Nũndũ twĩ atethya ma wĩa vamwe na Ngai. Nenyu mwĩ mũũnda wa Ngai ũendeee na kũĩmwa, na mwĩ mwako wa Ngai.
10 Kwosana na ũseo mwingĩ wa Ngai ũla nanengiwe, nĩneekĩie mũsingi ta mũũngamĩi wa mwako, * ĩndĩ mũndũ ũngĩ nũendeee kwaka ĩũlũ waw’o. Ĩndĩ eka kĩla ũmwe aendeee kũsisya ũndũ ũkwaka ĩũlũ wa mũsingi ũsu. 11 Nũndũ vaiĩ mũndũ ũngĩ ũtonya kwĩkĩa mũsingi ũngĩ eka ũla weekĩiwe, naw’o nĩ Yesũ Klĩsto. 12 Ethĩwa mũndũ o na wĩva nũkwaka ĩũlũ wa mũsingi ũsu atũmĩĩte thaavu, vetha, mavia ma thooa mũnene, mbwaũ, kana nyeki mbũmũ, 13 wĩa wa kĩla ũmwe ũkoonanw’a ũndũ ũilye * mũthenya ũla wĩa ũsu wĩtatwa, nĩkwĩthĩwa ũkavuanw’a kwĩsĩla mwaki, na mwaki nĩw’o ũkaĩkĩĩthya nĩ wĩa wa mũthemba mwaũ kĩla ũmwe ũtethetye. 14 Ethĩwa mwako wa mũndũ o na wĩva ũla wakĩte ĩũlũ wa mũsingi ũsu ũkaema kũvya, akakwata ĩtuvi; 15 ethĩwa wĩa wa mũndũ o na wĩva ũkavya, akakwata wasyo, ĩndĩ we mwene akatangĩĩwa; o na ũu wĩ o vo, akeethĩwa no ta wesĩla mwakinĩ.
16 Inyw’ĩ no mwĩsĩ kana mwĩ ĩkalũ ya Ngai na kana veva wa Ngai wĩkalaa nthĩnĩ wenyu? 17 Ethĩwa mũndũ o na wĩva akaananga ĩkalũ ya Ngai, nake Ngai akamwananga; nũndũ ĩkalũ ya Ngai nĩ ĩtheu, nenyu ninyw’ĩ ĩkalũ yĩu.
18 Ekai mũndũ o na wĩva ndakekenge: Ethĩwa mũndũ o na wĩva katĩ wenyu esũanĩa ta mũĩ ĩvindanĩ yĩĩ, * eka ethĩwe e mũtumanu, nĩ kana ethĩwe e mũĩ. 19 Nũndũ ũĩ wa nthĩ ĩno nĩ ũtumanu kwa Ngai, nĩkwĩthĩwa nĩkũandĩkĩtwe: “Nũmakwatasya ala oĩ maũĩnĩ moo.” 20 O na nĩkũandĩkĩtwe: “Yeova nĩwĩsĩ kana mosũanĩo ma ala oĩ nĩ vathei.” 21 Kwoou ekai mũndũ o na wĩva ndakekathĩĩe nũndũ wa maũndũ ala andũ mekaa; nĩkwĩthĩwa syĩndũ syonthe nĩ syenyu, 22 o na ethĩwa nĩ Vaulo kana Avolo kana Keva * kana nthĩ kana thayũ kana kĩkw’ũ kana syĩndũ ila syĩ vo yu kana ila ikoka, syĩndũ syonthe nĩ syenyu; 23 nenyu mwĩ ma Klĩsto, nake Klĩsto nĩ wa Ngai.