Ũvuanyʼo kwa Yoana

6 Na noona kala Kalondu ayũmbũa ũmwe wa ala mosiĩlo mũonza, na neew’a kĩmwe kya ila syũmbe inya syĩ thayũ kĩineena na wasya ta wa kĩtundumo, kĩyasya: “Ũka!” 2 Na noona, na sisya! mbalasi nzaũ, na ũla wekalĩte ĩũlũ wayo aĩ na ũta; na anengwa ngovia ya ũsumbĩ, na athi asindĩte na kũminũkĩlya ũsindi wake.

3 Yĩla woombũie ũsiĩlo wa kelĩ, neew’a kyũmbe kĩ thayũ kya kelĩ kĩyasya: “Ũka!” 4 Na mbalasi ĩngĩ ya langi mũtune mũno yaumaala, na ũla wekalĩte ĩũlũ wayo anengwa ũkũmũ wa kũvetanga mũuo ĩũlũ wa nthĩ nĩ kana moaane, na anengwa ũvyũ mũnene.

5 Na yĩla woombũie ũsiĩlo wa katatũ, neew’a kyũmbe kĩ thayũ kya katatũ kĩyasya: “Ũka!” Na noona, na sisya! mbalasi nziũ, na ũla wekalĩte ĩũlũ wayo aĩ na kĩthimi kw’okonĩ kwake. 6 Na neew’a kĩndũ ta wasya katĩkatĩ wa ila syũmbe inya syĩ thayũ, ũyasya: “Kĩvava kĩmwe kya nganũ nĩ ndinalĩ ĩmwe * na ivava itatũ sya mbaale nĩ ndinalĩ; na ndũkakiite mauta ma mũthata na mbinyu.”

7 Yĩla woombũie ũsiĩlo wa kana, neew’a wasya wa kyũmbe kĩ thayũ kya kana, ũyasya: “Ũka!” 8 Na noona, na sisya! mbalasi ya langi wa mũu, * na ũla wekalĩte ĩũlũ wayo aĩ na ĩsyĩtwa Kĩkw’ũ. Na Mbũa * yamũatĩĩe o vakuvĩ. Na Mbũa na Kĩkw’ũ syanengwa ũkũmũ ĩũlũ wa kĩlungu kya kana kya nthĩ, syũae na ũvyũ mũasa, na ũnyivu wa lĩu, na ũwau mũthũku mũno, na nyamũ sya kĩthekanĩ sya nthĩ.

9 Yĩla woombũie ũsiĩlo wa katano, noona ungu wa kĩthembeo mathayũ * ma ala mooaĩtwe nũndũ wa ndeto ya Ngai na nũndũ wa ũkũsĩ ũla maumĩtye. 10 Na maneena na wasya mũnene, makyasya: “Mwĩaĩi Mũsumbĩ Mũnene, mũtheu na wa w’o, ũkeesiĩĩa nginya ĩndĩĩ kumya ũsilĩlo na kũĩvanĩsya nthakame yitũ kwa ala matwĩe ĩũlũ wa nthĩ?” 11 Na kĩla ũmwe woo anengwa kanzũ nzaũ, na meewa mambe kũthũmũa o vanini, nginya ũtalo wĩanĩe wa ngombo ila ingĩ na ana-a-asa moo ala maĩ vakuvĩ kũawa o tondũ mo mooaiwe.

12 Na yĩla woombũie ũsiĩlo wa thanthatũ, kweethĩwa kĩthingitho kĩnene kya nthĩ; na syũa yeethĩwa yĩ yiũ ta ĩkunia yĩseũvĩtw’e na w’ĩa mwiũ, * na mwei w’onthe wekala nthakame, 13 na ndata sya matunĩ syavalũka nthĩ o tondũ makũyũ mate meu metĩkaa yĩla mũkũyũ wathingithw’a nĩ kĩseve kĩ na vinya. 14 Na ĩtu yeeveta ta ĩvuku ya kũkũnzwa yĩilingwa, na iĩma syonthe na ithama syonthe syavetwa vandũ vasyo. 15 Namo asumbĩ ma nthĩ, anene, athwii, anene ma ita, andũ me vinya, ngombo syonthe, na onthe ala athasye meevitha ngunganĩ na katĩ wa mavia ma iĩma. 16 Na maendeea kwĩa iĩma na mavia: “Tũvalũkĩlei na mũitũvitha kuma ũthyũnĩ wa Ũla wĩkalĩte kĩvĩlanĩ kya ũsumbĩ, na kuma ũthilĩkunĩ wa kala Kalondu, 17 nũndũ mũthenya mũnene wa ũthilĩku woo nĩwavika, na nũũ ũtonya kũũngama?”