Kũtũngĩlĩĩlwa kwa Mĩao
32 “Ĩthukĩĩsyei, inywʼĩ matu, na nĩngũneena,
Na ekai nthĩ yĩwʼe ndeto sya kanywʼa wakwa.
2 Momanyĩsyo makwa maketĩka ta mbua;
Ndeto syakwa ikalovota ta ĩmwe,
Ta ũnyenyeũ nyekinĩ
Na ta mbua mbingĩ mĩmeanĩ.
3 Nũndũ ngatavanyʼa ĩsyĩtwa ya Yeova.
Ngaweta ĩũlũ wa ũnene wa Ngai witũ!
4 Ĩvia, wĩa wake nĩ mwĩanĩu,
Nũndũ nzĩa syake syonthe syosanĩte na ũsili wa katĩ.
Ngai mũĩkĩĩku ũla ũtesaa kwĩka ũndũ ũte wa ũsili wa katĩ;
We nĩ mũlũngalu na asilaa katĩ.
5 Mo ene nĩmo mekĩte ũthũku.
Mo ti syana syake, ũthũku nĩ woo ene.
Mo nĩ nzyawa ngʼendu na nthyoeku!
6 Yo ũu nĩwʼo mwaĩlĩte kũmwĩka Yeova,
Inywʼĩ andũ atumanu na mate oĩ?
We ti Ĩthe wenyu ũla watumie mwĩthĩwa vo,
Ũla wamũmbie na amũlũlũmĩĩlya vyũ?
7 Lilikanai mĩthenya ya tene;
Sũanĩai myaka ya nzyawa mbĩtu.
Kũlyai aa-ĩthe menyu, na makamũtavya;
Atumĩa menyu, na makamũelesya.
8 Yĩla Ũla wĩ Ĩũlũ wa Onthe wanengie mbaĩ ũtiĩwa wasyo,
Yĩla waanisye ana ma Atamu* mataanĩsya,
Nĩweekĩie mũvaka wa ngo sya andũ
Kwosana na ũtalo wa ana ma Isilaeli.
9 Nũndũ andũ ma Yeova nĩ kĩanda kyake;
Yakovo nĩ ũtiĩwa wake.
10 Amwĩthĩie weũnĩ
Na yalatanĩ yĩte kĩndũ, na yĩũkaya.
Nĩwamũthyũlũlũkile amũseseee, amũthĩnĩkĩa,
Na amũsũvĩa ta kyũma kya itho yake.
11 O tondũ ndiũ ĩthingithangasya ndala yayo,
Ĩkeleela ĩũlũ wa tũswii twayo,
Ĩtambũũkĩtye nthwau syayo, ĩkatwosa,
Ĩkatũkua nthwaunĩ syayo,
12 Yeova e weka nĩwaendeeie kũmũtongoesya;*
Vai ngai ngeni yaĩ vamwe nake.
13 Nĩwatumie esĩla kũndũ kũla kũtũlu kwa nthĩ,
Nĩ kana aye ũsyao wa mũũndanĩ.
Nĩwamũĩthisye ũkĩ wa nzũkĩ kuma ĩvianĩ yĩ ngũka
Na mauta kuma ĩvianĩ yũmũ,
14 Mauta ma ĩia ya ngʼombe na ĩia ya malondu na mbũi,
Vamwe na malondu ala manou vyũ,*
Na ndũũme sya Mbasani, na nthenge,
Vamwe na nganũ ĩla nzeo vyũ;*
Na wanywie mbinyu kuma nthakamenĩ ya* nzavivũ.
15 Yĩla Yesuluni* wanoie, nĩwekisye nthele na ũngʼendu.
Nũnoete, ũkaimba, na ĩvu yaku yĩkaneneva.
Kwoou nĩwamũtiie Ngai, ũla wamũmbie,
Na avũthya Ĩvia ya ũtangĩĩo wake.
16 Nĩmatumie athata mũno nũndũ wa ngai ngeni;
Mamũthatasya na syĩndũ sya kũthatya.
17 Mathembeaa ndaimoni, ĩndĩ ti Ngai,
Ngai ila mateesĩ,
Ngai nzaũ ila mamanyĩte o mĩtũkĩ,
Ngai ila aa-ũmae menyu mateesĩ.
18 Nĩwoolilwe nĩ Ĩvia ũla wakũsyaie,
Na ndwaalilikana Ngai ũla wakũsyaie.
19 Yĩla Yeova woonie ũu, nĩwamaleile
Nũndũ ana make na eĩtu make nĩmamũthatisye.
20 Kwoou asya, ‘Nĩngũmavitha ũthyũ wakwa;
Nĩngwona kĩla kĩũmakwata.
Nũndũ mo nĩ nzyawa yĩkaa maũndũ mathũku,
Ana mate aĩkĩĩku o na vanini.
21 Nĩmatumĩte nĩthata mũno* nũndũ wa ngai sya ũvũngũ;
Nĩmanthatĩtye na mĩvwʼanano yoo ya mana.
Kwoou ngamewʼĩthya kĩwĩu na andũ mataĩle kwĩtwa andũ;
Ngamathatya na mbaĩ ndumanu.
22 Nũndũ ũthatu wakwa nũkwatĩtye mwaki
Ũla ũkavĩvya nginya kũndũ kũla kũliku Mbũanĩ,*
Na ũkavĩvya vyũ nthĩ na ũsyao wayo
Na ũikwatya mĩsingi ya iĩma mwaki.
23 Ngaingĩvya mĩisyo yoo;
Ngamaathanga na maangi makwa nginya mathele.
24 Makonzwʼa nĩ nzaa
Na makaminwa nĩ ũvyũvu mwingĩ na wanangĩko wĩ woo.
Ngatũma nyamũ syĩ maeo maasa imavithũkĩe
Na sumu wa nyamũ ila itambũkaa kĩtoonĩ ta nzoka.
25 Nza, makaminwa nĩ ũvyũ;
Nthĩnĩ, vakeethĩwa wia mwingĩ
Kwondũ wa mwanake na mwĩĩtu ũtesĩ mũndũũme,
Kaũkenge vamwe na mũndũ wĩ na mbuĩ.
26 Nĩthĩwa naisye: “Nĩngũmanyaĩĩkya;
Nĩngũtuma kĩlilikano kyoo kĩthela katĩ wa andũ,”
27 Keka ti kũkĩa ũndũ amaitha mekwĩka,
Nũndũ amaitha no maelewe ũndũ ũsu naĩ.
Nĩmatonya kwasya: “Vinya witũ nũsindĩte;
Ti Yeova weekie maũndũ aa onthe.”
28 Nũndũ mo nĩ mbaĩ ĩtaeleawa,*
Na vai ũmanyi katĩ woo.
29 Ta kethĩwa nĩ oĩ! No masũanĩe mũno ĩũlũ wa ũndũ ũũ.
No masũanĩe ĩũlũ wa kĩla kĩkamakwata.
30 Mũndũ ũmwe atonya ata kũsembanyʼa andũ 1,000,
Na elĩ makatuma andũ 10,000 makĩa?
Ate o Ĩvia yoo ethĩwe amathooetye
Na Yeova akethĩwa amanenganĩte.
31 Nũndũ ĩvia yoo yĩyĩilye Ĩvia yitũ,
O na amaitha maitũ nĩmesĩ ũu.
32 Nũndũ mũsavivũ woo wumĩte mũsavivũnĩ wa Sotomo
Na wumĩte levũnĩ sya Ngomola.
Nzavivũ syoo nĩ nzavivũ sya sumu,
Ikata syoo syĩ ũũ.
33 Mbinyu yoo nĩ sumu wa nzoka,
Sumu mũthũku vyũ wa syĩko.
34 Wʼo ũndũ ũũ ndũiĩtwe kwakwa,
Ũvingĩĩtwe vyũ ĩkũmbĩnĩ yakwa?
35 Ũĩvanĩsyo nĩ wakwa, na ndĩvi,
Ĩvindanĩ yĩla yĩnyuvĩtwe yĩla kũũ kwoo kwĩtiũũka,
Nũndũ mũthenya wa mũisyo woo wĩ vakuvĩ,
Na kĩla kĩmeteelete kĩkooka na mĩtũkĩ.’
36 Nũndũ Yeova akasilĩla andũ make,
Na akeewʼĩa tei* athũkũmi make
Yĩla ũkona kana vinya woo nĩwathela,
Na kana ala matiele no ala athĩni na onzu.
37 Nĩvo ĩndĩ makasya, ‘Ngai syoo syĩ va,
Ĩvia yĩla masembie makevithe nthĩnĩ wayo,
38 Ila syaĩsaa mathunya ma nthembo syoo,*
Syanyusaa mbinyu ya nthembo syoo sya kũnyuwa?
Ekai iũngame na iimũtetheesya.
Ekai itwʼĩke vandũ venyu va kwĩvitha.
39 Sisyai yu kana nyie, nyie ninyie we,
Na vai ngai ingĩ eka nyie.
Nĩnũaaa, na nĩnĩnenganae thayũ.
Nĩnĩũmĩasya, na ngavosya,
Na vai ũmwe ũtonya kũvonokya angĩ kuma kwʼokonĩ kwakwa.
40 Nũndũ nĩũkĩlya kwʼoko kwakwa ĩtunĩ,
Na ndyĩvĩta: “Vate nzika, o tondũ nĩkalaa thayũ tene na tene,”
41 Ethĩwa nĩnanoa ũvyũ wakwa ũũtisatisa
Na ndyũmbanyʼa kwʼoko kwakwa kwondũ wa ũsilĩlo,
Ngaĩvanĩsya amaitha makwa
Na ngaĩva ala mamenaa.
42 Ngatuma maangi makwa mamilwa nĩ nthakame,
Na ũvyũ wakwa ũkaya nyama,
Vamwe na nthakame ya ala oae na ala atave,
Vamwe na mĩtwe ya atongoi ma mũmaitha.’
43 Tanai, inywʼĩ mbaĩ, vamwe na andũ make,
Nũndũ akaĩvanĩsya nthakame ya athũkũmi make,
Na akaetee amaitha make ũĩvanĩsyo
Na akeewʼanĩthya* nthĩ ya andũ make.”
44 Kwoou Mose ooka na atũngĩlĩĩla ndeto syonthe sya wathi ũũ andũ mayĩwʼa, we na Osiea* mwana wa Nuni. 45 Mose amina kũtavya Aisilaeli onthe ndeto ii syonthe, 46 ameie: “Ĩkĩai ngoonĩ ndeto syonthe sya ũkanyʼo wakwa ũla namũnenga ũmũnthĩ, nĩ kana mwĩaĩe ana menyu methĩwe me metho kũatĩĩaa ndeto syonthe sya Mĩao ĩĩ. 47 Nũndũ ndeto ĩĩ ti ya mana kwenyu, ĩndĩ mũkekala thayũ, ethĩwa mũkeewʼa ndeto ĩĩ, na ethĩwa mũkamĩwʼa mũkekala thayũ ĩvinda yĩasa nthĩ ĩla mũkũinga Yolotani mũmĩmesye.”
48 Yeova aneenie na Mose mũthenya o ũsu, ayasya atĩĩ: 49 “Ambata Kĩĩmanĩ kya Avalimu, Kĩĩma kya Nevo, kĩla kĩ nthĩ ya Moavi, kĩla kĩsyaĩtye Yeliko, na ũyĩloela nthĩ ya Kanaanĩ, ĩla ngũnenga Aisilaeli yĩthĩwe yoo. 50 Na ĩndĩ ũkakwʼĩĩa kĩĩmanĩ kĩu ũkilyĩ kwambata, na ũyũmbanwʼa vamwe na andũ maku,* o tondũ Alũni mwana-a-inyia waku wakwʼĩĩe Kĩĩmanĩ kya Olu na oombanwʼa vamwe na andũ make, 51 nũndũ mwĩ elĩ mũyaĩ aĩkĩĩku kwakwa katĩ wa Aisilaeli kĩw’ũnĩ kya Meliva ĩla yĩ Katesi weũnĩ wa Nzini, nĩkwĩthĩwa mũyaanthesya mbee wa andũ ma Isilaeli. 52 Ũkoona nthĩ ĩsu wĩ vaasa, ĩndĩ ndũkalika nthĩ ĩla ngũnenga andũ ma Isilaeli.”