Ĩvuku ya Kelĩ ya Asumbĩ
24 Mĩthenyanĩ ya Yeoiakimu, Mũsumbĩ Nevukatinesa wa Mbavilonĩ nĩwamũvithũkĩie, na Yeoiakimu aendeea kũmũthũkũma kwa ĩvinda ya myaka ĩtatũ. Ĩndĩ nĩwaalyũkile na amũngʼendea. 2 Na ĩndĩ Yeova ambĩĩa kũmũtũmĩa nguthu sya avenani sya Akalitei, Asilia, Amoavi, na Aamimoni. Nĩwaendeeie kũitũma nĩ kana ivithũkĩe Yuta na iimyananga, kwosana na ndeto ĩla Yeova waneenete kwĩsĩla athũkũmi make athani. 3 Vate nzika, maũndũ asu makwatie Yuta kwosana na mwĩao wa Yeova, nĩ kana amavetange kuma ũthyũnĩ wake nũndũ wa naĩ syonthe ila Manase weekie, 4 na nũndũ wa nthakame ĩte ĩvĩtyo ĩla wetĩkĩtye, nĩkwĩthĩwa nĩwausũĩtye Yelusalemu nthakame ĩte ĩvĩtyo na Yeova ndeeyũmbanĩtye kũekea.
5 Na ngewa ĩla ĩngĩ ya Yeoiakimu, maũndũ onthe ala weekie, yo ti mbandĩke ĩvukunĩ ya ngewa ya mavinda ma asumbĩ ma Yuta? 6 Na ĩndĩ Yeoiakimu akwʼa na athikwa vamwe na aa-ũmae make; na mwana wake Yeoiakini atwʼĩka mũsumbĩ vandũ vake.
7 Na mũsumbĩ wa Misili ndaalika ĩngĩ nthĩ yake, nĩkwĩthĩwa mũsumbĩ wa Mbavilonĩ nĩwoosete nthĩ yonthe ya mũsumbĩ wa Misili, kuma Kyandanĩ* kya Misili nginya Ũsĩnĩ wa Euvalati.
8 Yeoiakini aĩ na myaka 18 yĩla watwʼĩkie mũsumbĩ, na asumbĩkie myei ĩtatũ e Yelusalemu. Inyia wake eetawa Neusita na aĩ mwĩĩtu wa Elinathani ũla watwĩe Yelusalemu. 9 Nĩwaendeeie kwĩka kĩla kĩthũku methonĩ ma Yeova, aatĩĩe maũndũ onthe ala ĩthe wake weekaa. 10 Ĩvindanĩ yĩu, athũkũmi ma Mũsumbĩ Nevukatinesa wa Mbavilonĩ nĩmambatie mavithũkĩe Yelusalemu, na mathyũlũlũka ndũa ĩsu. 11 Na Mũsumbĩ Nevukatinesa wa Mbavilonĩ athi ndũanĩ ĩsu ĩvindanĩ yĩu athũkũmi make mamĩthyũlũlũkĩte.
12 Na Mũsumbĩ Yeoiakini wa Yuta aumaala vala ve mũsumbĩ wa Mbavilonĩ, e na inyia wake, na athũkũmi make, anene make me mbee ũsumbĩnĩ, na andũ ala maĩ na ũkũmũ nyũmbanĩ yake; na mũsumbĩ wa Mbavilonĩ amosa ta mũtavo mwakanĩ wa nyanya wa kũsumbĩka kwake. 13 Na ĩndĩ oosa kuma vo ũthwii wʼonthe ũla waĩ nyũmbanĩ ya Yeova na ũthwii ũla waĩ nyũmbanĩ ya mũsumbĩ. Nĩwatilangile mĩio yonthe ya thaavu ĩla Solomoni mũsumbĩ wa Isilaeli waseũvĩtye ĩkalũnĩ ya Yeova. Ũndũ ũsu weanĩie o ũndũ Yeova wathanĩte. 14 Nĩwoosie andũ onthe ma Yelusalemu ta mũtavo, anene onthe me mbee ũsumbĩnĩ, ngũmbaũ syonthe sya kaũ, na mavundi onthe na atwii onthe ma syũma;* oosie andũ 10,000 ta mũtavo. Vai mũndũ waatiwa ate o andũ ala ngya vyũ nthĩ ĩsu. 15 Ũu nĩwʼo woosie Yeoiakini ta mũtavo amũtwaa Mbavilonĩ; nĩwoosie inyia wa mũsumbĩ, iveti sya mũsumbĩ, andũ ala maĩ na ũkũmũ nyũmbanĩ ya mũsumbĩ, na andũ ala maĩ ma ndaĩa nthĩ ĩsu, na amaumya Yelusalemu ta mũtavo amatwaa Mbavilonĩ. 16 O na mũsumbĩ wa Mbavilonĩ nĩwoosie ngũmbaũ syonthe sya kaũ 7,000, o vamwe na mavundi na atwii ma syũma* 1,000 amatwaa Mbavilonĩ ta mũtavo; onthe maĩ ngũmbaũ na maĩ amanyĩsye kaũ. 17 Na ĩndĩ mũsumbĩ wa Mbavilonĩ atwʼĩkĩthya Matania, ũla waĩ mwendwʼa-ĩthe wa Yeoiakini mũsumbĩ vandũ vake, na avĩndũa ĩsyĩtwa yake amwĩta Nzetekia.
18 Nzetekia ai na myaka 21 yĩla watwʼĩkie mũsumbĩ, na asumbĩkie myaka 11 e Yelusalemu. Inyia wake eetawa Amutali na aĩ mwĩĩtu wa Yelemia ũla watwĩe Livina. 19 Nĩwaendeeie kwĩka kĩla kĩthũku methonĩ ma Yeova, aatĩĩe maũndũ onthe ala Yeoiakimu weekie. 20 Yeova eekie maũndũ asu Yelusalemu na Yuta nũndũ wa ũthatu wake, na ameanĩisye nginya amaveta vyũ ũthyũnĩ wake. Na Nzetekia angʼendea mũsumbĩ wa Mbavilonĩ.