Ĩvuku ya Mbee ya Mavinda
22 Nĩvo ĩndĩ Ndaviti waisye atĩĩ: “Ĩĩ nĩyo nyũmba ya Yeova Ngai ũla wa w’o, na kĩĩ nĩ kĩthembeo kya nthembo sya kũvĩvw’a kwondũ wa Aisilaeli.”
2 Na ĩndĩ Ndaviti eeĩaa nĩ kana ekali ma ũeninĩ ala maĩ nthĩ ya Isilaeli mombanwʼe, na amanenga wĩa wa kwasa mavia nĩ kana matile na mayasa mavia ma kwaka nyũmba ya Ngai ũla wa w’o. 3 O na ĩngĩ, Ndaviti nĩwoombanisye kyũma* kingĩ mũno kya kũseũvya mĩsumaa kwondũ wa mĩomo ya mĩvĩa vamwe na syĩndũ sya kũkwatanyʼa syĩndũ, na ũthuku mwingĩ mũno weethĩa ũito wawʼo ndũtonya kũthimĩka, 4 o vamwe na mbwaũ sya mũtalakwe* itatalĩka, nũndũ Asitoni na andũ ma Tile maeteie Ndaviti mbwaũ mbingĩ mũno sya mũtalakwe. 5 Na Ndaviti asya: “Mwanawa Solomoni nĩ mũnini na nde na ũmanyi,* na nyũmba ĩla ĩkwakĩwa Yeova ĩkeethĩwa yĩ nene na yĩ nzeo mũno, nĩ kana nguma yayo na wanake wayo ũmanyĩke nthĩ syonthe. Kwoou, nĩngũmũmbanĩsya syĩndũ sya kũmyaka.” Na Ndaviti oombanyʼa syĩndũ mbingĩ mũno atanamba kũkwʼa.
6 O na ĩngĩ, nĩweetie mwanae Solomoni na amwĩaĩa akĩe Yeova Ngai wa Isilaeli nyũmba. 7 Ndaviti eeie mwanae Solomoni atĩĩ: “Waĩ wendi wa ngoo yakwa kwaka nyũmba kwondũ wa ĩsyĩtwa ya Yeova Ngai wakwa. 8 Ĩndĩ ndeto ya Yeova yambũkĩa, ĩyasya, ‘Nĩwĩtĩte nthakame mbingĩ mũno, na nĩwũkitĩte makaũ maingĩ mũno. Ndwĩaka nyũmba kwondũ wa ĩsyĩtwa yakwa, nĩkwĩthĩwa nĩwĩtĩte nthakame mbingĩ mũno nthĩ mbee wakwa. 9 Sisya! Ũkasyaa mwana ũla ũkethĩwa mũndũũme wa mũuo,* na ngamũnenga ũthũmũo kuma amaithanĩ make onthe ala mamũthyũlũlũkĩte, nũndũ akeetwa Solomoni* na mĩthenyanĩ yake nganenga Aisilaeli mũuo na makekalaa mauĩtye. 10 Nĩwe ũkaka nyũmba kwondũ wa ĩsyĩtwa yakwa. Akatwʼĩka mwana wakwa, nakwa ngeethĩwa ĩthe wake. Ngalũlũmĩĩlya vyũ kĩvĩla kyake kya ũsumbĩ ĩũlũ wa Isilaeli tene na tene.’
11 “Yu, mwanawa, Yeova nĩethĩwe vamwe naku, na aĩla na ũyakĩa Yeova Ngai waku nyũmba, o tondũ ũwetete ĩũlũ waku. 12 Na kũvĩtũka maũndũ onthe, yĩla Yeova ũkaũnenga ũkũmũ ĩũlũ wa Isilaeli akaũnenga ũĩ na ũtonyi wa kũelewa maũndũ, nĩ kana ũkwatae mwĩao wa Yeova Ngai waku. 13 Na ĩndĩ ũkaaĩla ethĩwa ũkaatĩĩa nesa myolooto na motw’ĩo ala Yeova weeaĩe Mose anenge Aisilaeli. Ĩthĩwa na ũkũmbaũ na vinya. Ndũkakĩe kana ũteleme. 14 Sisya nĩnĩtatĩte mũno kũmbanyʼa kwondũ wa nyũmba ya Yeova talendi 100,000* sya thaavu na talendi 1,000,000 sya vetha na ũthuku mwingĩ mũno na kyũma* ũkethĩa ũito wasyo ndũtonya kũthimĩka, na nĩnũmbanĩtye mbwaũ na mavia, ĩndĩ ũkongela syĩndũ isu. 15 Wĩ na athũkũmi aingĩ mũno; andũ ma kwasa mavia, mavundi ma mavia, mavundi ma mbwaũ, na athũkũmi me na ũtũĩka wa mĩthemba yonthe. 16 Thaavu ũla wĩ vo, vetha, ũthuku, na kyũma* iyĩsa kũthimĩka. Ũkĩla ĩndĩ wambĩĩe wĩa, na Yeova nĩethĩwe vamwe naku.”
17 Na ĩndĩ Ndaviti eeaĩa anene onthe ma Isilaeli matetheesye mwanae Solomoni, aimea: 18 “We Yeova Ngai wenyu nde vamwe nenyu, na we ndamũnengete ũthũmũo ngalĩko syonthe? Nĩkwĩthĩwa nĩwanenganie ekali ma ĩ nthĩ mokonĩ makwa, na nthĩ nĩkĩlĩtwʼe vinya mbee wa Yeova na mbee wa andũ make. 19 Yu twʼai na ngoo yenyu yonthe na thayũ* wenyu wʼonthe kũmantha Yeova Ngai wenyu, na ambĩĩai kwakĩa Yeova Ngai ũla wa w’o vandũ vatheu, nĩ kana mũete ĩsandũkũ ya ũtianĩo wa Yeova na mĩio mĩtheu ya Ngai ũla wa w’o nyũmbanĩ ĩla yakĩtwe kwondũ wa ĩsyĩtwa ya Yeova.”