Ĩvuku ya Kelĩ ya Asumbĩ

20 Na mĩthenyanĩ ĩsu Esekia awaa na ũwau wake wamũvinyĩĩa nginya weethĩa aangĩe kũkw’a. Na mwathani Ĩsaĩa mwana wa Amosu athi vala ũĩ na amwĩa, “Ũũ nĩwʼo Yeova ũkwasya: ‘Neena na andũ maku na ũimeaĩa, nĩkwĩthĩwa nũũkw’a; ndwĩvoa.’” 2 Yĩla weewie ũu nĩwathyũũie ũthyũ wake asisya ũkũtanĩ na ambĩĩa kũmũvoya Yeova, ayasya: 3 “Ame Yeova, nĩngũkwĩsũva, mwa lilikana ũndũ nĩthĩĩtwe ndikinyĩla nzĩanĩ yaku na ngoo yakwa yonthe na nĩ mũĩkĩĩku na ũndũ nĩthĩĩtwe ndyĩka kĩla kĩseo methonĩ maku.” Na Esekia ambĩĩa kũĩa mũno.

4 Na Ĩsaĩa atavikĩte kĩwanzanĩ kĩla kĩ katĩkatĩ, ndeto ya Yeova yamũkĩa, na eewa atĩĩ: 5 “Syoka vala ve Esekia, mũtongoi wa andũ makwa, na ũimwĩa atĩĩ: ‘Ũũ nĩwʼo Yeova Ngai wa Ndaviti ũmae waku ũkwasya: “Nĩneewʼa mboya yaku. Na nĩnoona methoi maku. Yu nĩngũũvosya. Mũthenyanĩ wa katatũ ũkambata nyũmbanĩ ya Yeova. 6 Nĩngũkwongela myaka 15 ya kwĩkala thayũ,* na ngaũvonokya we vamwe na ndũa ĩno kuma kwʼokonĩ kwa mũsumbĩ wa Asuli, na ngokitĩa ndũa ĩno kwondũ wakwa mwene na kwondũ wa Ndaviti mũthũkũmi wakwa.”’”

7 Na ĩndĩ Ĩsaĩa asya: “Etei kakũmbwa ka makũyũ momĩthye.” Na kwoou makaete na makombĩĩa mũimũnĩ wake, na ĩtina wa ũu, ambĩĩa kũvoa kavola kwa kavola.

8 Esekia aĩ anakũlya Ĩsaĩa atĩĩ: “Nĩ kyaũ kĩkwonany’a kana Yeova nũkũmbosya na kana mũthenyanĩ wa katatũ ngaambata nyũmbanĩ ya Yeova?” 9 Nĩvo ĩndĩ Ĩsaĩa wamũsũngĩie amwĩa: “Ũũ nĩwʼo wonanyʼo kuma kwa Yeova ũla ũkwonanyʼa kana Yeova nũkwĩanĩsya ndeto ĩla ũneenete: Wĩenda kyuu kĩla kĩ ngasinĩ* kĩthi mbee matambya ĩkũmi kana wĩenda kĩsyoke ĩtina matambya ĩkũmi?” 10 Na Esekia asũngĩa asya: “Nĩ ũndũ wĩ laisi kyuu kĩthi mbee matambya ĩkũmi ĩndĩ ti laisi kĩsyoke ĩtina matambya ĩkũmi.” 11 Na kwoou mwathani Ĩsaĩa amwĩkaĩla Yeova, na Ngai atuma kyuu kĩla kyaĩ ngasinĩ ya Aasu kĩsyoka na ĩtina matambya ĩkũmi ĩtina wa kwĩthĩwa kĩĩ kĩnatheea ngasinĩ ĩsu.

12 Ĩvindanĩ yĩu mũsumbĩ wa Mbavilonĩ, Mbelotaki-mbalatani mwana wa Mbalatani, nĩwatũmanie valũa na mũthĩnzĩo itwaĩwe Esekia, nĩkwĩthĩwa nĩweewʼĩte kana Esekia aĩ mũwau. 13 Esekia nĩwamathokisye* na amonyʼa nyũmba yonthe ĩla waiĩte ũthwii wake; nĩwamonisye vetha, thaavu, mauta ma seli na mauta angĩ ma vata, o vamwe na vala waiaa mĩio yake ya kaũ na kyonthe kĩla kyaĩ kĩtonya kwoneka kũla waiaa ũthwii wake. Vai kĩndũ o na kĩmwe Esekia ũtaamonyʼa nyũmbanĩ yake mwene na ũsumbĩnĩ wake wʼonthe.

14 Ĩtina wa ũu, mwathani Ĩsaĩa nĩwalikile vala ve Mũsumbĩ Esekia na amũkũlya: “Aũme asu meaasya ata, na meeumĩte va?” Nake Esekia amũsũngĩa, amwĩa: “Meeumĩte nthĩ ya kũasa, kuma Mbavilonĩ.” 15 Na ĩndĩ amũkũlya: “Nĩ kyaũ moona nyũmbanĩ yaku?” Na Esekia amũsũngĩa, amwĩa: “Nĩmoona kyonthe kĩla kĩ nyũmbanĩ yakwa. Vai kĩndũ o na kĩmwe kĩ kũla nĩiaa ũthwii wakwa ndanamonyʼa.”

16 Nĩvo ĩndĩ Ĩsaĩa wamwĩie Esekia: “Ĩthukĩĩsye ndeto ya Yeova, 17 ‘Sisya! Mĩthenya nĩyũkĩte, yĩla kyonthe kĩla kĩ nyũmbanĩ yaku na kyonthe kĩla aa-ũmae maku mombanĩtye kũvika ũmũnthĩ kĩkakuwa kĩtwawe Mbavilonĩ. Vai kĩndũ o na kĩmwe kĩkatiwa,’ easya ũu Yeova. 18 ‘Na nzyawa imwe syaku mwene ikooswa na iitwawa ikatwʼĩkĩthwʼe andũ me na ũkũmũ nyũmbanĩ ya mũsumbĩ wa Mbavilonĩ.’”

19 Nĩvo ĩndĩ Esekia wamwĩie Ĩsaĩa: “Ndeto ya Yeova ĩla waneena nĩ nzeo.” Na ĩndĩ ongela kwasya: “Nũseo ethĩwa ĩvindanĩ yĩla ngwĩthĩwa thayũ* kwĩĩkala kwĩ mũuo na kũuĩtye.”*

20 Na ngewa ĩla ĩngĩ ya Esekia, vinya wake wʼonthe na ũndũ waseũvisye ĩla ndia na ũla mũtaũ na ũndũ walikilye kĩwʼũ ndũanĩ, yo ti mbandĩke ĩvukunĩ ya ngewa ya mavinda ma asumbĩ ma Yuta? 21 Na ĩndĩ Esekia akwʼa na athikwa vamwe na aa-ũmae make; na mwana wake Manase atwʼĩka mũsumbĩ vandũ vake.