8 Ngelekanyʼo

ŨU NĨ KWASYA ATA?

Asyai ala mekĩĩaa syana syoo ngelekanyʼo mekaa kwosana na ũndũ meũimanyĩsya. Kwa ngelekanyʼo, nĩ vinya mũno kwa mwana waku kũneena ũla wʼo ethĩwa ve ĩvinda wakwĩwie ũyasya, “Mũtavye ndikwʼo,” nũndũ ve mũndũ wamũthokeie, na ndwendaa kũneena nake.

“Andũ nĩmakothaa kwasya, ‘Ĩka ũndũ ngũũtavya na ũieka kũsisya ũndũ ngwĩka.’ Ĩndĩ kĩu kĩyĩsa kũtethya syana syaku. Syana nikwatasya maũndũ onthe ala tũũweta na ala tũkwĩka, na no itũtavye ethĩwa ithyĩ twĩ asyai nĩtwĩkaa kwosana na kĩla tũimanyĩasya.”—David.

MWOLOOTO WĨ MBIVILIANĨ: “We ũũtavanyʼa, ũkyasya, “Ndũkoye,” we nĩwũyaa?”—Alomi 2:21.

NĨKĨ NĨ ŨNDŨ WA VATA?

Syana o vamwe na andũ ma mũika, onthe maatĩĩaa mũno ngelekanyʼo ya asyai kwĩ ya mũndũ ũngĩ o na wĩva. Ũu wĩonanyʼa kana no uwʼe ũtonya kũtongoesya syana syaku nesa vyũ. Ĩndĩ ũu ũkatonyeka ethĩwa ũkekaa maũndũ ala ũkũimanyĩsya.

“No tũsyokeleele ũndũ ũmwe mavinda ĩana na ũkethĩa twĩona syana sitũ ta itakwetye ũu. Ĩndĩ mũthenya ũla tũkeka kĩvathũkanyʼo na ũndũ tũitavasya, iikaema kũweta. Syana syĩthĩawa isyaĩĩsye maũndũ onthe ala tũkwĩka o na yĩla tũũsũanĩa ta itakwetye ũu.”—Nicole.

MWOLOOTO WĨ MBIVILIANĨ: “Ũĩ ũla wumaa ĩũlũ . . . ndwĩ wanganganyʼa.”—Yakovo 3:17.

ŨNDŨ ŨTONYA KWĨKA

Ĩyĩosye ũndũ we mwene wĩkalaa. Nĩ syĩndũ ta syĩva sya kwĩtanĩthya we mwene wĩloelaa? We wĩkalanasya ata na ũla ũtwaanĩte nake na syana syaku? Anyanya maku methĩawa mailyĩ ata? Nũsũanĩaa andũ ala angĩ? Kwa ũkuvĩ, we ũilyĩ ũndũ ũkwenda syana syaku syĩĩthĩwa siilyĩ?

“Nĩ na mũemewa tũithĩngʼĩĩasya syana sitũ syĩkale kwosana na myolooto ithyĩ ene tũtamĩatĩĩaa.”—Christine.

Ĩtya ũekeo yĩla wavĩtya. Syana syaku nĩsyĩthĩawa syĩsĩ kana nũvĩtasya. Ĩndĩ yĩla wavĩtĩsya ũla ũtwaanĩte nake kana syana syaku na ũyasya “Nĩ vole,” wĩthĩawa wamanyĩsya syana syaku ĩsomo ya vata mũno ĩũlũ wa kũneena ũla wʼo na kwĩthĩwa na wĩnyivyo.

“Syana sitũ nĩsyaĩle kwĩwʼa tũyĩtĩkĩla mavĩtyo maitũ na kwĩtya ũekeo. Twaema kwĩka ũu, o nasyo iiketĩkĩlaa yĩla syavĩtya.”—Robin.