ĨSOMO YA 13

Ũndũ Ndĩni sya Ũvũngũ Syanangĩaa Ngai Ĩsyĩtwa

Yĩla yĩ na Movano

Ethĩwa Ngai nĩ wendo, nĩkĩ kwĩ maũndũ maingĩ mathũku mekĩtwe nĩ ndĩni ila syĩyĩtanĩasya nake? Kwa ũkuvĩ, ndĩni isu nĩ sya ũvũngũ nũndũ momanyĩsyo moo na meko moo, manangĩaa Ngai ĩsyĩtwa. Mamwanangĩĩte Ngai ĩsyĩtwa kwa nzĩa syĩva? We Ngai ewʼaa ata ĩũlũ wa ũndũ ũsu? Na akoosa ĩtambya yĩva?

**1. Ndĩni sya ũvũngũ syanangĩĩte Ngai ĩsyĩtwa ata kwĩsĩla momanyĩsyo masyo?**

Ndĩni sya ũvũngũ ‘nikũanĩtye ũwʼo wa Ngai na ũvũngũ.’ (Alomi 1:25) Kwa ngelekanyʼo, ndĩni mbingĩ iimanyĩasya aatĩĩi moo ĩsyĩtwa ya Ngai. Ĩndĩ o na vailye ũu, Mbivilia yaasyaa kana no nginya tũtũmĩe ĩsyĩtwa ya Ngai. (Alomi 10:13, 14) Namo atongoi angĩ ma ndĩni mamanyĩasya kana yĩla ũndũ mũthũku weekĩka, nĩ kwenda kwa Ngai. Ũsu nĩ ũvũngũ mũthei. Ngai tiwe ũtumaa maũndũ mathũku mekĩka. (Soma Yakovo 1:13.) Ĩndĩ ũndũ wa kũmakya nĩ kana, ũvũngũ ũla ndĩni imanyĩasya nũtumĩte andũ matamwenda Ngai.

**2. Ndĩni sya ũvũngũ syanangĩĩte Ngai ĩsyĩtwa ata kwĩsĩla meko masyo?**

Ndĩni sya ũvũngũ iikuaa andũ nesa ũndũ Yeova ũmakuaa. Mbivilia yaasyaa kana naĩ sya ndĩni sya ũvũngũ, “nĩsingĩvĩte nginya ikavika ĩtunĩ.” (Ũvuanyʼo 18:5) Kwa myaka mingĩ ndĩni nĩsyĩthĩĩtwe iyĩlikya siasanĩ, ikakwata mbau kaũ, na ikatuma andũ aingĩ makwʼa. Atongoi amwe ma ndĩni mendaa kwĩthĩwa me athwii mũno, na nũndũ wa ũu maithingʼĩĩsya aatĩĩi moo mamanenge mbesa. Kĩu kĩonanyʼa kana maimwĩsĩ Ngai o na vanini, na kwoou mayaĩlĩte kwĩtanĩwʼa na ĩsyĩtwa yake.—Soma 1 Yoana 4:8.

3. Ngai onaa ndĩni sya ũvũngũ ata?

Ethĩwa maũndũ ala ndĩni sya ũvũngũ syĩkaa nĩmatumaa we wĩwʼa woo, wĩona Yeova ta wĩwʼaa ata? Yeova nĩwendete andũ, ĩndĩ nĩwĩwʼĩthawʼa woo mũno nĩ atongoi ma ndĩni ala mamwanangĩaa ĩsyĩtwa, na matũmĩaa aatĩĩi moo naĩ. Nũwetete kana akaananga ndĩni sya ũvũngũ, na ‘iikoneka ĩngĩ nongi.’ (Ũvuanyʼo 18:21) O mĩtũkĩ Ngai nũkwananga ndĩni syonthe sya ũvũngũ.—Ũvuanyʼo 18:8.

ĨMANYĨSYE MŨNANGO

Ĩmanyĩsye ũmanye ũndũ Ngai wĩwʼaa ĩũlũ wa ndĩni sya ũvũngũ. O na ĩngĩ ĩmanyĩsye wone maũndũ ala syĩkĩte, na nĩkĩ kĩu kĩtaĩle kũũsiĩĩa ũiendeea kũmũmanya Yeova mũnango.

4. Ngai ndetĩkĩlaa ndĩni syonthe

Andũ aingĩ maĩkĩĩaa kana ndĩni nĩ ta nzĩa syĩ kĩvathũkanyʼo ila syelekelye andũ kũla kwĩ Ngai. Ĩndĩ ũu nĩwʼo? Somai Mathayo 7:13, 14, na ĩndĩ mũineenea ĩkũlyo yĩĩ:

Mbivilia yĩeleetye ata ĩũlũ wa nzĩa ĩla ĩelete thayũnĩ?

Ĩloelei VITIO, na ĩndĩ mũineenea ĩkũlyo yĩla yĩatĩĩe.

VITIO: We Ngai Nĩwĩtĩkĩlaa Mĩthemba Yonthe ya Ũthaithi?—Kalungu ka Vitio (3:22)

Yo Mbivilia ĩmanyĩasya kana ve ndĩni mbingĩ ila imwendeeasya Ngai?

5. Ndĩni sya ũvũngũ iyonanasya wendo ta Ngai

Ndĩni nĩsyanangĩĩte Ngai ĩsyĩtwa kwa nzĩa mbingĩ syĩ kĩvathũkanyʼo. Na ũndũ ũmwe mũthũku syĩkĩte nĩ kwĩlikya kaũnĩ. Nĩ kana wone ngelekanyʼo ĩmwe, ĩloelei VITIO. Na ĩndĩ mũineenea makũlyo ala maatĩĩe.

VITIO: Ũndũ Makanisa Makwatie Mbau Kaũnĩ wa Kelĩ wa Nthĩ Yonthe (2:22)

Makanisa maingĩ meekie ata Kaũnĩ wa Kelĩ wa Nthĩ Yonthe?
Woni waku nĩ mwaũ ĩũlũ wa kĩla makanisa meekie?

Somai Yoana 13:34, 35 na 17:16. Na ĩndĩ mũineenea makũlyo aa:

Wĩona Yeova ta wĩwʼaa ata yĩla ndĩni syeelikya kaũnĩ?
Ndĩni sya ũvũngũ nitumĩte maũndũ maingĩ mathũku mekĩka. Nĩ kwa nzĩa syĩva wĩyoneete ndĩni ite kwonanyʼa wendo ta Ngai?

Visa: Ĩkanisa na nyũmba ĩngĩ ya ũthaithi ya ndĩni, ithyũlũlũkĩtwe nĩ maũndũ monanĩtye ũndũ ndĩni sya ũvũngũ syĩthĩĩtwe iikwata kaũ mbau. 1. Maũmbano moo. 2. Kaũ wa Mbee wa Nthĩ Yonthe. 3. Mũthembi wa Ĩkanisa ya Orthodox aiathima mũsikalĩ wa ita. 4. Pastor wa nthĩ sya Africa ayĩkĩa andũ vinya mokitĩe mbaĩ yoo. 5. Asikalĩ ma ita ma Japan maithaitha mũsumbĩ. — Ndĩni sya ũvũngũ iyonanasya wendo ta Ngai

6. Ngai endaa kũtetheesya andũ maume ndĩninĩ sya ũvũngũ

Somai Ũvuanyʼo 18:4,a na ĩndĩ mũineenea ĩkũlyo yĩĩ:

Kũmanya kana Ngai nĩwendaa kũtetheesya andũ maume ndĩninĩ sya ũvũngũ kwatuma wĩwʼa ata?

7. Endeea kwĩmanyĩsya ĩũlũ wa Ngai ũla wa wʼo

Yo momanyĩsyo na meko ma ndĩni sya ũvũngũ nĩmaĩle kũtuma ũmwona Ngai ũndũ vataĩle? Kwasũanĩa mwanake wa mũika ũkũleana na ũtao mũseo ũla ũkũnengwa nĩ ĩthe wake. Na ĩndĩ mwanake ũsu ayuma mũsyĩ, na ayĩlikya mwĩkalĩlenĩ mũthũku. Ĩndĩ ĩthe ailea kwĩtĩkĩlana na mwĩkalĩle ũsu o na vanini. Nĩkĩ nĩ ũndũ ũtosanĩte na kĩlĩko kũtũla ĩthe wa mwanake ũsu mũtĩ nũndũ wa maũndũ mathũku ala mwanae ũendeee kwĩka?

Wĩthĩwa wĩ ũndũ wosanĩte na kĩlĩko kũmũtũla Yeova mũtĩ na kũeka kwĩmanyĩsya ĩũlũ wake nũndũ wa meko mathũku ma ndĩni sya ũvũngũ?

ANDŨ AMWE MAASYA: “Ndũkandavye ĩũlũ wa ndĩni, nũndũ ndĩni syonthe syusĩe ũseleke.”

We ũu nĩwʼo wĩwʼaa?
Nĩkĩ meko ma ndĩni sya ũvũngũ mataĩle kũtuma tũmwona Yeova naĩ?

KĨLA TWEEMANYĨSYA

Ndĩni sya ũvũngũ nimwanangĩĩte Ngai ĩsyĩtwa kwĩsĩla momanyĩsyo masyo ma ũvũngũ, na meko masyo. Ĩndĩ Ngai nũvangĩte kũsyananga.

Makũlyo ma Kũsyokeleela

We wĩwʼaa ata wasũanĩa kĩla ndĩni sya ũvũngũ imanyĩasya, na meko masyo?
Yeova onaa ndĩni sya ũvũngũ ata?
Ngai akeekana ata na ndĩni sya ũvũngũ?

Namina ĩsomo yĩĩ matukũ:

Ũndũ wa Kwĩka

Ũmbanonĩ wa kĩkundi ũla ũatĩĩe, wĩkũlya mwana-a-asa kana mwĩĩtu-a-asa ũmwe kĩla kyatumie atwʼĩka Ngũsĩ ya Yeova.

Maũndũ angĩ:

Maũndũ angĩ

MAŨNDŨ ANGĨ MA KWĨMANYĨSYA

Ĩmanyĩsye wone maũndũ elĩ ndĩni mbingĩ syĩkaa ala mamũthatasya Ngai.

“Ndĩni Syonthe Nivwʼanene? Nĩ Syonthe Itumaa Andũ Mamũthengeea Ngai?” (Ũvoo wĩ kĩsesenĩ)

Nĩkĩ Yeova wendaa tũmũthaithe twĩ vamwe na ala angĩ?

“No Nginya Mũndũ Ethĩwe E wa Ndĩni Na?” (Ũvoo wĩ kĩsesenĩ)

Ve mũthembi ũmwe wathatawʼa nĩ ndĩni yake. Ĩndĩ kĩu kĩyaamũsiĩĩa ayĩmanyĩsya ũwʼo ĩũlũ wa Ngai.

“Kĩla Kyatumie Mũthembi Atia Ndĩni Yake” (Amkeni!, Mwei wa 2, 2015)

Kwa ĩvinda ya myaka mingĩ, ndĩni nimanyĩĩtye ũvũngũ ĩũlũ wa Ngai, ũla ũtumĩte andũ maĩkĩĩa kana Ngai ndatũthĩnĩkĩaa na nde tei. Ĩmanyĩsye ũwʼo ĩũlũ wa maũndũ atatũ katĩ wa asu.

“Ũvũngũ Ũla Ũtumaa Andũ Matamwenda Ngai” (Mũsyaĩĩsya, Ĩtukũ 1, Mwei wa 11, 2013)

a Wenda kũmanya nĩkĩ ĩvuku ya Ũvuanyʼo yĩeleetye ndĩni ya ũvũngũ ta mũndũ mũka, ũla wĩtĩtwe Mbaviloni Ĩla Nene, sisya Maelesyo ma Mũthya Namba 1.