Nĩtwaĩle Kũvoya Atheu?

NŨŨ katĩ witũ ũtaaĩmakĩa na akewʼa ayenda kũtavya mũndũ thĩna wake nĩ kana amũtethye? Twamanya kĩla kĩũtuma twĩmakĩa, nĩvatonyeka tũkenda kũmantha mũnyanya wĩ tei na wakwatiwe nĩ thĩna ũla ũũtũmakya. Mũndũ wĩ tei na waakwatwa nĩ mathĩna ta maitũ ethĩawa e mũnyanya mũseo ki.

Amwe methĩawa na woni ta ũsu ĩla menda kũvoya. Mewʼaa ve vinya kũneena na Ngai ĩmwe kwa ĩmwe nũndũ monaa e mũnene mũno na e wa ũkĩwa, na kwoou maitwʼa kũneena na atheu. Mesilasya atheu nĩmatonya kũmewʼĩa tei mũno kwĩ Ngai nũndũ mo nĩmakwatiwe nĩ mathĩna ala makwataa andũ. Kwa ngelekanyʼo, ĩla andũ amwe maasya syĩndũ sya vata, monaa nũseo makavoya “Mũtheu” Anthony wa Padua, nũndũ nĩwe wĩsĩkĩe kwa kũkwatya syĩndũ ila mbau na ila syangʼewa. Namo angĩ ĩla me na nyamũ ndwau monaa nũseo makavoya “Mũtheu” Francis wa Assisi, kana ethĩwa makwʼĩte ngoo vyũ mavoyaa “Mũtheu” Jude Thaddeus.

Ĩndĩ ĩkũlyo nĩ, tũtonya kũmanya ata ethĩwa kũvoya atheu nĩkwosanĩte na Maandĩko? Na nũndũ ĩla tũũvoya twĩthĩawa tũineena na Ngai, no nginya twende kũmanya ũndũ ũũ: Mboya sitũ nimũvikĩaa? O na ĩngĩ no twende kwĩkũlya atĩĩ: Ngai atwonaa ata ĩla tũũvoya atheu?

WONI WA MBIVILIA ĨŨLŨ WA KŨVOYA ATHEU

Kĩmanyĩo kya kũvoya atheu kyumanĩte na ũmanyĩsyo wa Kanisa wa Katholeki wa kana atheu nĩmesũvanĩaa andũ kũla kwĩ Ngai. Kwosana na ĩvuku yĩtawa New Catholic Encyclopedia, kĩeleelo kya kwĩka ũu nĩ “kwĩsũva Ngai akwĩwʼĩe tei ũtũmĩĩte mũndũ wĩtĩkĩlĩtwʼe nĩwe.” Kwoou, ala mavoyaa atheu maĩkĩĩaa kana makakwata kĩla mekwenda nũndũ atheu nĩ andũ aathime nĩ Ngai.

Yo Mbivilia nĩyĩtĩkĩlanĩte na ũmanyĩsyo ũsu? Amwe maasya kana mavuku ala mũtũmwa Vaulo waandĩkie monanĩtye nĩwĩtĩkĩlanĩte na kũvoya atheu. Kwa ngelekanyʼo, aandĩkĩe Aklĩsto ma Lomi ũũ: “Ĩndĩ nĩmwĩsũva mũno, ana-a-asa, kwondũ wa Mwĩaĩi waitũ Yesũ Klĩsto, na kwondũ wa wendo wa ũla [veva], kana mwĩthingʼĩĩsye vamwe nakwa mboyanĩ syenyu kwa Ngai kwondũ wakwa.” (Alomi 15:30) We Vaulo akũlasya Aklĩsto ala angĩ methĩwe ewʼanĩthya make kwa Ngai? Aiee, vaitonyeka. Keka nũu, Aklĩsto asu angĩ nĩmo makũlya Vaulo ethĩwe mwĩwʼanĩthya woo kwa Ngai nũndũ we aĩ mũtũmwa wa Klĩsto. Kĩla Vaulo wendaa kũweta nĩ kana ti ũthũku kũkũlya Mũklĩsto ũngĩ atũvoyee. Ĩndĩ kwĩka ũu kwĩ kĩvathũkanyʼo vyũ na kũvoya mũndũ ũngĩ wonaa e ĩtunĩ ũmũkũlĩtye akwĩsũvanĩe kwĩ Ngai. Nĩkĩ tũkwasya ũu?

Yesũ aisye ũũ nthĩnĩ wa ĩvuku yĩla yaandĩkiwe nĩ mũtũmwa Yoana: “Nyie ninyie nzĩa, na ninyie wʼo, na ninyie thayũ: vai mũndũ wũkaa kwa Asa, atesĩle kwakwa.” (Yoana 14:6) Asyokie asya: ‘Asa akamũnenga kyonthe kĩla mwamũvoya ĩsyĩtwanĩ yakwa.’ (Yoana 15:16, The Holy Bible in Current Kikamba Language) Yesũ ndaatwĩa twambe kũmũvoya nĩ kana ĩndĩ amũtavye Ngai kĩla twamũtavya. Vandũ va ũu, nĩ kana mboya sitũ syĩwʼĩke, twaĩlĩte kũmũvoya Ngai kwĩsĩla vala ve Yesũ, ĩndĩ ti kwĩsĩla mũndũ ũngĩ o na wĩva.

Ĩla amanyĩwʼa ma Yesũ mamũkũlilye amamanyĩsye kũvoya, Yesũ amasũngĩie aimea: “Mũkĩvoya aasyai atĩĩ, Asa, syĩtwa yaku yĩtaĩwe.” (Luka 11:2) Kwoou ‘tũkĩvoya,’ na ũu nĩkwasya kĩla ĩvinda twatwʼa kũvoya, twaĩle kũneenaa na Ngai ĩmwe kwa ĩmwe, ĩndĩ ti Yesũ kana mũndũ ũngĩ o na wĩva. Yu kwosana na maũndũ asu Yesũ wamanyĩisye matakananĩwʼa-ĩ, tyo twasye vyũ kana twaĩlĩte kũmũvoya Ngai kwĩsĩla Yesũ Klĩsto, ĩndĩ ti kwĩsĩla kwa mwĩwʼanĩthya ũngĩ kana “atheu”?

Mboya nĩ kĩlungu kya vata mũno ũthaithinĩ witũ, na Mbivilia ĩmanyĩasya kana tũyaĩle kũthaitha mũndũ ũngĩ ate o Ngai. (Yoana 4:23, 24; Ũvuanʼyo 19:9, 10) Kyu nĩkyo kĩtumi twaĩle kũvoya Ngai e weka.

WE NĨWAĨLE KŨKĨA KŨNEENA NA NGAI?

Nthĩnĩ wa ũla Ũtavanyʼa wa Yesũ wa Kĩĩmanĩ, nĩwaumisye ngelekanyʼo ya mwana ayĩtya ĩthe-ake kya ũya. We ĩthe wa mwana ũsu no amũnenge ĩvia vandũ va kĩmũtũ? Kana akamũne nzoka vandũ va ĩkũyũ? (Mathayo 7:9, 10) Vai mũsyai wĩ wendo ũtonya kwĩka ũu!

Kwasũanĩa ngelekanyʼo ĩĩ ĩngĩ ĩvwʼana ta ĩsu. Twasye wĩ mũsyaĩ, na ve kĩndũ mwana waku ũkwenda ũkwĩtya mũno. Nũtatĩte ũndũ ũtonya wĩthĩwe wĩ na ũnyanya na mwanau. Ĩndĩ vandũ va kũneena naku, aitũma mũndũ ũngĩ aũtavye vata wake nũndũ aĩ nũkũkĩa ũndũ we ũtonya kwĩka aũtavya. We wĩwʼa ata? Nata akaendeea kũtũmaa mũndũ ũsu aũtavye mavata make na ũyĩthĩa ndekwonanyʼa ta ũkaeka kwĩka ũu? Kĩndũ kyu no kĩũtanĩthye? Vaitonyeka! Asyai ala mendete syana syoo mendaa ineene namo iteũmakĩa na iimetya kĩla syĩkwenda.

Ayĩelesya kĩtumi kya ĩla ngelekanyʼo ya mwana ayĩtya ĩthe kya ũya, Yesũ eeie ĩkomano ũũ: “Ethĩwa inywʼĩ ĩndĩ, ala mwĩ athũku, nĩmwĩsĩ kũnenga syana syenyu mĩthĩnzĩo mĩseo, ti mbee mũno Ĩthe wenyu ũla wĩ ĩtunĩ kũmanenga syĩndũ nzeo ala mamwĩtasya?” (Mathayo 7:11) Vai nzika kana mũsyaĩ nĩwĩthĩawa na wendi mwingĩ wa kũnenga mwana wake syĩndũ ila nzeo. Ĩndĩ wendi wa Ĩthe witũ wa ĩtunĩ wa kwĩwʼa na kũsũngĩa mboya sitũ nĩwʼo mwingĩ mũno kũthonoka wendi ũsu wa mũsyai.

Ngai endaa tũmũvoye ne we mwene o na ethĩwa twĩĩwʼa tũemeewe nĩ naĩ sitũ. Ndanengete mũndũ ũngĩ kĩanda kya kwĩthukĩĩsya mboya sitũ. Mbivilia ĩtwĩkĩĩte vinya kwa kũtwĩa atĩĩ: “Mwaũĩe Yeova mũio waku, nake akakũtwʼĩĩka.” (Savuli 55:22) Vandũ va kwĩkwatya mũndũ ũngĩ kana atheu matwĩsũvanĩe kũla kwĩ Ngai, twaĩle kwĩkĩa kĩthito tũmũmanye Yeova Ngai nesa nĩ kana tũikamũkĩe mana.

Ĩthe witu wa ĩtunĩ nũthĩnĩkĩaa kĩla ũmwe witũ. Nĩwendete kũtũtetheesya ĩla twĩ na mathĩna na nũtũthoketye tũmũthengee. (Yakovo 4:8) Nĩ ũndũ wa kũtanĩthya ta kĩ kũmanya kana nĩtũtonya kũneena na Ngai witũ na Ĩthe witũ, “ũla wĩwʼaa mboya”!—Savuli 65:2.