MBIVILIA ĨMANYĨASYA ATA?

Kwĩthĩawa ata ĩla mũndũ wakwʼa?

ANDŨ AMWE MAĨKĨĨAA kana mũndũ akwʼa aendeeaa kwĩthĩwa thayũ e kyũmbe kĩngĩ, namo angĩ maasyaa kana kĩkwʼũ nĩkyo mũthya wa kĩla kĩndũ. We ũĩkĩĩaa ata?

ŨNDŨ MBIVILIA YAASYA

Mbivilia yaĩtye atĩĩ: “Akwʼũ matyĩsĩ ũndũ o na wĩva.” (Mũtavanʼya 9:5) Ĩla mũndũ wakwʼa ndethĩawa thayũ.

NĨ ŨNDŨ ŨNGĨ MWAŨ TŨKWĨMANYĨSYA KUMA MBIVILIANĨ?

• Mũndũ wa mbee, Atamu, asyokie ĩngĩ kĩtoonĩ ĩla wakwie. (Mwambĩlĩlyo 2:7; 3:19) O ta ũu, andũ onthe ala makusaa masyokaa ĩngĩ kĩtoonĩ.—Mũtavanʼya 3:19, 20.

• Andũ ala makwʼa maitalĩlawa naĩ syoo. (Alomi 6:7) Mũndũ akwʼa ndaendeaa kũthĩnwʼa nũndũ wa naĩ ila weekie.

Andũ ala makwie no methĩwe thayũ ĩngĩ?

WE ŨTONYA KŨSŨNGĨA ATA . . .

• Ĩĩ

• Aiee

• Kana nĩvatonyeka

ŨNDŨ MBIVILIA YAASYA

“Kũkeethĩwa ũthayũũkyo.”—Meko ma Atũmwa 24:15.

NĨ ŨNDŨ ŨNGĨ MWAŨ TŨTONYA KWĨMANYĨSYA KUMA MBIVILIANĨ?

• Mbivilia ĩelekanasya kĩkwʼũ na too. (Yoana 11:11-14) Ngai akaamũkya ala akwʼũ o tondũ tũamũkasya mũndũ ũkomete.—Yovu 14:13-15.

• Mbivilia nĩeleetye ĩũlũ wa andũ meana ũndũ mũna mathayũũkiwʼe na ũndũ ũsu nũtũĩkĩĩthasya vyũ kana ala makwie makathayũũkwʼa.—1 Asumbĩ 17:17-24; Luka 7:11-17; Yoana 11:39-44.