Kũmũmanya Ngai Kũtonya Kũũtethya Ata?

Ilungunĩ ila syavĩta, nĩtweemanyĩsya maũndũ maingĩ matonya kũtũtetheesya kũsũngĩa ĩkũlyo yĩĩ, ‘We Ngai nũũ?’ Nĩtwonie Mbivilianĩ kana ĩsyĩtwa ya Ngai nĩ Yeova na kana ndaĩa yake ĩla nene nĩ wendo. O na nĩtwonie maũndũ ala wĩkĩte na ala weteele kwĩka ĩvinda yũkĩte kwondũ wa andũ onthe. O na kau ve maũndũ maingĩ twaĩle kwĩmanyĩsya ĩũlũ wa Ngai, no twende kũmanya tũkatetheka ata twamũmanya nesa.

Yeova athanĩte kana ethĩwa “ũkamũmantha, akooneka.” (1 Mavinda 28:9) Kwasũanĩa mũthĩnzĩo wa mwanya ũla ũkakwata wamũmantha Ngai na wamũmanya, nawʼo nĩ kwĩthĩwa wĩ “ndũũ” nake! (Savuli 25:14, The Holy Bible in Current Kikamba Language) Ũkatetheka ata weethĩwa mũnyanya wa Ngai?

Ũkakwata ũtanu wa wʼo. Mbivilia ĩmũeleasya Yeova ta “Ngai mũtanu.” (1 Timotheo 1:11) Kwĩthĩwa na ngwatanĩo ya vakuvĩ vamwe nake na kũatĩĩa nzĩa syake kũkatuma wĩthĩwa na ũtanu wa wʼo, na ũu no ũkũtetheesye kwĩvathana na mathĩna ma ngoonĩ, ma kĩlĩko, na mathĩna angĩ maingĩ. (Savuli 33:12) O na ĩngĩ, ũkeethĩwa na ũtanu wa wʼo weevathana na mwĩkalĩle mũthũku, weeka maũndũ matonya kũũtethya, na wekalanyʼa nesa na andũ ala angĩ. Weeka ũu, ũkeetĩkĩlana na ndeto sya mũandĩki wa savuli ũla waisye atĩĩ: “Nĩ ũseo kwakwa kũthengeea Ngai.”​—Savuli 73:28.

Ngai akaũsũvĩaa na kũũthĩnĩkĩa. Yeova atavĩtye athũkũmi make atĩĩ: “Ngakũtaa itho yakwa yĩkũketeee.” (Savuli 32:8) Ndeto isu syonanasya kana Yeova nũthĩnĩkĩaa kĩla ũmwe wa athũkũmi make na nĩwĩanĩasya vata wa kĩla ũmwe woo. (Savuli 139:1, 2) Weethĩwa na ngwatanĩo nzeo na Yeova, ũkamanya kana ethĩawa eyumĩtye kũũtetheesya kĩla ĩvinda.

Ũkeethĩwa na ĩvinda yũkĩte ĩseo. O vamwe na kũũtetheesya wĩthĩwe na ũtanu wa wʼo na ũyĩkala thayũ mũseo, Yeova Ngai nũkũnengete mwanya wa kwĩthĩwa na ĩvinda yũkĩte ĩseo. (Isaia 48:17, 18) Mbivilia yaĩtye atĩĩ: “Na thayũ wa tene na tene nĩwʼo ũũ, maendeee kũkwata ũmanyi ĩũlũ waku, Ngai ũla wa wʼo weka, na ĩũlũ wa ũla wamũtũmie, nake nĩ Yesũ Klĩsto.” (Yoana 17:3) Ĩvindanĩ yĩĩ kwĩ na mathĩna maingĩ, Ngai nũtũnengete wĩkwatyo “wa wʼo na mũlũmu.”​—Aevelania 6:19.

Asu nĩ amwe ma maũndũ ala ma vata vyũ maĩle kũtuma wenda kũmũmanya Ngai nesa na ũyĩthĩwa na ngwatanĩo nzeo vamwe nake. Nĩ kana ũkwate ũvoo mwingangĩ, no ũneene na Ngũsĩ sya Yeova kana ũkalika kĩsesenĩ kya jw.org.