Vai Ũndũ Ũngĩ Mũndũ Ũtonya Kwĩka Akethĩwa na Ũtanu

Ũtonya kwĩka ata nĩ kana ũmũthengeee Ngai? Maũndũ aa me vaa ĩtheo nĩmo twaĩle kwĩka nĩ kana twĩthĩwe na ngwatanĩo nzeo vamwe nake.

1. Kũmanya ĩsyĩtwa ya Ngai, Yeova, na kũyĩtũmĩa.

2. Kũvoya kĩla ĩvinda na kwĩmanyĩsya Ndeto yake, Mbivilia.

3. Kwĩkaa kwenda kwake.

Wasisya maũndũ asu, we no wasye nĩwĩkaa ũla waĩle nĩ kana ũmũthengeee Ngai? Ve vandũ ũkwona waĩle kwĩka maendeeo? O na kau ti ũndũ wĩ laisi kwĩka maũndũ asu, ndũlea kwĩkĩa kĩthito kũmeka wasũanĩa moathimo ala ũtonya kũkwata.

Mwĩĩtu-a-asa ũmwe wĩtawa Jennifer wa nthĩ ya Amelika aisye atĩĩ: “Nĩtwaĩle kwĩkĩa kĩthito nĩ kana twĩthĩwe na ũnyanya mũseo na Ngai. Kwĩka ũu nĩkũetae moathimo maingĩ ta kũmũĩkĩĩa Ngai, kũmũelewa nesa, na ũndũ ũla wa vata vyũ, nĩkũtumaa tũmwenda mũno. Vai ũndũ ũngĩ ũtonya kũtuma twĩthĩwa na ũtanu wa w’o ate o kwĩthĩwa na ũnyanya vamwe na Ngai.”

Ethĩwa nũkwenda kũtanĩa ũnyanya mũseo na Ngai, Ngũsĩ sya Yeova niũkũtetheesya kwĩka ũu. No mavange mũkemanyĩasya Mbivilia ĩmwe vate ndĩvi. O na ĩngĩ wĩmũthokye maũmbanonĩ moo ma kwĩmanyĩsya Mbivilia Nyũmbanĩ ya Ũsumbĩ ĩla yĩ vakuvĩ. Maũmbanonĩ asu, ũkatanĩa kwĩthĩwa vamwe na andũ ala monaa ngwatanĩo yoo na Ngai yĩ ya vata.a Weeka ũu, ũkeew’a ta mũandĩki wa Savuli ũla waisye atĩĩ: “Nĩ ũseo kwakwa kũthengeea Ngai.”—Savuli 73:28.