Tũmĩa Nzĩa Yaĩlĩte Ĩla Ũkwambĩĩa Kũneena na Mũndũ
1 Aklĩsto ma mbee matavanasya ũvoo mũseo kwa andũ ma syĩthĩo na ndĩni syĩ kĩvathũkanyʼo. (Ako. 1:23) O na kau matavanasya ĩũlũ wa Ũsumbĩ wa Ngai, mambĩĩaa ũtavanyʼa maitũmĩa nzĩa syĩ kĩvathũkanyʼo kwosana na ũla meũmũtavya. Kwa ngelekanyʼo, Vetelo aineena na Ayuti ala manengete Maandĩko ndaĩa, aambĩĩie kũneena kwa kũweta ndeto sya mwathani Yoeli. (Meko 2:14-17) Kwoona ũndũ Vaulo watũmĩie nzĩa ĩngĩ aisũanĩa vamwe na Akiliki o tondũ ĩandĩko ya Meko ma Atũmwa 17:22-31 yonanĩtye. Nũndũ ũmũnthĩ andũ isionĩ imwe nĩmanengete Maandĩko ndaĩa, nĩtũtonya kũtũmĩa Mbivilia ĩla tũũtavanyʼa nyũmba na nyũmba. O na vamwe na ũu, twaĩlĩte kũtũmĩa ũĩ ĩla tũũneena na ala matendeeawʼa nĩ Mbivilia kana ndĩni, kana ala ma ndĩni ite sya Kĩklĩsto.
2 Tũmĩa Nesa Mavuku Ala Twĩnenganae: Mavuku ala twĩnengane nthĩnĩ wa mwaka ũũ wa ũthũkũmi makavangĩĩawa angĩ me kĩvathũkanyʼo ĩtina wa kĩla myei ĩlĩ, na makeethĩawa makaseti, tũthangũ tũandĩke, na mbulosua. O na ethĩwa andũ kĩsionĩ kitũ mayendeeawʼa nĩ Mbivilia, tũkethĩawa tũtonya kũneenea ũndũ ũtonya kũmendeesya kuma mavukunĩ maitũ. No twĩthĩwe tũtatonya kũsoma Mbivilia ĩvinda ya mbee kana kũweta ĩandĩko, ĩndĩ ethĩwa mũndũ nĩwendeewʼa nĩtũtonya kũsyoka twĩ na kĩeleelo kya kwaka mũĩkĩĩo wake nthĩnĩ wa Mũmbi na nthĩnĩ wa Ndeto yake mbeveee. Ĩngĩ, ethĩwa twĩtavanyʼa kĩsionĩ andũ manengete Mbivilia ndaĩa, nĩtũtonya kũtũmĩa mavuku ala tũũnengane na nzĩa ya kũtavanyʼa ĩla yaĩle andũ asu. O na ethĩwa nĩ mavuku meva ala monanĩtwʼe maĩle kũnenganwe, ĩvinda o na yĩva no tũnengane ĩvuku Mbivilia Ĩmanyĩasya kana mbulosua Mwĩthukĩĩsye Ngai kana Mwĩthukĩĩsye Ngai Wĩkale Tene na Tene. Kĩla kya vata nĩ kwambĩĩsya ũtavanyʼa kwa nzĩa ĩtonya kũtuma andũ mendeewʼa.
3 Seũvya Mũthanga: Ngoo ya mũndũ no ta mũthanga. (Luka 8:15) Mĩthanga ĩmwe no nginya ĩseũvwʼe nesa nĩ kana mbeũ sya ũwʼo wa Mbivilia imee na iĩana. Atavanyʼa ma ĩvinda ya atũmwa matetheeasya andũ ma mĩthemba yonthe, na ũu nĩwatumaa mewʼa me eanĩe na me na ũtanu. (Meko 13:48, 52) Kwa kũtũmĩa nzĩa nzeo ĩla tũkwambĩĩa kũneena na andũ, o naitũ nĩtũtonya kũtetheesya andũ ma mĩthemba yonthe.
[Makũlyo]
1. Tũtonya kwĩmanyĩsya kyaũ kumana na nzĩa syĩ kĩvathũkanyʼo sya kwambĩĩa kũtavanyʼa ila Aklĩsto ma mbee matũmĩaa?
2. Tũtonya kũtũmĩa ata mavuku ala tũũnengane mwei mũna kũtetheesya andũ ala manengete Mbivilia ndaĩa, na ala matendeeawʼa nĩyo?
3. Ngoo sya andũ ala me kĩsionĩ kitũ no ta mũthanga kwa nzĩa myaũ?