Tetheesya Andũ Mamwĩthukĩĩsye Ngai
1 Ũmbanonĩ wa Kĩvalo wa “Ufalme wa Mungu na Uje!,” mbulosua ilĩ nĩsyaumiwʼe, Mwĩthukĩĩsye Ngai Wĩkale Tene na Tene, na ĩngĩ ĩandĩkĩtwe kwa nzĩa yĩ laisi, Mwĩthukĩĩsye Ngai. Nũndũ syĩ na ndeto nini, nitonya kwalyũlwa kwa mĩtũkĩ na kwa nzĩa yĩ laisi. Ĩla mbulosua Mwĩthukĩĩsye Ngai Wĩkale Tene na Tene yaumiwʼe kwa kĩthyomo kya Kĩsũngũ, yaĩ yĩ mbĩtĩkĩlĩthye ĩalyũlwe kwa ithyomo 431.
2 Naaũ ala mũno mũno mekũtetheka nĩ mbulosua ii? Kwasũanĩa maũndũ aa me vaa ĩtheo ala maumĩlaa mavinda maingĩ ĩũlũ wa nthĩ:
• Mũtavanyʼa aineena na mwene nyũmba, ĩvinda ya mbee kana amũsyokeete, na ĩtina aimanya kana mwene nyũmba ũsu ndesĩ kũsoma nesa.
• Mũtavanyʼa aitavya andũ maneenaa kĩthyomo kĩ na mavuku o manini ala tũalyũlĩte kana tũtaalyũlĩte o na yĩmwe. Kana vandũ aingĩ kĩsionĩ matatonya kũsoma kĩthyomo kĩla maneenaa.
• Mũtavanyʼa aitavya ũvoo mũndũ ũtewʼaa kĩsionĩ aitũmĩa kĩthyomo kya ala matewʼaa.
• Mũsyai ayenda kũmanyĩsya ũwʼo kana kake kanini katambĩte kũmanya kũsoma.
3 Ũndũ Ũvoo Ũla wĩ Mbulosuanĩ ii Ũvangĩtwe: Mbulosua Mwĩthukĩĩsye Ngai yĩ ndeto nini—mũno mũno o mĩsitalĩ mĩkuvĩ yĩ laisi na Ĩandĩko yonanĩtwʼe ĩtheo wa kĩla ĩthangũ yĩwetete maũndũ ala ma vata. Nĩkĩ? Kwa kũna visa ũinengwa mbulosua ya kĩthyomo ũtakĩsĩ o na vanini. Kwa wʼo no ĩkwendeesye, o na ethĩwa yĩ na mavisa manakavĩte ata? Aingĩ maimĩtanĩa. O ta ũu, andũ ala matesĩ kũsoma nĩmakusaa ngoo mĩtũkĩ ĩla moona mavuku maandĩke. Kwoou, kĩla ĩthangũ yĩ na mavisa masoletwe nesa, na kaĩndũ kolootete ka kũtetheesya kũkwatanyʼa ũneeni kuma visa ĩmwe kũthi ĩla ĩngĩ.
4 Mbulosua Mwĩthukĩĩsye Ngai Wĩkale Tene na Tene yĩ na mavisa mavwʼanene na ala me nthĩnĩ wa mbulosua Mwĩthukĩĩsye Ngai. Ĩseũvĩtwʼe ya kũmanyĩsya ala matesĩ kũsoma nesa kana ala maendeee kwĩmanyĩsya kũsoma. Mbulosua ĩno Mwĩthukĩĩsye Ngai Wĩkale Tene na Tene ĩngĩ nĩtonya kũtũmĩwa nĩ mwalimũ ĩla ũkũmanyĩsya mũndũ wĩ na mbulosua Mwĩthukĩĩsye Ngai. Mwambĩlĩlyonĩ wa kĩla ĩsomo ya mathangũ elĩ, ve ĩkũlyo yĩla ĩsũngĩĩtwe mathangũnĩ asu. Vamwe na mavisa ala me vo, ve maelesyo na maandĩko. Ĩtheo wa mathangũ maingĩ, ve kasandũkũ ka langi mweũ konanĩtye maũndũ makwongeleela na Maandĩko ala matonya kũneneewa kwosana na ũtonyi wa ũla ũkũmanyĩwʼa.
5 Ũndũ Tũtonya Kũtũmĩa Mbulosua Ii: Ĩla ũkwona ve vata nũtonya kumya ĩmwe ya mbulosua ii nthĩnĩ wa ũtavanyʼa wa nyũmba na nyũmba, o na ethĩwa ti mbulosua ivangĩĩwe kumwʼa mweinĩ ũsu. (Sisya ĩsandũkũ “Ũndũ Itonya Kumwʼa.”) No ũmyumye ĩsyokeonĩ kwa o kwĩa mũndũ ũsu ũkwendeewʼa kana wĩ na kĩndũ ũkwenda kũmwonyʼa na ũimũnenga mbulosua.
6 Nĩkwĩthĩwa mbulosua Mwĩthukĩĩsye Ngai ndĩ na makũlyo, ĩla mũkwĩmanyĩsya mũitonya kũtũmĩa nzĩa ya makũlyo na mosũngĩo ta ũndũ twĩkaa tũitũmĩa ĩvuku Mbivilia Ĩmanyĩasya. Andũ kũndũ kwʼonthe nĩmatanĩaa kwĩthukĩĩsya ngewa. Kwoou tũmĩa mavisa kũelesya ngewa mbeveee ila syĩ Mbivilianĩ. Elesya kĩla kyonanĩtwʼe nĩ mavisa asu. Neena wĩ mũthangaau. Thokya mũmanyĩwʼa aelesye maũndũ ala ũkwona na ũndũ ũkwĩsilya. Soma maandĩko ala me ĩtheo wa ĩthangũ, na mũimaneenea. Kũlya makũlyo nĩ kana mũmanyĩwʼa akwate mwanya wa kũneena na nĩ kana ũĩkĩĩthye nĩwaelewa. Ethĩwa mũmanyĩwʼa etũmĩa mbulosua Mwĩthukĩĩsye Ngai Wĩkale Tene na Tene, ĩla mũkũneneea kĩla visa somai vamwe maelesyo na maandĩko ala makonetye ĩ visa.
7 Tetheesya Mũmanyĩwʼa eke Maendeeo: No kwĩthĩwa, kũneenea maũndũ vamwe nake kũtuma endeewʼa nĩ kwĩmanyĩsya kũsoma nĩ kana atonye kwĩmanyĩsya Mbivilia ewe mwene. (Mt. 5:3; Yoa. 17:3) Kwoou, ethĩwa mwĩthĩĩtwe mũineenea mbulosua Mwĩthukĩĩsye Ngai, ĩtina wa kavinda noũkũlye mũmanyĩwʼa ũmũmanyĩsye kũsoma, na ĩndĩ no mwambĩĩe kwĩmanyĩsya mbulosua Mwĩthukĩĩsye Ngai Wĩkale Tene na Tene. O na watũmĩa mbulosua yĩkũ kũmũmanyĩsya, mũmanyĩwʼa ũsu ndeĩthĩwa atonya kũvatiswa mwamĩmina. Mwaĩlĩte kwambĩĩa kwĩmanyĩsya ĩvuku Mbivilia Ĩmanyĩasya kana ĩvuku yĩngĩ yĩla yĩtonya kũmũnenga ũmanyi mũliku wa Mbivilia.
8 No nginya andũ mamwĩthukĩĩsye Mũsumbĩ Mũnene wa nthĩ yonthe nĩ kana mekale tene na tene. (Isa. 55:3) Kwenda kwa Yeova nĩ “andũ onthe,” o na vamwe na ala matesĩ kũsoma, memanyĩsye kũmwĩthukĩĩsya. (1 Tim. 2:3, 4) Twĩ na ũtanu mwingĩ ta kĩ nũndũ wa mavuku aa meũ ala tũtonya kũtũmĩa kũmanyĩsya andũ ũndũ matonya kũmwĩthukĩĩsya Ngai!
[Makũlyo]
1. Nĩ mbulosua syĩkũ syaumiwʼe Ũmbanonĩ wa Kĩvalo wa “Ufalme wa Mungu na Uje!,” na nĩ kyaũ kĩtumaa syĩthĩwa syĩ sya vata mũno?
2. Naaũ ala mekũtetheka nĩ mbulosua ii?
3. Nĩ kyaũ kĩ mathangũnĩ ma mbulosua Mwĩthukĩĩsye Ngai?
4. Nĩ kyaũ kĩ mathangũnĩ ma mbulosua Mwĩthukĩĩsye Ngai Wĩkale Tene na Tene?
5. Tũtonya kumya mbulosua ii ĩndĩĩ na ata?
6. Tũkamanyĩsya ata tũitũmĩa mbulosua ii?
7. Tũtonya kũtetheesya mũmanyĩwʼa witũ wa Mbivilia ata eke maendeeo?
8. Nĩkĩ ũũtũnga mũvea nũndũ wa mavuku aa meũ ma ũtavanyʼa?
[Ũvoo ĩũlũ wa visa ĩthangũnĩ ya 3]
Ũndũ Itonya Kumwʼa
Mwonyʼe mwene nyũmba ĩthangũ ya 2-3, na ũyasya: “No wende kwĩkala nthĩ yĩilyĩ ta ĩno? [Eka asũngĩe.] Maandĩko mathanĩte [kana, ĩvuku yĩĩ ĩtheu yathanĩte] kana o mĩtũkĩ Ngai akatũnga nthĩ ĩno kwĩthĩwa mbanake, vandũ ve na mũuo, vatakethĩwa na mũndũ ngya kana mũwau. Kwa sisya ũndũ twaĩle kwĩka nĩ kana twĩĩkala nthĩ ĩsu. [Soma Isaia 55:3, yĩla yonanĩtwʼe ĩũlũ ĩthangũnĩ ya 3.] Ĩandĩko yĩĩ ĩtwĩĩte ‘tũmũkĩe’ Ngai na ‘tũimwĩthukĩĩsya.’ Ĩndĩ tũmwĩthukĩĩasya Ngai ata?” Vua ĩthangũ ya 4-5, na ũineenea ũsũngĩo vamwe nake. Ethĩwa nde na mwanya, mũtiĩe mbulosua na mũivanga ũsyoke mũneenee ũsũngĩo.