Ũndũ Ũtonya Kũtetheka Kumana na Kĩkundi Kyaku kya Ũtavanyʼa
1. Nĩ moathimo maũ tũkwataa kĩkundinĩ kya ũtavanyʼa ala maĩ vo nthĩnĩ wa mũvango wa Ĩmanyĩsyo ya Ĩvuku ya Kĩkundi?
1 Nĩwĩwʼaa ũikosa maũndũ amwe ma Ĩmanyĩsyo ya Ĩvuku ya Kĩkundi (Funzo la Kitabu la Kutaniko)? Ikundi iyeethĩawa na andũ aingĩ na andũ meewʼaa me eanĩe. Ũu watumaa wĩthĩwa wĩ ũndũ laisi kũtuma ndũũ ila syatũtetheeasya kũendeea kwĩthĩwa na mũĩkĩĩo mũlũmu. (Nth. 18:24) Mũsyaĩĩsya wa ĩmanyĩsyo ya ĩvuku ya kĩkundi eethĩawa esĩ nesa mathĩna maitũ na ũyĩthĩwa wĩ ũndũ laisi kwĩkĩa vinya kĩla ũmwe witũ. (Nth. 27:23; 1 Vet. 5:2, 3) O na yu moathimo asu nĩmakwatĩkanaa kwĩsĩla ikundi sitũ sya ũtavanyʼa.
2. Tũtonya kwosa ĩtambya ya mbee ata kwambĩĩsya ũnyanya ikundinĩ sitũ sya ũtavanyʼa ila itumaa tũendeea kwĩthĩwa twĩ alũmu kĩ-veva?
2 Osa Ĩtambya ya Mbee: Ikundi sya ũtavanyʼa syĩthĩawa mũno mũno ianene na ikundi ila syaĩ sya ĩmanyĩsyo ya ĩvuku ya kĩkundi. Kũtavanyʼa “na ngoo ĩmwe” na ala angĩ nĩkũtumaa twĩthĩwa na ũnyanya wa vakuvĩ. (Avi. 1:27) Ũtavanĩtye na atavanyʼa meana ata kĩkundinĩ kyenyu kya ũtavanyʼa? No ‘ũneneve ngoonĩ’ ũndũnĩ ũũ? (2 Ako. 6:13) Ĩngĩ, ĩvinda kwa ĩvinda no tũthokasyae mũndũ kuma kĩkundinĩ kitũ kya ũtavanyʼa wĩoo ũla twĩ na Ũthaithi witũ wa Mũsyĩ kana oke tũye ĩmwe. Ikundinĩ imwe, ikundi sya ũtavanyʼa nĩsyumanĩasya kũthokya mumya wa ũvoo ũla ũthokete. Kyumwanĩ kĩla atavanyʼa ma kĩkundi kyu kya ũtavanyʼa mavangĩĩwe kũmũthokya mumya wa ũvoo, nĩmombanaa vamwe kwondũ wa kũĩsanĩa na kwĩkĩana vinya o na ethĩwa mumya ũsu wa ũvoo ndeũka kũya namo.
3. Nĩ mavinda amwe meva kĩkundinĩ kitũ kya ũtavanyʼa tũtonya kũkwata mwanya wa kũthokewa nĩ atumĩa ma kĩkundi kwondũ wa kũtwĩkĩa vinya?
3 O na vala ũmũnthĩ maũmbano ma kĩkundi mekawa kelĩ kwa kyumwa, ũu ti kwonanyʼa kana atavanyʼa maĩle kũthokeawa nĩ atumĩa ma kĩkundi mavinda mavũthũ kwondũ wa kũmekĩa vinya. Asyaĩĩsya ma kĩla kĩkundi kya ũtavanyʼa methĩawa manyuvĩtwe mekĩe vinya kĩla ũmwe kĩkundinĩ kyoo na maimamanyĩsya wĩa wa kũtavanyʼa. Ethĩwa mũsyaĩĩsya wa kĩkundi kyenyu kya ũtavanyʼa ndaatavanyʼa naku, no ũmũkũlye mũtavanyʼe ĩmwe. Ĩngĩ, mũthyanĩ ũmwe wa kyumwa kĩla mwei, mũsyaĩĩsya wa ũthũkũmi nũtavanasya na kĩkundi kya ũtavanyʼa kĩ kĩvathũkanyʼo. Nthĩnĩ wa ikundi ila ve ikundi mbũthũ sya ũtavanyʼa, mũsyaĩĩsya wa ũthũkũmi no avange kũthokea kĩla kĩkundi kya ũtavanyʼa kelĩ kwa mwaka. We nĩwĩthĩawa na mĩvango ya kũtavanyʼa ĩla mũsyaĩĩsya ũsu wa ũthũkũmi wooka kĩkundinĩ kyenyu kya ũtavanyʼa?
4. (a) Maũmbano ma ũtavanyʼa mavangawa ata? (b) Nĩkĩ twaĩle kũsũanĩa ĩũlũ wa kumya mũsyĩ witũ kwondũ wa kwĩkĩwa ũmbano wa ũtavanyʼa?
4 Mavinda maingĩ vethĩawa ve ũseo wa kĩla kĩkundi kya ũtavanyʼa kũkomana kĩ kyoka kwondũ wa ũtavanyʼa Wathanthatũ na Wakyumwa. Mwethĩwa na kũndũ kwĩ kĩvathũkanyʼo kwa kũkomanĩa, na mũivanga kũkomana o vakuvĩ masaa ala mũkomanaa nĩũtuma wĩthĩwa wĩ ũndũ laisi kwa atavanyʼa kũvika ũmbanonĩ wa kũtavanyʼa na maithi kĩsionĩ kĩla meũtavanyʼa. Atavanyʼa no mavangwe mĩtũkĩ na mayambĩĩa kũthi kĩsionĩ kĩla meũtavanyʼa vate kwananga ĩvinda. Ĩngĩ wĩthĩawa wĩ ũndũ laisi kwa mũsyaĩĩsya wa kĩkundi kya ũtavanyʼa kũthĩnĩkĩa ala me kĩkundinĩ kyake. O na vamwe na ũu, ve maũndũ matonya kũtuma ikundi ilĩ kana mbingangĩ sya ũtavanyʼa ivulanwʼa vamwe. Ethĩwa ikundi syonthe sya ũtavanyʼa ikomanaa vamwe kwondũ wa ũmbano wa ũtavanyʼa kĩla Wathanthatũ wa mbee wa mwei kana ĩtina wa Ĩsomo ya Mnara wa Mlinzi, mavinda maingĩ nĩ ũseo kĩla kĩkundi kya ũtavanyʼa kĩkekala vamwe ũmbanonĩ ũsu. Na ĩndĩ asyaĩĩsya ma ikundi sya ũtavanyʼa mainengwa ndatĩka nini mavange ikundi syoo. Ĩtina wa ũu, ũmbano ũsu wa ũtavanyʼa nũminĩĩwe na mboya.—Sisya ĩsandũkũ “No Wĩtĩkĩle Mũsyĩ Waku Ũtũmĩwe?”
5. O na kau mũvango wa Ĩmanyĩsyo ya Ĩvuku ya Kĩkundi nĩwathelile, twĩ na ũwʼo wa kyaũ?
5 O na kau mũvango wa Ĩmanyĩsyo ya Ĩvuku ya Kĩkundi nĩwathelile, Yeova nũendeee kũtũnenga kyonthe kĩla twĩ na vata nakyo nĩ kana twĩke kwenda kwake. (Aevl. 13:20, 21) Tũyaĩawa nĩ kĩndũ twĩ ũsũvĩonĩ wa Yeova. (Sav. 23:1) Moathimo maingĩ nĩmakwatĩkanaa kuma kĩkundinĩ kitũ kya ũtavanyʼa. Twoosa ĩtambya ya mbee ‘tũvuĩe nyingĩ tũkaketha nyingĩ.’—2 Ako. 9:6.
[Ĩsandũkũ ĩthangũnĩ ya 6]
No Wĩtĩkĩle Mũsyĩ Waku Ũtũmĩwe?
Ikundi imwe nivulanasya vamwe ikundi sya ũtavanyʼa Wathanthatũ na Wakyumwa nũndũ vaiĩ mĩsyĩ ĩtoetye ya kwĩkĩa maũmbano ma ũtavanyʼa. Maũmbano ma ũtavanyʼa nĩ kĩlungu kya mĩvango ya kĩkundi, kwoou kwĩtĩkĩla maũmbano asu mekĩwe kwaku nĩ kĩanda kya mwanya. No wĩtĩkĩle mũsyĩ waku ũtũmĩwe? Ndũkaemwe nĩ kumya mũsyĩ waku nũndũ nĩ wa kĩlasi kya nthĩ. Atumĩa makasũanĩĩa vala mũsyĩ waku ũĩ na maũndũ angĩ o ta ala masiawʼa ĩvinda ya kũnyuva kũndũ kũla kweekĩawa ĩmanyĩsyo ya ĩvuku ya kĩkundi. Ethĩwa nũkwenda mũsyĩ waku ũtũmĩwe, tavya mũsyaĩĩsya wa kĩkundi kyenyu kya ũtavanyʼa.