Nzĩa Itano sya Kũkwata Ĩmanyĩsyo ya Mbivilia
1. Ethĩwa ti laisi kũkwata ĩmanyĩsyo ya Mbivilia kĩsionĩ kitũ, twaĩle kwĩka ata, na nĩkĩ?
1 Nĩwĩwʼaa ve vinya kũkwata mũndũ wa kwĩmanyĩsya Mbivilia nake? Endeea kwĩkĩa kĩthito kũmantha. Yeova nũathimaa ala maendeeaa kwĩthĩwa na kĩthito nthĩnĩ wa kwĩka kwenda kwake. (Aka. 6:9) Vaa ĩtheo ve nzĩa itano itonya kũũtetheesya.
2. Tũtonya kũtũmĩa nzĩa ya ĩmwe kwa ĩmwe ata kwambĩĩsya ĩmanyĩsyo ya Mbivilia?
2 Kũlya Andũ Ĩmwe kwa Ĩmwe: Andũ aingĩ nĩmesĩ kana nĩtũnenganae makaseti ma Mnara wa Mlinzi na Amkeni!, ĩndĩ no methĩwe matesĩ kana nĩtwĩyumasya kwĩmanyĩsya Mbivilia na andũ. Tata ũkũlye andũ ĩmwe kwa ĩmwe kana nĩmekwenda kwĩmanyĩsya Mbivilia ĩla wathi ũtavanyʼa wa nyũmba na nyũmba. Ĩngĩ, nũtonya kũkũlya andũ mendeeawʼa ala ũmasyokeaa kana no mende kwĩmanyĩsya Mbivilia. Malea, no ũmatiĩae mavuku na ũiendeea kũmatetheesya maendeee kwendeewʼa. Mwana-a-asa ũmwe ethĩĩtwe aisyokea andũ amwe matwaanĩte kwa ĩvinda ya myaka yĩana ũndũ mũna aimatwaĩa makaseti. Amina kũmanenga makaseti ala ma mĩtũkĩ, avĩndũkie athi ĩndĩ asũanĩa na mĩtũkĩ na amakũlya: “No mwende kwĩmanyĩsya Mbivilia?” Nĩwasengʼie ĩla meetĩkĩlile. Ũmũnthĩ nĩ avatise.
3. Nĩtwaĩle kwĩsilya kana andũ onthe ala mekwendeewʼa mokaa maũmbanonĩ nĩmemanyĩasya Mbivilia na mũndũ? Elesya.
3 Ala Mokaa Maũmbanonĩ: Ndũkesilye kana andũ onthe ala mekwendeewʼa ũmonaa maũmbanonĩ ta memanyĩasya Mbivilia na mũndũ. Mwana-a-asa ũmwe easya: “Mbee wa nusu ya andũ ala nĩĩmanyĩasya Mbivilia namo namambĩĩisye kwa kuneena na ala mookaa maũmbanonĩ.” Mwĩĩtu-a-asa ũmwe atwie kũneena na mũndũ mũka wĩ nthoni ũla eĩtu make avatise mookaa maũmbanonĩ. Mũndũ mũka ũsu ookaa maũmbanonĩ mambĩĩa oou na ayumaala mathela oou kwa ĩvinda ya myaka ta 15. Mũndũ mũka ũsu nĩweetĩkĩlile kwĩmanyĩsya Mbivilia na ĩtina avatiswa. Mwĩĩtu-a-asa ũsu easya: “Nĩĩlila mũno nũndũ wa kweteela myaka 15 ndyĩsa kũmũkũlya mũndũ mũka ũsu kana nũkwenda kwĩmanyĩsya Mbivilia!”
4. Tũtonya kũkwata mũndũ wa kwĩmanyĩsya Mbivilia nake kwĩsĩla kũkũlĩĩlya ata?
4 Kũkũlĩĩlya: Mwĩĩtu-a-asa ũmwe ethĩawa na kĩthito kya kũthi na atavanyʼa ala me na andũ meũmamanyĩsya Mbivilia. Ĩtina wa kwĩtya mwalimũ mwanya, mamima kwĩmanyĩsya nũkũlasya ũla ũkũmanyĩwʼa ethĩwa nĩwĩsĩ andũ angĩ matonya kwendeewʼa nĩ kwĩmanyĩsya Mbivilia. Ĩla ũũnengane ĩvuku Mbivilia Ĩmanyĩasya kwa mũndũ wĩthĩĩtwe ũimũsyokea, no ũmũkũlye: “Nĩwĩsĩ mũndũ ũngĩ ũtonya kwendeewʼa nĩ kũsoma ĩvuku yĩĩ?” Mavinda angĩ, nũndũ wa maũndũ mana, vayĩthĩawa vatonyeka kwa atavanyʼa na mavainia kwĩmanyĩsya Mbivilia na mũndũ makomana nake kĩsionĩ. Kwoou eka angĩ mamanye kana we nĩwĩyũmbanĩtye kwĩmanyĩsya Mbivilia na andũ.
5. Nĩkĩ twaĩlĩte kũkũlya andũ ala mate etĩkĩli ala aũme kana aka moo nĩ ma kĩkundi kitũ kana no mende kwĩmanyĩsya Mbivilia?
5 Mũndũ Ũla Ũte Mwĩtĩkĩli Nthĩnĩ wa Mũtwaano: Ve atavanyʼa kĩkundinĩ kyaku matwaanĩte na andũ mate etĩkĩli? Amwe ala mate etĩkĩli mayĩtĩkĩlaa kũneena na aka kana aũme moo Aklĩsto ĩũlũ wa Mbivilia, ĩndĩ nĩmatonya kwĩtĩkĩla kwĩmanyĩsya Mbivilia na mũndũ ũte wa mũsyĩ. Nĩ ũseo kũneena na ũla mwĩtĩkĩli ũtanamba kũkũlya ũla ũte mwĩtĩkĩli mwĩmanyĩsye Mbivilia nĩ kana ũmanye nzĩa ĩla nzeo vyũ ya kwambĩĩa kũneena nake.
6. Nĩkĩ mboya nĩ ya vata ĩla tũkwenda kũkwata mũndũ wa kũmanyĩwʼa Mbivilia?
6 Mboya: Ndũkavũthye vinya wa mboya. (Yak. 5:16) Yeova nũtwathĩte kũtwĩthukĩĩsya ethĩwa kĩla tũũvoya nĩkyosanĩte na kwenda kwake. (1 Yoa. 5:14) Mwana-a-asa ũmwe ũla weethĩawa akwatanĩte mũno, nĩwavoyie akwate mũndũ wa kũmanyĩsya Mbivilia. Mũka wake eekũlasya ethĩwa mũũme wake akakwata ĩvinda ya kũthĩnĩkĩa mũmanyĩwʼa wa Mbivilia, mũno mũno akwata mũmanyĩwʼa wĩ na mathĩna maingĩ. Mũka nĩwawetie ũndũ ũsu mboyanĩ yake aivoya kwondũ wa mũũme akwate mũndũ wa kũmanyĩwʼa Mbivilia. Mboya syoo nĩsyasũngĩiwe ĩtina wa syumwa ilĩ ĩla vainia ũmwe nthĩnĩ wa kĩkundi kyoo wakwatie mũndũũme wendaa kwĩmanyĩsya Mbivilia na amũnenga mwana-a-asa ũsu amũmanyĩsye. Mũka wake easya: “Kwa ala mekwona ta matatonya kũmanyĩsya mũndũ Mbivilia nũndũ wa kwona makwatanĩte mũno, nĩmea: Wetai ũndũ ũũ mboyanĩ, na mũiendeea kũvoya kwondũ wawʼo. Twĩ na ũtanu mwingĩ mũno ũndũ o na ndaĩ nĩĩsilya.” Waendeea kũmĩĩsya na kwĩkĩa kĩthito, o naku no ũkwate mũndũ wa kũmanyĩwʼa Mbivilia na ũyĩthĩwa na ũtanu wa kũtetheesya mũndũ alike ‘nzĩanĩ ĩla ĩelete thayũnĩ.’—Mt. 7:13, 14.