‘Ĩthĩwa na Mũuo na Andũ Onthe’
1. Nĩ ũtao wĩkũ wa Mbivilia tũtonya kũatĩĩa ĩla twakomana na ene nyũmba athilĩku?
1 Andũ ma Yeova nĩmendete mũuo, na ũtavanyʼa witũ nĩ wa mũuo. (Isa. 52:7) O na ũu, mavinda amwe nĩtũkomanaa na ene nyũmba athilĩku nũndũ wa ũvoo witũ. Nĩ kyaũ kĩtonya kũtũtetheesya kwĩthĩwa na mũuo mavindanĩ ta asu?—Alo. 12:18.
2. Nĩkĩ nĩ ũndũ wa vata kũelewa ene nyũmba?
2 Elewa Ene Nyũmba: O na kau amwe mathilĩkaa nũndũ wa kwĩthĩwa nĩmavĩngaa ũla wʼo, angĩ no mathilĩke nũndũ wa itumi ingĩ itakonanĩtye na ũtavanyʼa witũ. Nĩmatonya kũthilĩka nũndũ wa kwĩthĩwa twamathokea masaa mataĩle. Mwene nyũmba no ethĩwe e mũthilĩku nũndũ wa mathĩna make mwene. O na ethĩwa athilĩkĩte nũndũ wa ũvoo mũseo, nĩtwaĩle kũlilikana kana kĩtumi kĩnene kya kũthilĩka kwake nĩkĩtonya kwĩthĩwa nũndũ wa kũkengwa ĩũlũ witũ. (2 Ako. 4:4) Kũelewa andũ nĩkũtonya kũtũtetheesya tũikathilĩke na tũikone ta ithyĩ mwene nyũmba ũthatĩe.—Nth. 19:11.
3. Tũtonya kwonanyʼa ndaĩa ata kwa mwene nyũmba?
3 Onanyʼa Ndaĩa: Aingĩ nthĩnĩ wa isio sitũ nĩ alũmu maũndũnĩ ala maĩkĩĩyĩte. (2 Ako. 10:4) Me na ũthasyo wa kũnyuva kwĩthukĩĩsya kana kũlea. Tũyaĩle o na vanini kũvũthya mũĩkĩĩo wa mwene nyũmba kana kwĩyonanyʼa ta ithyĩ twĩsĩ Mbivilia mũno. Mwene nyũmba atwĩa tũthi, twaĩle kwĩka ũu kwa ndaĩa.
4. Kũneena kwa ũuu kwonanasya ata?
4 Neena kwa Ũuu: O na ethĩwa mwene nyũmba nĩwaneena maũndũ mathũku ĩũlũ witũ, twaĩlĩte kũsũngĩa kwa ũuu. (Ako. 4:6; 1 Vet. 2:23) Vandũ va kũkananĩa na mwene nyũmba, tata ũneenee maũndũ ala mũkwĩtĩkĩlana. Kwa ngelekanyʼo nĩtũtonya kũmũkũlya kwa ũuu nĩkĩ ũnĩkũlea ũvoo witũ. Nĩ kana twĩvathane na kũmũthilĩkya mũnango, mavinda angĩ nĩ ũseo kũlea kũendeesya ngewa.—Nth. 9:7; 17:14.
5. Nĩ moathimo maũ maumanaa na kwĩthĩwa twĩ andũ ma mũuo ĩla twĩ ũtavanyʼanĩ?
5 Tweethĩwa andũ ma mũuo, mwene nyũmba nũtonya kwĩsa kũlilikana ũu, na ayĩthukĩĩsya ĩvinda yĩngĩ aitavwʼa ũvoo. (Alo. 12:20, 21) O na ethĩwa eonekana aĩvĩnga na vinya, mũthenya ũmwe no ese kũtwʼĩka mwana-a-asa witũ. (Aka. 1:13, 14) Ethĩwa mwene nyũmba akesa kwendeewʼa kana alee kwendeewʼa nĩ ũla wʼo, tũkamũtaĩa Yeova na kwanakavya ũmanyĩsyo witũ kwa kũendeea kwĩthĩwa na wĩtingʼo na mũuo.—2 Ako. 6:3.