Ũndũ Tũtonya Kũmanyĩsya Amanyĩwʼa ma Mbivilia Meke Maendeeo
1. Atavanyʼa ala me na amanyĩwʼa ma Mbivilia me na kĩanda kĩva?
1 Vaiĩ mũndũ ũtonya kũmũthũkũma Ngai ate o Yeova ‘amũkusisye.’ (Yoa. 6:44) O na vailyĩ ũu, atavanyʼa maĩle kũtata ũndũ matonya matetheesye amanyĩwʼa moo ma Mbivilia methĩwe na ngwatanĩo nzeo na Ĩthe woo wa ĩtunĩ. (Yak. 4:8) Nĩ kana atavanyʼa meke ũu, no nginya meyũmbanyʼe nesa. Kũsoma kalungu na kũkũlya ĩkũlyo yĩla yĩ vo kwʼoka kũitonya kũtetheesya mũmanyĩwʼa aelewe nesa ũvoo mũseo na ayĩka maendeeo.
2. Kũmanyĩsya mũmanyĩwʼa wa Mbivilia nesa kũtonya kũtuma eka ata?
2 Nĩ kana amanyĩwʼa maitũ meke maendeeo, no nginya tũmatetheesye (1) maelewe nĩ kĩla Mbivilia ĩmanyĩasya, (2) metĩkĩle kĩla mekwĩmanyĩsya, na (3) maatĩĩe kĩla mekwĩmanyĩsya. (Yoa. 3:16; 17:3; Yak. 2:26) Kũtetheesya mũmanyĩwʼa eanĩsye maũndũ asu nĩkũtonya kũkua ĩvinda. O na ũu wĩ o vo, kĩla ũmwe wa maũndũ asu nũtonya kũmũtetheesya mũmanyĩwʼa ethĩwe na ngwatanĩo vamwe na Yeova na ayĩĩyumya amũthũkũme.
3. Nĩkĩ alimũ aseo matũmĩaa makũlyo ĩla meũmanyĩsya?
3 Mũmanyĩwʼa e na Mawoni Maũ?: Nĩ kana tũmanye kana mũmanyĩwʼa witũ wa Mbivilia nũkũelewa na kwĩtĩkĩla kĩla ekwĩmanyĩsya, tũyaĩle kũneena mũno ĩndĩ twaĩle kũmũtetheesya eeyĩelesye. (Yak. 1:19) Nũkũelewa ũndũ Mbivilia yaĩtye ĩũlũ wa kĩla ũkwĩmanyĩsya? Nũtonya kũelesya kĩla ũkwĩmanyĩsya ate kũsoma ĩvukunĩ? Eona ata maũndũ ala ũkwĩmanyĩsya? Nũkwona maũndũ ala Mbivilia ĩmanyĩasya matonya kũmũtethya? (1 Ath. 2:13) Nũkũelewa kana aĩlĩte kwĩkala kwosana na kĩla ũkwĩmanyĩsya? (Ako. 3:10) Nĩ kana tũmanye maũndũ asu, twaĩlĩte kũtũmĩa ũĩ kũmũkũlya mũmanyĩwʼa witũ makũlyo matonya kũtuma eeyĩelesya, na tũimwĩthukĩĩsya.—Mt. 16:13-16.
4. Twaĩlĩte kwĩka ata ethĩwa mũmanyĩwʼa ndekũelewa kana kũatĩĩa kĩla tũũmũmanyĩsya?
4 Nĩ ũndũ ũkuaa ĩvinda yĩasa mũndũ kũekana na imanyĩo na maũndũ ala wamanyie kuma tene. (2 Ako. 10:5) Nata ethĩwa mũmanyĩwʼa witũ ndekwĩtĩkĩla kana ndekwĩkala kwosana na kĩla ũkwĩmanyĩsya? Nĩtwaĩle kũmĩĩsya nĩ kana vinya wa Ndeto ya Ngai na veva mũtheu itetheesye mũmanyĩwʼa ũsu aalyũke. (1 Ako. 3:6, 7; Aevl. 4:12) Ethĩwa mũmanyĩwʼa ndekũelewa nĩ kĩla mũũneenea kana ethĩwa ndekũatĩĩa kĩla mũkwĩmanyĩsya, mavinda maingĩ wĩthĩawa wĩ ũndũ waĩle kũneenea kyongo kĩngĩ vandũ va kũmũthingʼĩĩsya. Twaendeea kũmũmanyĩsya Mbivilia twĩ na wũmĩĩsyo na twĩ na wendo, nũtonya kwĩsa kũalyũka ĩtina wa ĩvinda.