No Ũtanĩe Moathimo Matakathela Kuma kwa Ngai wĩ Wendo

• We nĩwĩwʼaa wĩ na mea ma kwĩkala ĩũlũ wa nthĩ kũte kaũ, ũngʼendu, na kĩmena?

• Nĩwĩwʼaa ũtonya kũtanĩa kwĩkala thayũ keka kũti mowau, mathĩna, na kĩkwʼũ?

• Nĩwĩthĩawa na mea ma kwĩsa kwĩkala ĩvinda yĩmwe ũte na mawĩmakĩo?

• Nĩwendaa kwĩsa kwĩkala ũteũthĩnwʼa nĩ mĩisyo ta itetemo sya nthĩ?

Ngai witũ wĩ wendo, ũla nĩwe Mũmbi wa nthĩ ĩno mbanake, nĩwathanĩte kana akaathima andũ onthe, na makekalaa me atanu na kwĩ mũuo kũvika tene na tene. Ĩsu ti ndoto.

Ilungunĩ ii iatĩĩe, nĩtũũkũkũlya wĩmanyĩsye maũndũ ta:

• Ũndũ Mũmbi witũ ũtwendete

• Maũndũ ala Ndeto yake ĩtũmanyĩasya

• Ũndũ athani mawetie ĩũlũ wa moathimo ala Ngai ũtwathĩte ĩvinda yũkĩte

• Maũndũ ala tũtonya kwĩka twĩkale twĩ atanu na ĩvinda yũkĩte tũikwata moathimo ma tene na tene

Ekai twambe kũneenea ũndũ Mũmbi witũ wĩ wendo ũtũthĩnĩkĩaa.