Kũmwenda Yeova na Kwenda Kũmũtũngĩa Mũvea no Kũtume Ũtwʼa Kũvatiswa

1-2. O tondũ vonanĩtwʼe ĩandĩkonĩ ya Meko ma Atũmwa 8:27-31, 35-38, nĩ kyaũ kyatumie ũla mũndũũme Mũethiovia avatiswa?

NŨKWENDA kũvatiswa ũtwʼĩke mũmanyĩwʼa wa Klĩsto? Kũmwenda Yeova na kwenda kũmũtũngĩa mũvea nĩkwĩkĩĩte aingĩ vinya makosa ĩtambya ya kũvatiswa. Kwasũanĩa mũnene ũmwe wathũkũmaa mũsumbĩ mũndũ mũka wa Ethiovia.

² Mũethiovia ũsu oosie ĩtambya na mĩtũkĩ eke kwosana na kĩla waĩ aneemanyĩsya Maandĩkonĩ. (Soma Meko ma Atũmwa 8:27-31, 35-38.) Nĩ kyaũ kyamwĩkĩie vinya? Vate nzika, nĩwoonaa Ndeto ya Ngai yĩ ya vata nũndũ atanamba kũkomana na Vilivu, asomaa kĩlungu kĩ ĩvukunĩ ya Isaia e ĩkasyanĩ aendeee na kyalo kyake. Na yĩla Vilivu waneenie nake, mũndũũme ũsu nĩwatanie mũno kũmanya kĩla Yesũ weekĩte kwondũ wake. Ĩndĩ nĩkĩ waendete Yelusaleme? Nĩkwĩthĩwa nĩwamwendete Yeova. Twĩsĩ ũu ata? Mbivilia yonanĩtye kana aumĩte kũmũthaitha Yeova ku Yelusaleme. Mũndũũme ũsu nũtonya kwĩthĩwa atiĩte ndĩni ĩla wathaithaa tene, na akalikana na mbaĩ ĩla Ngai ũla wa wʼo wanyuvĩte ĩmũthũkũme. Kũmwenda Yeova nokwʼo kwatumie osa ĩtambya yĩngĩ ya vata vyũ, nayo nĩ kũvatiswa atwʼĩke mũmanyĩwʼa wa Klĩsto.—Mt. 28:19.

3. Nĩ kyaũ kĩtonya kũsiĩĩa mũndũ ndakavatiswe? (Sisya ĩsandũkũ, “Ngoo Yaku Ĩilye Ata?”)

³ Kũmwenda Yeova no kũtume wenda kũvatiswa. Ĩndĩ ve ũndũ ũmwe ũtonya kũũsiĩĩa. Wĩva? Kwasũanĩa ngelekanyʼo ii. No wĩthĩwe wendete mũno anyanyau na andũ maku ma mũsyĩ ala matamũthaithaa Yeova, na no wĩthĩwe ũyona kana wavatiswa nĩmeũkũmena. (Mt. 10:37) Kana no wĩthĩwe wendete imanyĩo imwe wĩsĩ Ngai nũmenete, na wĩĩwʼa vinya kũsieka. (Sav. 97:10) O na ĩngĩ, no wĩthĩwe weanie ũitanĩa sikũkũ syumanĩte na ndĩni ya ũvũngũ. Na no kwĩthĩwa ũtanaa walilikana maũndũ maseo ala mweekaa mũitanĩa sikũkũ isu. Nũndũ wa ũu, no wĩwʼe wĩ ũndũ wĩ vinya kũeka kũtanĩa sikũkũ isu itamwendeeasya Yeova. (1 Ako. 10:20, 21) Ĩndĩ ĩkũlyo yĩla waĩle kwĩkũlya nĩ, ‘Nĩ kyaũ nendete mũno, kana nũũ nendete mũno?’

NŨŨ ŨLA TWAĨLE KWENDA MŨNO?

4. Ũndũ ũla mũnene waĩle kũtuma wenda kũvatiswa nĩ wĩva?

⁴ Wĩ na syĩndũ mbingĩ nzeo wendete na ũtũngaa mũvea kwondũ wasyo. Kwa ngelekanyʼo, ũtambĩĩe kwĩmanyĩsya Mbivilia na Ngũsĩ sya Yeova, no kwĩthĩwa wanengete Mbivilia ndaĩa mũno. Na no kwĩthĩwa wamwendete Yesũ. Yu nũndũ nĩwĩsĩ Ngũsĩ sya Yeova, no wĩthĩwe wendete kũtũmĩa ĩvinda vamwe nasyo. Ĩndĩ kwĩthĩwa wendete maũndũ asu kwĩ kwʼoka kũituma wenda kwĩyumya ũmũthũkũme Yeova na ũivatiswa. Kũmwenda Yeova Ngai nĩwʼo ũndũ ũla mũnene waĩle kũtuma wenda kũvatiswa. Wamwenda Yeova mũno, ndũketĩkĩlya mũndũ kana kĩndũ o na kĩva kĩũsiĩĩe kũmũthũkũma. No twasye kũmwenda Yeova nĩkwʼo kũũvingũĩaa nzĩa nĩ kana ũvatiswe, na nĩkwʼo kũũsiĩĩaa ndũkaume nzĩanĩ ĩla wakinya wambĩĩa kũmũthũkũma.

5. Twĩneenea kyaũ ĩsomonĩ yĩĩ?

⁵ Yesũ aisye kana no nginya tũmwende Yeova na ngoo yitũ yonthe, thayũ witũ wʼonthe, kĩlĩko kitũ kyonthe, na vinya witũ wʼonthe. (Mko. 12:30) Nĩ kyaũ kĩtonya kũũtetheesya ũmwende mũno wĩana ũu na ũimũnenga ndaĩa nene? Kũvindĩĩsya ũndũ Yeova ũtwendete kũtumaa o naitũ tũmwenda. (1 Yoa. 4:19) Ĩsomonĩ yĩĩ nĩtũkwona maũndũ amwe matonya kũũtetheesya ũmwende. O na ĩngĩ, nĩtũkwona maũndũ mana wendo ũsu ũtonya kũtuma wĩka.b

6. Kwosana na Alomi 1:20, nzĩa ĩmwe ũtonya kwĩmanyĩsya ĩũlũ wa Yeova nĩ yĩva?

⁶ Ĩmanyĩsye ĩũlũ wa Yeova kwĩsĩla wũmbi. (Soma Alomi 1:20; Ũvu. 4:11) Sũanĩa ũndũ syĩndũ ila Yeova woombie, ta mĩtĩ na nyamũ, syonanasya kana we nĩ mũĩ. Tata wĩmanyĩangye ũndũ mwĩĩ waku ũmbĩtwe kwa nzĩa ya kũsengyʼa. (Sav. 139:14) Na ĩndĩ sũanĩa ĩũlũ wa vinya ũla Yeova weekĩie syũanĩ, na ndũkolwe kana syũa no ndata ĩmwe. Kwĩ ndata ingĩ mbilioni mbingĩ mũno.c (Isa. 40:26) Weeka ũu ũkoona wambĩĩa kũmũnenga Yeova ndaĩa nenange. O na ũu wĩ o vo, kũmanya kana Yeova nĩ mũĩ na e vinya no mwambĩĩo wa kwĩthĩwa na ngwatanĩo nzeo nake. Nĩ kana ũmwende Yeova mũno, nĩwaĩle kũmanya maũndũ maingangĩ ĩũlũ wake.

7. Nĩ kana ũmwende Yeova vyũ, waĩle kwĩthĩwa na mũĩkĩĩo mũlũmu ĩũlũ wa kyaũ?

⁷ Nĩwaĩle kwĩthĩwa na mũĩkĩĩo mũlũmu kana Yeova nũkũthĩnĩkĩaa we mwene. Ĩndĩ nĩwĩthĩwa wĩwʼaa wĩ ũndũ wĩ vinya kũĩkĩĩa kana Mũmbi wa ĩtu na nthĩ nũkwĩsĩ na nũkũthĩnĩkĩaa? Ethĩwa vailye ũu, lilikana kana Yeova “nde vaasa na kĩla ũmwe witũ.” (Meko 17:26-28) Yeova “nũmanthaa ngoo syonthe,” na akwathĩte ũũ, o tondũ Ndaviti wamũtavisye Solomoni: “Ethĩwa ũkamũmantha, akooneka nue.” (1 Mav. 28:9) Kwa wʼo, wĩĩmanyĩsya Mbivilia nũndũ Yeova ‘nĩwaũkusisye.’ (Yel. 31:3) Waendeea kũelewa maũndũ maingĩ ala Yeova ũkwĩkĩte, ũkamwenda mũno.

8. Ũtonya kwonanyʼa ata kana nũtũngaa mũvea nũndũ wa kwendwa nĩ Yeova?

⁸ Nzĩa ĩmwe ũtonya kwonanyʼa kana nũtũngaa mũvea nũndũ wa kwendwa nĩ Yeova nĩ kũmũvoya. Weethĩwa na kĩmanyĩo kya kũmũelesya Ngai mathĩna maku na kũmũtũngĩa mũvea nũndũ wa maũndũ ala ũkwĩkaa, ũkoona wambĩĩa kũmwenda mũnango. Na ũnyanya waku na Yeova ũkaendeea kwongeleka woona ũndũ ũkũsũngĩa mboya syaku. (Sav. 116:1) Ũkekalaa ũte na nzika kana nũkũeleawa. Ĩndĩ nĩ kana ũmũthengeee Yeova mũnango, nĩwaĩle kũelewa ũndũ we wonaa maũndũ. O na ĩngĩ nĩwaĩle kũmanya kĩla we wendaa wĩke. Kĩla kĩtonya kũũtetheesya ũmanye maũndũ asu no kwĩmanyĩsya Ndeto yake, Mbivilia.

9. Ũtonya kwonanyʼa ata kana nĩwonaa Mbivilia yĩ ya vata?

⁹ Ĩmanyĩsye kwonaa Ndeto ya Ngai, Mbivilia, yĩ ya vata. No Mbivilia yĩ yoka ĩneenaa wʼo ĩũlũ wa Yeova na ĩkaweta nĩkĩ wakũmbie. Wonanasya kana nĩwonaa Mbivilia yĩ ya vata kwa kũmĩsoma kĩla mũthenya, kwĩyũmbanĩsya nesa ĩsomo yĩla ũkwĩmanyĩsya wĩ na mwalimũ waku, na kũtũmĩa kĩla weemanyĩsya. (Sav. 119:97, 99; Yoa. 17:17) We nĩwĩthĩawa na mũvango wa kũsoma Mbivilia wĩ weka? Nũatĩĩaa mũvango ũsu kĩla mũthenya?

10. Nĩ ũndũ ũmwe wĩva ũtumaa Mbivilia yĩthĩwa yĩ ya mwanya?

¹⁰ Ũndũ ũmwe ũtumaa Mbivilia yĩthĩwa yĩ ya mwanya nĩ kana yĩ na ngewa sya andũ moonie Yesũ. Noyo yĩ yoka yĩeleasya nesa maũndũ ala Yesũ ũkwĩkĩte. Waendeea kwĩmanyĩsya maũndũ ala Yesũ wawetie na eeka, ũu ũkatuma wenda kũtwʼĩka mũnyanyae.

11. Ũtonya kwĩmanyĩsya kũmwenda Yeova ata?

¹¹ Ĩmanyĩsye kũmwenda Yesũ, na kĩu kĩkatuma ũmwenda Yeova mũnango. Nĩkĩ? Nũndũ Yesũ nĩweeyĩelekanasya na Ĩthe wake nesa vyũ. (Yoa. 14:9) Kwoou, o ũndũ ũkwĩmanyĩsya maũndũ maingĩ ĩũlũ wa Yesũ, nowʼo ũkũendeea kũmũmanya Yeova na kũmwenda mũnango. Kwasũanĩa ũndũ Yesũ weewʼĩaa ĩnee andũ ala mavũthĩtwʼe, ta ngya, ala awau, na ala onzu. Sũanĩa ĩngĩ ũtao mũseo ũla ũkũnengae na ũndũ ũtumaa maũndũ maku maseũvanga waũatĩĩa.—Mt. 5:1-11; 7:24-27.

12. Ũkeeka ata weemanyĩsya ĩũlũ wa Yesũ?

¹² Ũkamwenda Yesũ mũnango wavindĩĩsya mũno ĩũlũ wa nthembo ĩla waumisye nĩ kana naĩ sitũ iekewe. (Mt. 20:28) Waelewa kana Yesũ akwie kwondũ waku na ngenda, ũu no ũtume wĩlila na ũimwĩsũva Yeova akũekee. (Meko 3:19, 20; 1 Yoa. 1:9) Na wamwenda Yesũ na Yeova, ũkenda ala mamendete.

13. Naaũ Yeova ũkũnengete?

¹³ Ĩmanyĩsye kwenda andũ ala mamwendete Yeova. Anyanyau na andũ maku ma mũsyĩ ala mate Ngũsĩ no malee kũelewa nĩkĩ ũkwenda kwĩyumya ũmũthũkũme Yeova. O na no mambĩĩe kũũvĩnga. Ĩndĩ Yeova akaĩkĩĩthya kana wĩ na ana-a-asa na eĩtu-a-asa kĩkundinĩ ala makatumaa wĩwʼa ta wĩ na andũ ma mũsyĩ. Wekala vakuvĩ namo, makaũtwʼĩĩkaa na ũkewʼaa wendetwe. (Mko. 10:29, 30; Aevl. 10:24, 25) Ĩtina wa ĩvinda, andũ maku ma mũsyĩ no mambĩĩe kũmũthũkũma Yeova na kũatĩĩa myolooto yake.—1 Vet. 2:12.

14. Kwosana na ĩandĩko ya 1 Yoana 5:3, nĩ kyaũ wĩyoneete nũndũ wa kũatĩĩa myolooto ya Yeova?

¹⁴ Ĩmanyĩsye kwona myolooto ya Yeova yĩ ya vata na ũimĩatĩĩaa. Ũtanamba kũmũmanya Yeova no wĩthĩwe weetwʼĩĩaa kĩla kĩseo na kĩla kĩthũku, ĩndĩ yu nĩwonete kana myolooto ya Yeova nĩyo mĩseo. (Sav. 1:1-3; soma 1 Yoana 5:3.) Kwasũanĩa ũtao ũla Mbivilia ĩnengete aũme, iveti, asyai, na syana. (Aev. 5:22–6:4) We na andũ maku nĩmwĩthĩĩtwe mũyĩkalanyʼa nesanga nũndũ wa kũatĩĩa ũtao ũsu? Nĩwĩthĩĩtwe na mwĩkalĩle mũseango nũndũ wa kũatĩĩa ũtao wa Yeova ĩũlũ wa kũnyuva anyanya kwa ũĩ? Wĩ mũtanu mũnango? (Nth. 13:20; 1 Ako. 15:33) Nĩ ũndũ ũtonyeka ũkethĩa ũsũngĩo waku nĩ, “Ĩĩ.”

15. Ũtonya kwĩka ata ethĩwa nũkwenda kũmanya kũtũmĩa myolooto ya Mbivilia?

¹⁵ Mavinda angĩ, nũtonya kwĩthĩwa ũtekũelewa ũndũ waĩle kũtũmĩa myolooto ĩla ũkwĩmanyĩsya ya Mbivilia. Nĩkyo kĩtumi Yeova ũtũmĩaa ũseũvyo wake kũũseũvĩsya mavuku na syĩndũ itonya kũũtetheesya kũvathũkanyʼa ũseo na ũthũku. (Aevl. 5:13, 14) Wasoma na weemanyĩsya ũtũmĩĩte syĩndũ isu, nũkwona ũndũ myolooto ya Mbivilia ĩneeneete maũndũ ũtheinĩ na ũndũ ũtethekaa wamĩtũmĩa, na kĩu kĩkatuma wenda kwĩthĩwa nthĩnĩ wa ũseũvyo wa Yeova.

16. Yeova avangĩte andũ make ata?

¹⁶ Ĩmanyĩsye kwenda ũseũvyo wa Yeova na kũũkwata mbau. Yeova avangĩte andũ make nthĩnĩ wa ikundi, na Mwana wake, Yesũ, nĩwe mũtwe wa ikundi syonthe. (Aev. 1:22; 5:23) Nake Yesũ anyuvĩte kakundi kanini ka aũme etĩkĩwʼa mauta matongoesye wĩa ũla wendaa ũtethwʼe ũmũnthĩ. Yesũ eetie aũme asu “ngombo ndĩkĩĩku na mbũĩ,” na nĩmosaa kwa ũito kĩanda kyoo kya kũkũĩthya kĩ-veva na kũũtetheesya ndũkanange ngwatanĩo yaku na Ngai. (Mt. 24:45-47) Ũndũ ũmwe ngombo ĩsu ndĩkĩĩku yĩkaa nĩ kana ĩũtetheesye nĩ kũĩkĩĩthya atumĩa maĩlĩte nĩmanyuvwa nĩ kenda maũtongoesye na maikũsũvĩa. (Isa. 32:1, 2; Aevl. 13:17; 1 Vet. 5:2, 3) Atumĩa nĩmeyumĩtye kwĩka kĩla matonya, maũkiakisye, na maikũtetheesya ũendeee kũseũvya ngwatanĩo yaku vamwe na Yeova. Ĩndĩ ũndũ ũla wa vata matonya kwĩka nĩ kũũtetheesya ũmanyĩsye angĩ ĩũlũ wa Yeova.—Aev. 4:11-13.

17. Kwosana na ĩandĩko ya Alomi 10:10, 13, 14, nĩkĩ tũmanyĩasya angĩ ĩũlũ wa Yeova?

¹⁷ Tetheesya angĩ mamwende Yeova. Yesũ eaĩe aatĩĩi make mamanyĩsye angĩ ĩũlũ wa Yeova. (Mt. 28:19, 20) Mũndũ nũtonya kũatĩĩa mwĩao ũsu aĩ no ũndũ nĩwĩsĩ nĩwaĩle kũũatĩĩa. Ĩndĩ o ũndũ waendeea kũmwenda Yeova, ũkewʼaa o ũndũ mũtũmwa Vetelo na mũtũmwa Yoana meewʼaa yĩla maisye: “Tũitonya kũeka kũneena ĩũlũ wa maũndũ ala twonete na kwĩwʼa.” (Meko 4:20) No maũndũ manini matonya kũtũetee ũtanu ta ũla tũkwataa twatetheesya mũndũ amwende Yeova. We wĩona Vilivu ta watanie ata yĩla watetheeisye ũla Mũethiovia kũmanya ũwʼo ũla wĩ Maandĩkonĩ na avatiswa? Waatĩĩa ngelekanyʼo ya Vilivu na waatĩĩa mwĩao wa Yesũ wa kũtavanyʼa, ũkeethĩwa ũyĩĩkĩĩthya kana nũkwenda kũtwʼĩka Ngũsĩ ya Yeova. (Soma Alomi 10:10, 13, 14.) Weeka ũu, ũkeethĩwa ũtonya kũkũlya ĩkũlyo yĩĩ yakũlilwʼe nĩ ũla Mũethiovia: “Nĩ kyaũ kĩũnziĩĩa kũvatiswa?”—Meko 8:36.

18. Twĩneenea kyaũ ĩsomonĩ yĩla yĩatĩĩe?

¹⁸ Watwʼa kũvatiswa, ũkeethĩwa weeka ũtwi ũla mũnene vyũ thayũnĩ waku. Na nũndũ ũsu nĩ ũtwi wa vata mũno, nĩwaĩle kũũvindĩĩsya mũno. Kwoou nĩ kyaũ waĩle kũmanya ĩũlũ wa kũvatiswa? Waĩle kwĩka ata ũtanamba kũvatiswa na ĩtina wa kũvatiswa? Makũlyo asu masũngĩĩtwe ĩsomonĩ yĩla yĩatĩĩe.