We Nĩwĩyũmbanĩtye Kwĩyumya Ũmũthũkũme Yeova?

1-2. Mũndũ aĩlĩte kwĩka ata atanavatiswa?

KWA ĨVINDA ya myaka ĩtano mĩvĩtu, andũ mbee wa milioni ĩmwe nĩmavatisĩtwe makatwʼĩka Ngũsĩ sya Yeova. O ta Timotheo, aingĩ moo mamanyĩiwʼe ũwʼo kuma me ‘syana nini.’ (2 Tim. 3:​14, 15) Angĩ meemanyĩisye ĩũlũ wa Yeova me andũ aima, namo angĩ me akũũ. Ĩvinda yĩ navu ĩtina, ve mũndũ mũka ũmwe weemanyĩisye ũwʼo na Ngũsĩ sya Yeova na avatiswa e na myaka 97!

² Ethĩwa wĩ mũmanyĩwʼa wa Mbivilia kana asyai maku nĩ Ngũsĩ, nĩwĩthĩwa ũisũanĩa kũvatiswa? Mwa ũsu nĩ ũtwi wa vata mũno! Ĩndĩ ũtanamba kũvatiswa, nĩwaĩlĩte kwĩyumya ũmũthũkũme Yeova. Ĩsomo yĩĩ nĩyĩkũelesya mũndũ eyumasya ata, na kwĩka ũu kwĩthĩawa kũkonetye maũndũ meva. O na ĩngĩ, nĩyĩũkũtetheesya kwona nĩkĩ ũtaĩle kũkĩa kwĩyumya ũmũthũkũme Yeova na kũvatiswa, ethĩwa nĩwĩyũmbanĩtye kwĩka ũu.

KWĨYŨMYA ŨMŨTHŨKŨME YEOVA NĨ KWĨKA ATA?

3. Nengane ngelekanyʼo sya amwe mawetetwe Mbivilianĩ meeyumisye mamũthũkũme Yeova.

³ Mbivilianĩ, kwĩyumya ũmũthũkũme Yeova kwonanasya kũvathwa kwondũ wa wĩa wa mwanya. Aisilaeli maĩ mbaĩ yanyuvĩtwe ĩmũthũkũme Yeova. Ĩndĩ mbaĩnĩ ĩsu, ve o amwe mavathĩtwe mamũthũkũme Yeova kwa nzĩa ya mwanya. Kwa ngelekanyʼo, Aluni nĩweekĩaa ‘ngovia ntheu ya ũsumbĩ,’ kana kĩlaũnĩ kya thaavu, ngalĩko ya mbee ngutwʼanĩ. Kĩlaũnĩ kĩu kya thaavu kyoonanasya kana avathĩtwe athũkũme ũthũkũmi wa mwanya e mũthembi mũnene Isilaeli. (Ali. 8:9) O namo Anasili manyuvĩtwe mamũthũkũme Yeova kwa nzĩa ya mwanya. Ndeto “Mũnasili” kana “Mũnasali,” yumanĩte na ndeto ya Kĩevelania nazirʹ, ĩla yonanasya “mũndũ mũvathe,” kana “wĩyumĩtye” kwondũ wa ũthũkũmi wa mwanya. Ve Mĩao ĩmwe Anasili me oka maaĩlĩte kũatĩĩa yatalanĩtwʼe Mĩaonĩ ya Mose.—Mot. 6:​2-8.

4. (a) Yĩla weyumya ũmũthũkũme Yeova wĩthĩawa watwʼa kwĩka ata? (b) ‘Kwĩlea mwene’ kwonanasya ata? (O na ĩngĩ, sisya visa.)

⁴ Yĩla weyumya ũmũthũkũme Yeova, wĩthĩawa watwʼa kũtwʼĩka mũmanyĩwʼa wa Yesũ Klĩsto na watwʼa kwĩkaa kwenda kwa Ngai mbee wa maũndũ ala maku. Kwĩyumya ũmũthũkũme Yeova kũkonetye maũndũ meva? Yesũ aisye: “Ethĩwa mũndũ o na wĩva nũkwenda kũngatĩĩa, nĩ elee mwene.” (Mt. 16:24) Ndeto sya Kĩkiliki ila ialyũlĩtwe “nĩ elee mwene” no syonanyʼe “kũlea kwĩkala thayũ kwondũ waku mwene.” Weeyumya ũmũthũkũme Yeova, nĩwaĩlĩte kũleana na kĩndũ o na kĩva kĩtosanĩte na kwenda kwake. (2 Ako. 5:​14, 15) Ũu nĩ vamwe na kwĩvathana na “mawĩa ma mwĩĩ,” ta mwĩkalĩle mũthũku wa ũlaalai. (Aka. 5:​19-21; 1 Ako. 6:18) Yo kũatĩĩa mĩao ĩsu nĩkũtumaa maũndũ meta? Ti wʼo, ethĩwa nũmũĩkĩĩe Yeova na nũĩkĩĩe vyũ kana kũatĩĩa mĩao yake nĩkũkũunaa. (Sav. 119:97; Isa. 48:​17, 18) Mwana-a-asa wĩtawa Nicholas aisye, “No wone myolooto ya Yeova ta syũma sya yela ila iũsiĩĩaa kwĩka maũndũ ala ũkwenda kwĩka, kana ũkamyona ta syũma isiĩĩe mĩnyambũ vandũ nĩ kana ndũkakwatwe nĩ mũisyo.”

5. (a) Mũndũ eyumasya ata amũthũkũme Yeova? (b) Ve kĩvathũkanyʼo kĩva katĩ wa kwĩyumya ũmũthũkũme Yeova na kũvatiswa? (O na ĩngĩ, sisya visa.)

⁵ Ũtonya kwĩyumya ata ũmũthũkũme Yeova? Nĩ kwa kũmwatha mboyanĩ kana ũkamũthaithaa e weka na ũkavĩtasya kwenda kwake mbee thayũnĩ waku. Na ĩndĩ ũimwatha kana ũkamwendaa na “ngoo yaku yonthe, na thayũ waku wʼonthe, na kĩlĩko kyaku kyonthe na vinya waku wʼonthe.” (Mko. 12:30) Wĩkaa ũu kĩmbithĩnĩ, na nĩ kĩndũ kĩthĩawa katĩ waku na Yeova. Kĩvathũkanyʼo na ũu, kũvatiswa nĩ ũndũ wĩkaa ũtheinĩ, na wĩthĩawa wonyʼa andũ ala angĩ kana nĩwĩyumĩtye ũmũthũkũme Yeova. Kwĩyumya ũmũthũkũme Yeova nĩ wĩvĩto ũte wa kũvũĩwa ngũĩ. Ũtwi waku waĩlĩte kwĩthĩawa no kwĩanĩsya wĩvĩto ũsu, na Yeova nĩwendaa wĩke ũu.—Mũta. 5:​4, 5.

NĨKĨ WAĨLITE KWĨYUMYA ŨMŨTHŨKUME YEOVA?

6. Nĩ ũndũ wĩva ũtumaa twĩyumya tũmũthũkũme Yeova?

⁶ Kũmwenda Yeova nĩkwʼo ũndũ ũla mũnene ũtumaa twĩyumya tũmũthũkũme. Wendo ũsu ndumanaa na ũndũ tũkwĩwʼa. Ĩndĩ wumanaa na “ũmanyi wa wʼo” ĩũlũ wake na ĩũlũ wa ieleelo syake. (Ako. 1:9) Kwĩmanyĩsya Mbivilia nĩkũkũĩkĩĩthĩtye kana (1) Yeova e kwʼo, (2) Mbivilia nĩ Ndeto yake mbeveee, na (3) atũmĩaa ũseũvyo wake kwĩanĩsya ieleelo syake.

7. Nĩ maũndũ meva ũtonya kwĩka ũtambĩte kwĩyumya ũmũthũkũme Ngai?

⁷ Ala meyumĩtye mamũthũkũme Yeova nĩmaĩle kwĩthĩwa mesĩ momanyĩsyo ma mũsingi ma Ndeto yake na nĩmaĩle kwĩthĩwa maatĩĩaa myolooto yayo thayũnĩ woo. Eka ũu, nĩmatataa ũndũ matonya matavye angĩ kĩla memanyĩĩtye. (Mt. 28:​19, 20) Kĩu nĩkĩtumĩte mamwenda Yeova mũnango na matwʼa na ngoo yonthe kũmũthaitha e weka. Ũu tyo wʼo vailye kwaku? Weethĩwa na wendo wa mũthemba ũsu, ndũkeyumya ũmũthũkũme Yeova aĩ nĩ kana wendeesye mwalimũ waku wa Mbivilia, asyai maku, kana anyanyau.

8. Kũtũnga mũvea kũkonanĩtye ata na kwĩyumya ũmũthũkũme Yeova? (Savuli 116:​12-14)

⁸ Wasũanĩa maũndũ onthe ala Yeova ũkwĩkĩte, kĩu kĩkatuma wenda kũmũtũngĩa mũvea na ũyĩyumya ũmũthũkũme. (Soma Savuli 116:​12-14.) Mbivilia yaasya kana Yeova nĩwe Mũnengani wa “kĩla mũthĩnzĩo mũseo na mwĩanĩu.” (Yak. 1:17) Mũthĩnzĩo ũla mũnene vyũ ũtũnengete nĩ nthembo ya Mwana wake, Yesũ. Kwasũanĩa ũndũ nthembo ĩsu ne ya vata! Nĩyo ĩtumĩte wĩthĩwa na ngwatanĩo nzeo na Yeova. O na ĩngĩ, Yeova nũtũnengete wĩkwatyo wa thayũ wa tene na tene. (1 Yoa. 4:​9, 10, 19) Ũndũ ũla mũnene vyũ ũtonya kwĩka wonanyʼe nũũmũtũngĩa mũvea nũndũ wa wendo wake na moathimo onthe ala ũkũnengete, nĩ kwĩyumya ũmũthũkũme. (Kũt. 16:17; 2 Ako. 5:15) Nthĩnĩ wa ĩvuku Tanĩa Thayũ Tene na Tene! ĩsomo ya 46, wasisya ũndũ mũnene wa 4 o vamwe na vitio ya ndatĩka itatũ yĩ na kyongo, Kũmũnenga Ngai Mĩthĩnzĩo Yitũ nũkwona ũndũ tũtonya kwonanyʼa kana nĩtũũtũnga mũvea.

WE NĨWĨYŨMBANĨTYE KWĨYUMYA ŨMŨTHŨKŨME YEOVA NA KŨVATISWA?

9. Nĩkĩ mũndũ ũtaĩle kũthingʼĩĩwʼa eyumye amũthũkũme Yeova?

⁹ No wĩwʼe ta ũteyũmbanĩtye kwĩyumya ũmũthũkũme Yeova na kũvatiswa. Na no wĩwʼe ũyenda kwĩka moalyũku mana nĩ kana wĩkale kwosana na myolooto yake, kana ũkewʼa ũyenda ĩvinda yingangĩ ya kũlũlũmĩĩlya mũĩkĩĩo waku. (Ako. 2:​6, 7) Ti amanyĩwʼa onthe ma Mbivilia mekaa maendeeo ũndũ ũmwe, na ti andũ onthe ma mũika methĩawa meyũmbanĩtye kwĩyumya mamũthũkũme Yeova na kũvatiswa me ma ĩika yĩmwe. Tata ũthiane maendeeo maku ma kĩ-veva kwosana na ũtonyi waku, ũte kwĩyĩelekanyʼa na mũndũ ũngĩ.—Aka. 6:​4, 5.

10. Ũtonya kwĩka ata weethĩa kana ndwĩyũmbanĩsye kwĩyumya ũmũthũkũme Yeova na kũvatiswa? (O na ĩngĩ, sisya ĩsandũkũ “Kwondũ wa Amũika Ala Asyai Moo nĩ Ngũsĩ.”)

¹⁰ O na yĩla weethĩa kana ndwĩyũmbanĩsye kwĩyumya ũmũthũkũme Yeova, endeea kũvindĩĩsya ĩũlũ wa ĩtambya yĩu. Mũvoye Yeova aathime kĩthito kyaku kya kwĩka moalyũku ala maĩlĩte. (Avi. 2:13; 3:16) Na ĩthĩwa na mũĩkĩĩo vyũ kana nũkũkwĩthukĩĩsya na aikũsũngĩa.—1 Yoa. 5:14.

NĨKĨ AMWE MAKĨAA KWĨYUMYA NA KŨVATISWA?

11. Yeova atũtetheeasya ata twĩkale twĩ aĩkĩĩku?

¹¹ Amwe meyũmbanĩtye kwĩyumya na kũvatiswa nĩmakĩaa kwĩka ũu. No mekũlye-ĩ, ‘Nata neeka naĩ ngito na nditengwa?’ Ethĩwa wĩ na wia ũsu, ĩthĩwa na mũĩkĩĩo kana Yeova nũkũũnenga kyonthe kĩla ũkwenda ‘nĩ kana wĩkale kwosana na ũndũ ũkwenda [na] nĩ kenda ũmwendeesye vyũ.’ (Ako. 1:10) O na ĩngĩ, akaũtetheesya wĩke kĩla kyaĩle. Nĩwonanĩtye nesa kana no eke ũu nũndũ nũtetheesye angĩ aingĩ. (1 Ako. 10:13) Nĩkyo kĩtumi no andũ avũthũ matengawa kĩkundinĩ kya Kĩklĩsto. Yeova nũtetheeasya andũ make mekale me aĩkĩĩku.

12. Nĩ kyaũ kĩtonya kũũtetheesya ndũkeke naĩ ngito?

¹² Vai mũndũ ũtatatwa eke maũndũ mathũku. (Yak. 1:14) Ĩndĩ we mwene nĩwaĩle kũnyuva kĩla ũkwĩka yĩla watatwa. Ũwʼo nĩ kana no we mwene ũtonya kwĩtwʼĩĩa ũndũ ũkwĩkala. Andũ amwe maasya kana ndwĩsa kũvĩndũa ũndũ ũkwĩwʼa kana maũndũ ala ũkwenda kwĩka, ĩndĩ ũsu nĩ ũvũngũ. No wĩmanyĩsye kũsiĩĩa mawendi mataĩle. Kwoou o na yĩla watatwa, no ũnyuve kũlea kwĩka ũndũ ũtaĩle. Ve na maũndũ matonya kũũtetheesya nĩ kana ndũkeke naĩ. Kwa ngelekanyʼo, mũvoye Yeova kĩla mũthenya. Ĩthĩwa na mũvango mũseo wa kwĩmanyĩsya Ndeto ya Ngai. Endaa maũmbanonĩ ma Kĩklĩsto. Tavasya angĩ maũndũ ala ũĩkĩĩaa. Kwĩka maũndũ asu ũteũtĩĩa kũkaũtetheeasya wĩanĩsye wĩvĩto waku wa kwĩyumya ũmũthũkũme Yeova. Na ndũkaaũlwe nongi kana Yeova akaũtetheeasya wĩke ũu.—Aka. 5:16.

13. Yosevu atũtiĩie ngelekanyʼo nzeo ũndũnĩ wĩva?

¹³ Ũkeethĩwa wĩ ũndũ wĩ laisi kwĩkala wĩ mũĩkĩĩku kwa Yeova ethĩwa ũkatwʼa kwĩ tene ũndũ ũkeka watatwa. Mbivilia nĩtũtavĩtye andũ amwe meekie kĩu, o na kaũ maĩ o ene naĩ. Kwa ngelekanyʼo, mũka wa Votivali nĩwatatie ĩngĩ na ĩngĩ kũmũsesenga Yosevu akome nake. Ĩndĩ Yosevu nĩweesĩ nesa kĩla ũkwĩka. Mbivilia ĩtũtavĩtye ũũ: ‘Nĩwaleile,’ na asya: “Ndonya ata kwĩka ũthũku ũsu mũnene, na kũmũvĩtanĩsya Ngai?” (Mwa. 39:​8-10) Kwa wʼo, Yosevu nĩweesĩ kĩla waaĩlĩte kwĩka o na atanatatwa. Kĩu nĩkyamũtetheeisye kwĩka ũla ũseo yĩla watatiwe.

14. Tũtonya kwĩka ata nĩ kana tũikese kwĩka ũndũ ũtaĩle?

¹⁴ Ũtonya kũatĩĩa ngelekanyʼo ya Yosevu ata? No ũtwʼe yu tũĩ kĩla ũkeka watatwa. Ĩmanyĩsye kũleana vau kwa vau na kĩla Yeova ũmenete; o na ndũketĩkĩle kũsũanĩa ĩũlũ wakyo. (Sav. 97:10; 119:165) Weeka ũu, ndũkeka naĩ watatwa. Ũkeethĩawa wĩsĩ kĩla ũtonya kwĩka kwĩ tene.

15. Ũtonya kũmwonyʼa Yeova ata kana ‘nũmũmanthaa na kĩthito’? (Aevelania 11:6)

¹⁵ Nĩvatonyeka ũkethĩwa ũmanyĩte kana nũkwatĩte ũwʼo na ũyenda kũmũthũkũma Yeova na ngoo yonthe, ĩndĩ ndwĩthĩa ve kĩndũ ũkwĩwʼa kĩyĩũsiĩĩa kwĩyumya ũmũthũkũme na kũvatiswa. Ethĩwa vailye ũu, no wĩke o kĩla Mũsumbĩ Ndaviti weekie. No ũmwĩsũve Yeova ũkamwĩa: “Nthiana, ame Ngai, na manya ngoo yakwa: Ndata, na manya mosũanĩo makwa; noisisya ethĩwa ve nzĩa nthũku nthĩnĩ wakwa, noindongoesya nzĩanĩ ya tene na tene.” (Sav. 139:​23, 24) Na Yeova nũathimaa “ala mamũmanthaa na kĩthito.” Kwona ũyenda kwosa ĩtambya ya kwĩyumya na kũvatiswa kwĩonanyʼa kana nũendeee kwĩka ũu.—Soma Aevelania 11:6.

ENDEEA KŨMŨTHENGEEA YEOVA

16-17. Yeova akusasya ata ala maeewe ũwʼonĩ? (Yoana 6:44)

¹⁶ Yesũ aisye kana Yeova nĩwe ũkusasya amanyĩwʼa make. (Soma Yoana 6:44.) Ũsu nĩ ũndũ wa mwanya mũno! Ve ũseo wĩthĩawa onete nthĩnĩ wa kĩla mũndũ ũmũkusasya kwake. Onaa kĩla ũmwe witũ e malĩ “yake mwene.” (Kũt. 7:6) O naku akwonaa oou.

¹⁷ Ĩndĩ nĩvatonyeka ũkethĩwa wĩ mũndũ wa mũika ũeetwe nĩ asyai Ngũsĩ. No wĩwʼe ta ũmũthũkũmaa Yeova nũndũ wa asyai maku, ĩndĩ ti nũndũ nũkũkusĩtye we mwene. O na vailye ũu, Mbivilia yaĩtye: “Thengeeai Ngai, nake akamũthengeea inywʼĩ.” (Yak. 4:8; 1 Mav. 28:9) Yĩla we mwene woosa ĩtambya ya kũmũthengeea Yeova, o nake nĩwĩkaa ũu. Nũkwĩsĩ nesa na ndakwonaa ta wĩ wa mũsyĩ wa Nganyʼa wa nganyʼa. Akusasya mũndũ ũmwe ũmwe, o na ala maeewe ũwʼonĩ. Yĩla ũmwe woosa ĩtambya ya mbee ya kũmũthengeea, o nake nũmũthengeeaa, o tondũ twoona nthĩnĩ wa Yakovo 4:8.—Sianĩsya na 2 Athesalonika 2:13.

18. Twĩneenea kyaũ ĩsomonĩ yĩla yĩatĩĩe? (Savuli 40:8)

¹⁸ Yĩla weeyumya ũmũthũkũme Yeova na wavatiswa, wĩthĩawa weeka o ta Yesũ. We nĩweeyumisye na ngenda eeka kyonthe kĩla Ĩthe wake wamũtavisye. (Soma Savuli 40:8; Aevl. 10:7) Ĩsomo yĩla yĩatĩĩe nĩyĩneeneete kĩla kĩtonya kũũtetheesya ũendeee kũmũthũkũma Yeova wĩ mũĩkĩĩku ĩtina wa kũvatiswa.