Nĩkĩ Kũendeee Kwĩthĩwa na Kaũ na Ithokoo?

NAĨ

Ngai oombie asyai maitũ ma mbee, Atamu na Awa, na mũvwʼano wake. (Mwambĩlĩĩlyo 1:27) Kĩu kĩonanyʼa kana maĩ matonya kwĩthĩwa na nguma ila Ngai wĩthĩawa nasyo, ta mũuo na wendo. (1 Akolintho 14:33; 1 Yoana 4:8) O na vailye ũu, Atamu na Awa, nĩmaleile kũmwĩwʼa Ngai na meeka naĩ. Nũndũ wa ũu, ithyonthe nĩtwatiĩwe ũkombo wa naĩ na kĩkwʼũ. (Alomi 5:12) Naĩ ĩtumaa tũsũanĩa maũndũ mathũku na twĩka maũndũ ma ũngʼendu.—Mwambĩlĩĩlyo 6:5; Maliko 7:​21, 22.

SILIKALĨ SYA ANDŨ

Ngai ndaatũmba twĩ na ũtonyi wa kwĩtongoesya. Mbivilia yaĩtye: “Kũtongoesya matambya make kũti nthĩnĩ wa mũndũ ũla ũendaa.” (Yelemia 10:23) Nũndũ wa ũu, silikalĩ sya andũ iyĩsa kũmina vyũ kaũ na ũngʼendu.

SATANI NA NDAIMONI SYAKE

Mbivilia ĩvuanĩtye kana “nthĩ yonthe yĩ ungu wa vinya wa ũla mũthũku.” (1 Yoana 5:19) Ũsu “mũthũku” nĩ Satani, ũla nĩwe Ndevili, na nĩ mũaani. (Yoana 8:44) We na Ndaimoni syake nĩmo matumaa andũ mambĩĩsya kaũ na ũngʼendu.—Ũvuanyʼo 12:​9, 12.