“Nĩnaekie Kwĩwʼa Nde wa Vata”

KWĨANA KWAKWA

Nasyaĩwe Ciudad Obregón, ĩla yĩ ngalĩko ya ĩũlũ nthĩ ya Mexico. Kwitũ tũsyaĩtwe twĩ kenda, na nyie nĩ wa katano. Twekalaa nza wa taoni, na ĩthe-akwa aĩ na kamũlũnda kanini. Vau twekalaa vaĩ vandũ vaseo, na mũsyĩ witũ waĩ na ngwatanĩo, na twaĩ atanu. Ũndũ wa kũmakya nĩ kana, yĩla naĩ na myaka ĩtano, kĩuutani kĩnene nĩkyaanangie kamũlũnda kau kaitũ, na kwoou twathamĩĩa taoninĩ ĩngĩ.

Ĩtina wa kũthama, ĩthe-akwa nĩwambĩĩie kũkwata mbesa mbingangĩ. Ĩvindanĩ o yĩu, nĩwambĩĩie kũnywʼa mũno. Ũu nĩwatumie mũtwaano wa asyai maitũ vamwe na mũsyĩ witũ wʼonthe ũendeea naĩ. Nĩ na imwana ilĩ tũsyaanĩwʼe nĩtwambĩĩie kũnywʼa sikala ila twoyĩaa ĩthe-akwa. Na nĩ na myaka thanthatũ nĩ wʼo nanywie ya mbee namilwa. Ĩvinda ĩkuvĩ ĩtina wa vau, asyai maitũ nĩmatanĩisye na mwĩkalĩle wakwa wathũkĩĩa.

Inyia-akwa nĩwambĩĩie kwĩkalanyʼa na mũndũũme ũngĩ, na atwosa twathi kwĩkalaa kũu. Mũndũũme ũsu ndanengae inyia witũ mbesa, na mbesa ila inyia-akwa wakwataa iyaĩ itonya kwĩanĩsya mavata maitũ. Kwoou, nĩ na syana ila tũsyaanĩwʼe nĩtwambĩĩie kũthũkũma tũwĩla o tũla twakwata, ĩndĩ tũvesa tũla twakwataa tũyaĩ tũtonya kwĩanĩsya mavata maitũ ithyonthe. Nakũnĩaa andũ iatũ langi, ngathoosya mĩkate, makaseti, na syĩndũ ingĩ. O na ĩngĩ, natũlũlaa taoninĩ ndimantha lĩu kũla andũ athwii mekasya takataka.

Yĩla naĩ na myaka ĩkũmi, mũndũũme ũmwe nĩwambandĩkie nĩthũkũmae nake vala vekawʼa takataka wa taoni ĩsu. Nĩnakolile sukulu, nauma mũsyĩ, na nathi kũthũkũma nake. Andĩvaa tũvesa tũnini na anengae lĩu ũla weethĩaa akolanĩtye vala vekawʼa takataka. Nekalaa kasũmbanĩ naakie ndũmĩĩte syĩndũ ila syĩkawʼa. Andũ ala nekalaa vakuvĩ namo matũmĩaa ndeto nthũku na maĩ na mwĩkalĩle mũthũku mũno. Aingĩ moo matũmĩaa ndawa sya kũmila, na manyusaa mũno. Yĩu nĩyo yaĩ ĩvinda ĩthũku vyũ thayũnĩ wakwa, na naĩaa kĩla ũtukũ nĩthĩlĩĩte nũndũ wa wia. Neewʼaa nde wa vata nũndũ naĩ ngya na naĩ na kĩsomo kĩnini. Nekalile vau vekawʼa takataka vakuvĩ myaka ĩtatũ na ĩtina nathamĩĩa kĩsionĩ kĩngĩ nthĩ ya Mexico. Nĩ kũu nathũkũmaa mĩũndanĩ ndiketha malaa na vamba, kũmbanyʼa iwa, na kwĩnza maluu.

Ĩtina wa myaka ĩna, nĩnasyokie Ciudad Obregón. Mũndũ mũka ũsyaanĩwʼe na ĩthe-akwa, ũla waĩ mũndũ mũe, nĩwanengie kasũmba kwake. Nĩnambĩĩie kũota ndoto nthũku na sya kũtelemya, na ũu watuma nĩkwʼa ngoo mũno nginya nenda kwĩyũaa. Mũthenya ũmwe ũtukũ, nĩnamũvoyie Ngai na namwĩa: “Mwĩaĩi, ethĩwa wĩ vo, nĩenda kũũmanya nĩ kana ngũthũkũme thayũ wakwa wʼonthe. Ethĩwa kwĩ ndĩni ya wʼo, ndetheesye nĩmĩmanye.”

ŨNDŨ MBIVILIA YAALYŨLILE MWĨKALĨLE WAKWA

Kuma nĩ mũnini nĩnendeeawʼa nĩ kũmũmanya Ngai. Nĩ mũnini nĩnaendie makanisanĩ maingĩ me kĩvathũkanyʼo, ĩndĩ vaiĩ yĩmwe yaambendeesya. Me onthe vaiĩ yĩmwe yaneeneaa mũno ĩũlũ wa Mbivilia kana yĩkandetheesya kũmũmanya Ngai. Makanisanĩ amwe, kĩndũ kĩla kyaĩ kya vata kwoo nĩ mbesa, na angĩ athaithi maĩ na mwĩkalĩle mũthũku.

Nĩ na myaka 19, mũndũũme watwaĩte mwĩĩtu tũsyaanĩwʼe nĩwandavisye kana Ngũsĩ sya Yeova nĩsyamwonetye kĩla Mbivilia ĩmanyĩasya ĩũlũ wa kũtũmĩa mĩvwʼanano. Nĩwanzomeie ĩandĩko ya Kuma 20:4, 5. Yaĩtye kana tũyaĩlĩte kwĩseũvĩsya mĩvwʼanano myasũvye. Mũsoa wa 5 waĩtye: “Ndũkamĩkunamĩe, o na ndũkamĩthũkũme; nũndũ nyie Yeova Ngai waku nĩ Ngai wĩ kĩwĩu.” Na ĩndĩ angũlya, “Ethĩwa Ngai atũmĩaa mĩvwʼanano kwĩka syama, kana ethĩwa endaa tũmĩtũmĩe kũmũthaitha, nĩkĩ ũtũvatanĩte nayo?” Ũu watumie nenda kũmanya maũndũ maingangĩ. Ĩtina wa vau nĩtwaneeneie maũndũ angĩ Mbivilia ĩmanyĩasya. Nĩnatanaa mũno yĩla tũũneenea maũndũ asu nginya ndyamanyaa ũndũ ĩvinda yaendaa.

Ĩtina nĩwandwaie maũmbanonĩ ma Ngũsĩ sya Yeova. Nĩnendeeiwʼe mũno nĩ kĩla noonie na neewʼa maũmbanonĩ asu. Nĩnasengʼie kwona andũ ma mũika mayumya maelesyo, na kũmanyĩsya nesa me ngyukwaanĩ. Nasũanĩie, ‘Mwa vandũ vaa andũ maimanyĩawʼa nesa!’ O na kau ndyaĩ mũtheu na naĩ na nzwʼĩĩ ndaasa, Ngũsĩ nĩsyanthokisye nesa. O na mũsyĩ ũmwe nĩwanthokisye tũtanĩe kyaũya kya wĩoo ĩtina wa ũmbano!

Kwĩmanyĩsya Mbivilia na Ngũsĩ sya Yeova nĩkwandetheeisye kũmanya kana Yeova Ngai nĩ Ĩthe wĩ wendo, na nũtũthĩnĩkĩaa o na twĩthĩwe twĩ athwii kana twĩ ngya, twĩthĩwe tumĩte va, twĩ ma mbaĩ yĩva, kana twĩ asomu kana tũi asomu. Kwa wʼo we nde kyende. (Meko 10:34, 35) Yu nĩnaendeee kwĩanĩsya wendi wakwa wa kĩ-veva ũla naĩ nawʼo kuma nĩ mũnini. Neewʼaa nĩ mũtanu, na ndyewʼaa ta nĩkosete kĩndũ kya vata thayũnĩ wakwa.

MOATHIMO ALA NĨKWATĨTE

Nĩnambĩĩe kwĩka moalyũku mwĩkalĩlenĩ wakwa. Nĩnaekie kũnywʼa sikala, kũnywʼa mũno na kũtũmĩa ndeto nthũku. Ũthatu ũla nooveee ngoonĩ kuma nĩ mũnini nĩwambĩĩie kũthela, na naeka kũota ndoto nthũku. O na nĩnaekie kwĩwʼa nde wa vata nũndũ wa mathĩna ala nakomanie namo nĩ mũnini na nũndũ wa kwĩthĩwa nde mũsomu mũno.

Yu nĩ na kĩveti kĩseo kĩmwendete Yeova na nĩkĩngwataa mbau. Ĩvindanĩ yĩĩ nĩ mũsyaĩĩsya wa kũthyũlũlũka wa Ngũsĩ sya Yeova na nĩthokeaa ikundi nĩ kana nĩsyĩkĩe vinya na kũmanyĩsya ana-a-asa na eĩtu-a-asa. Nĩnĩtũngaa mũvea mũno nũndũ wa moalyũku ala Mbivilia yandetheeisye kwĩka na momanyĩsyo maseo ala Ngai ũtũnengae. Yu ndyĩwʼaa nde wa vata.