12 Mĩvango

ŨU NĨ KWASYA ATA?

Kwĩthĩwa na mĩvango ti o kũsũanĩa keka maũndũ mana nĩmekĩka na ũiema kwĩka ũndũ. Kwĩthĩwa na mĩvango mĩseo kwendaa mũndũ avangĩthye maũndũ, aalyũkane na ũndũ maũndũ mailyĩ, na aithũkũma na kĩthito.

Mĩvango no yĩthĩwe ya ĩvinda ĩkuvĩ (no wĩanĩsye kwa mĩthenya mĩnini kana syumwa iana ũna), ĩvinda yingangĩ (myei), na ĩvinda ĩasa (mwaka ũmwe kana mbeange). No wĩanĩsye mĩvango ya ĩvinda yĩasa kwa kwamba kwĩanĩsya mĩvango ĩla ya ĩvinda ĩnini na ĩvinda yingangĩ.

NĨKĨ NĨ ŨNDŨ WA VATA?

Kwĩanĩsya mĩvango yaku no kũtume wĩyĩĩkĩĩa, kũkalũlũmĩĩlya ũnyanya waku na ala angĩ, na kũituma wĩthĩwa wĩ mũtanu mũnango.

Kwĩyĩĩkĩĩa: Yĩla weethĩwa na tũmĩvango tũnini na watwĩanĩsya, wĩwʼaa ũtonya kwĩanĩsya mĩvango ĩngĩ mĩnenange. O na ĩngĩ, wĩwʼaa ũtonya kũthĩnĩkĩa mathĩna ma kĩla mũthenya. Kwa ngelekanyʼo, ndwĩtĩkĩlaa angĩ maũthingʼĩĩsye wĩke kĩla wĩsĩ nĩ kĩthũku.

Ũnyanya: Andũ nĩmatanĩaa kũtuma ndũũ na andũ me na mĩvango, na ũu nĩ kwasya ala methĩawa mesĩ maũndũ ala mekwenda kwĩanĩsya na mekĩaa kĩthito mameanĩsye. O na ĩngĩ, ũndũ ũmwe ũtonya kũlũlũmĩĩlya ũnyanya nĩ kũthũkũma na mũndũ mwĩ na mĩvango ĩvwʼanene.

Ũtanu: Yĩla weethĩwa na mĩvango na wamĩanĩsya, wĩwʼaa weeka ũndũ wa vata mũno.

“Nĩnendete kwĩthĩwa na mĩvango. Ĩtumaa nĩthĩwa ngwatene na nĩ na ũndũ ngwenda kwĩanĩsya. Na yĩla weanĩsya ũndũ mũna, wĩthĩawa wĩ mũtanu mũno ũyasya, ‘Kwasisya! Nĩnĩneanĩisye kĩla nĩnavangĩte.’”—Christopher.

MWOLOOTO WĨ MBIVILIANĨ: “Ũla ũsiasya kĩseve ndakavuĩa; na ũla ũsiasya mathweo ndakaketha.”​—Mũtavanʼya 11:4.

ŨNDŨ ŨTONYA KWĨKA

Atĩĩa maũndũ aa yĩla ũkwĩka mĩvango na kũmĩanĩsya.

Manya maũndũ ala ũkwenda kwĩka. Andĩka maũndũ ala ũkwenda kwĩanĩsya na ũinyuva ala ũkwenda kwambĩĩa namo, ala mekũatĩĩa, na ala ũkaminĩĩa namo.

Vangĩthya. Ĩka maũndũ aa maatĩĩe ũndũnĩ wʼonthe ũla ũkwenda kwĩanĩsya:

• Vanga wĩenda kũmina ũndũ ũsu ĩndĩĩ.

• Manya nĩ maũndũ meva mekwendeka nĩ kana ũwĩanĩsye.

• Sũanĩa isiĩĩi ila ũtonya kũkomana nasyo na ũisũanĩa ũndũ ũtonya kwĩka syaumĩla.

Osa ĩtambya. Ndũketeele nginya maũndũ methĩwe me maseo vyũ nĩ kana wambĩĩe kwĩanĩsya mĩvango yaku. Ĩkũlye atĩĩ, ‘Nĩ ũndũ wĩva naĩlĩte kwamba kwĩka nĩ kana nambĩĩe kwĩanĩsya mũvango wakwa?’ Na ĩndĩ ũyĩka ũndũ ũsu. Manya ũndũ ũendeee kwĩanĩsya mũvango ũsu.

MWOLOOTO WĨ MBIVILIANĨ: “Mosũanĩo ma ala athingu maelete wingĩnĩ wa syĩndũ.”—Nthimo 21:5.