Ĩsomo ya 4

Ndevili Nũũ?

Satani ũla Ndevili—aumie va? (1, 2)

Satani aasya andũ ata? (3-7)

Nĩkĩ waĩlĩtwe nĩ kũvĩngĩsa Ndevili? (7)

1. Ndeto “ndevili” yonanasya mũndũ ũla ũneenaa movũngũ mathũku ĩũlũ wa mũndũ ũngĩ. Ndeto “Satani” yonanasya nthũ kana mũvĩnganĩsya. Mĩwetele ĩsu ĩnengetwe nthũ ĩla nene ya Ngai. Mwambĩlĩlyonĩ, we aĩ mũlaĩka mwĩanĩu ĩtunĩ e vamwe na Ngai. Ĩndĩ, ĩtina nĩweesililye kwĩthĩwa nĩ wa vata kũthonoka kĩthimo na eeyendea ũthaithi ũla waĩlĩte kwĩthĩwa wĩ wa Ngai.—Mathayo 4:8-10.

2. Mũlaĩka ũũ, Satani, aneenie na Eva kwa kũtũmĩa nzoka. Kwa kũtavya mũndũ mũka ũsu movũngũ, nĩwatumie alea kũmwĩwʼa Ngai. Kwa nzĩa ĩsu Satani nĩwokitie kĩla kĩtawa “ũsumbĩki mũnene” wa Ngai, kana ũnene wa kwĩthĩwa newe Ũla Wĩ Ĩũlũ Vyũ. Satani nĩwaumĩlilye nzika kana Ngai asumbĩkaa na nzĩa mbaĩlu na ya kwenda kũuna asumbĩkwa Make. Ĩngĩ Satani nĩweekĩie nzika kana vaiĩ mũndũ o na wĩva ũkakwatĩĩa ũlũmanʼyo wake na Ngai. Kwa kwĩka ũu, Satani eetwʼie nthũ ya Ngai. Nĩkyo kĩtumi wesie kwĩtwa Satani ũla Ndevili.—Mwambĩlĩlyo 3:1-5; Yovu 1:8-11; Ũvuanʼyo 12:9.

3. Satani atataa kũkenga andũ na mawũĩ nĩ kenda mamũthaithe. (2 Akolintho 11:3, 14) Nzĩa ĩmwe ĩla waasya andũ nayo nĩ kwĩsĩla ndĩni ya ũvũngũ. Ethĩwa ndĩni ĩmanyĩasya movũngũ ĩũlũ wa Ngai, kwa wʼo ĩthũkũmaa kĩeleelo kya Satani. (Yoana 8:44) Andũ ala me mũamba na ndĩni sya ũvũngũ nokwĩthĩwa maĩkĩĩaa na ũwʼo wa ngoo kana methaitha Ngai ũla wa wʼo. Ĩndĩ kwa wʼo methũkũma Satani. Nĩwe “ngai ya nthĩ ĩno.”—2 Akolintho 4:4.

4. Kũneenanʼya na maveva nĩ nzĩa ĩngĩ ĩla Satani ũetae andũ ungu wa ũtonyi wake. Andũ asu nĩmatonya kwĩkaĩla maveva mamasũvĩe, meke andũ angĩ naĩ, mathane ĩvinda yĩla yũkĩte, kana meke syama. Satani nĩwe ngusanʼyo ĩla nthũku ĩtongoesye imanyĩo isu syonthe. Nĩ kenda twendeesye Ngai, no nginya twĩvathe tũikaneene na maveva nongi.—Kũtũngĩlĩlwa kwa Mĩao 18:10-12; Meko 19:18, 19.

5. Ĩngĩ Satani aasya andũ kwĩsĩla nthĩnĩ wa mĩyono ya kũkumya mbaĩ ya mũndũ kũthonoka kĩthimo, na nthĩnĩ wa ũthaithi wa moseũvyo ma kĩũteti. Andũ amwe monaa kana mbaĩ kana ũko woo nĩwʼo mũseango kwĩ ngo ila ĩngĩ. Ĩndĩ ũu ti wʼo. (Meko 10:34, 35) Andũ angĩ mekwatasya moseũvyo ma moteti malingũlanʼye mathĩna ma andũ. Kwa kwĩka ũu, methĩawa mailea Ũsumbĩ wa Ngai. Ũsu wĩ wʼoka nĩwʼo wĩlingũlanʼya mathĩna maitũ.—Ndanieli 2:44.

6. Nzĩa ĩngĩ Satani waasya andũ nayo nĩ kwa kũmatata na mĩmeo ya naĩ. Yeova atwĩaa twĩvathane na imanyĩo sya naĩ nũndũ nĩwĩsĩ ikatwĩka naĩ. (Akalatia 6:7, 8) Andũ amwe nĩmatonya kwenda wĩkwatanʼye nao nthĩnĩ wa imanyĩo isu. Ĩndĩ, lilikana kana kwa wʼo Satani nĩwe ũkwenda wĩke maũndũ asu.—1 Akolintho 6:9, 10; 15:33.

7. Satani nũtonya kũtũmĩa ũnyamasyo kana ũvĩnganĩsyo kũtuma ũeka Yeova. Amwe ma endwa maku nĩmatonya kũthata mũno nũndũ wĩĩmanyĩsya Mbivilia. Angĩ nĩmatonya kũũtheka. Ĩndĩ nũũ ũkũnengete thayũ waku ta thiĩ kwake? Satani eenda kũkũtelemya nĩ kana ũeke kwĩmanyĩsya ĩũlũ wa Yeova. Ndũkaeke Satani akũkĩlye vinya! (Mathayo 10:34-39; 1 Vetelo 5:8, 9) Kwa kũvĩngĩsa Ndevili, nũtonya kũtanĩthya Yeova na kwonanʼya kana nũkwatanĩte na ũsumbĩki mũnene Wake.—Nthimo 27:11.

[Visa Ithanguni ya 9]

Ndĩni ya ũvũngũ, kũneenanʼya na maveva, na ũkumyo wa mbaĩ nĩwaasya andũ

[Visa Ithanguni ya 9]

Vĩngĩsa Satani kwa kũendeea kwĩmanyĩsya ĩũlũ wa Yeova