ĨSOMO YA 15
Nĩkĩ Waĩle Kũendeea Kwĩmanyĩsya Ũvoo Mũseo?
1. Kũendeea kwĩmanyĩsya Mbivilia kũkaũtethya ata?
Vate nzika, momanyĩsyo asu ma mũsingi ma Mbivilia nĩmekĩĩte vinya wendo waku kwa Yeova. No nginya tũendee kwĩkĩa kĩthito ethĩwa nĩtũkwenda wendo ũsu ũendeee kwĩthwa wĩ mũlũmu. (1 Vetelo 2:2) Nĩ kana wĩthĩwe na wĩkwatyo wa thayũ ũtathela, no nginya ũendee kũmũthengeea Ngai kwa kwĩmanyĩsya Ndeto yake.—Soma Yoana 17:3; Yuta 21.
O ũndũ ũmanyi waku ĩũlũ wa Ngai wongelekeele, nowʼo mũĩkĩĩo waku wĩendeea kwĩthĩwa wĩ mũlũmu. Mũĩkĩĩo ũkaũtetheesya kũmwendeesya Ngai. (Aevelania 11:1, 6) Ũkatuma wĩlila na ũialyũla mwĩkalo waku wĩthĩwe wĩ mũseo.—Soma Meko ma Atũmwa 3:19.
2. Ũmanyi waku ĩũlũ wa Ngai ũtonya kũtetheesya angĩ ata?
No wĩthĩwe na ũnyanya wa mwanya vamwe na Yeova
Vate nzika, ũkendeewʼa nĩ kũtavya angĩ maũndũ ala wĩmanyĩĩtye nũndũ ithyonthe nĩtwendeeawʼa nĩ kũtavya angĩ ũvoo mũseo. Waendeea kwĩmanyĩsya Mbivilia, ũkamanya ũndũ ũtonya kũmĩtũmĩa kũelesya mũĩkĩĩo waku nthĩnĩ wa Yeova na ũvoo mũseo.—Soma Alomi 10:13, 15.
Andũ aingĩ mambĩaa kwa kũtavya anyanyae kana andũ ma mũsyĩ ũvoo mũseo. Ĩthĩwa mũĩ. Vandũ va kũmea ndĩni yoo nĩ ya ũvũngũ, matavye ĩũlũ wa mawatho ma Ngai. Ĩngĩ, lilikana kana mavinda maingĩ andũ mendeeawʼa mũnango nĩ mwĩkalĩle waku mũseo kwĩ kĩla ũũmatavya.—Soma 2 Timotheo 2:24, 25.
3. Ũtonya kũtanĩa ũnyanya ũilyĩ ata vamwe na Ngai?
Kwĩmanyĩsya Ndeto ya Ngai kũkaũtetheesya kwĩana kĩveva. Ĩtina wa ĩvinda, no wĩthĩwe na ũnyanya wa mwanya vamwe na Yeova. Kwa wʼo, we no wĩthĩwe wake, wĩ ũmwe wa andũ ma mũsyĩ wake.—Soma 2 Akolintho 6:18.
4. Ũtonya kũendeea kwĩka maendeeo ata?
Nũtonya kwĩka maendeeo ma kĩveva kwa kũendeea kwĩmanyĩsya Ndeto ya Ngai. (Aevelania 5:13, 14) Kũlya ũmwe wa Ngũsĩ sya Yeova akũmanyĩsye Mbivilia aitũmĩa ĩvuku
Mbivilia Ĩtũmanyĩasya Kyaũ? O ũndũ ũkũendeea kwĩmanyĩsya Ndeto ya Ngai, nowʼo thayũ waku ũkũendeea kwaĩla.—Soma Savuli 1:1-3; 73:27, 28.
Ũvoo mũseo umaa kwa Yeova, Ngai mũtanu. No ũmũthengee kwa kũthengeea andũ make. (Aevelania 10:24, 25) Waendeea kwĩthĩwa na kĩthito kya kũmwendeesya Yeova, wĩĩthĩwa ũendee kũtata kũvikĩla thayũ ũla wa wʼo, ũla nĩ thayũ wa tene na tene. Kũmũthengeea Ngai nĩwʼo ũndũ ũla mũseo vyũ ũtonya kwĩka.—Soma 1 Timotheo 1:11, New World Translation; 6:19.