Yoana Mũvatisi Nĩwaseũvisye Nzĩa

Kwaĩ mwambĩĩonĩ wa mwaka wa 29, na myaka ta 17 nĩyavĩtĩte kuma ĩvinda yĩla Yesũ wakũlasya amanyĩsya ma mĩao makũlyo ĩkalũnĩ. Ĩvinda yĩu, Yoana, ũla waĩ wa mũsyĩ ũmwe na Yesũ, aendeee kũtavanyʼa kĩla vandũ ngalĩko ya ũthũĩlonĩ wa syũa ya Ũsĩ wa Yolotani na andũ nĩmaneenaa maũndũ maingĩ ĩũlũ wake.

Yoana aĩ mũndũ wa kwendeesya mũno, na ũneeni wake waĩ mũseo. Ngũa syake syaseũvĩtwʼe na wʼĩa wa ngamĩle na eeyovaa mũsivi wa kĩthuma. Aĩsaa ngie na ũkĩ wa nzũkĩ wa kĩthekanĩ. We Yoana atavanasya ũvoo wĩva? Atavasya andũ atĩĩ: “Ĩlilei, nũndũ Ũsumbĩ wa ĩtu nĩ mũthengeeu.”—Mathayo 3:2.

Ũvoo ũla Yoana watavanasya nĩwakiitie ngoo sya andũ ala mookie kũmwĩthukĩĩsya. Andũ aingĩ nĩmamanyie kana nĩmaĩle kwĩlila kwa kũalyũla mawoni moo na mĩendele yoo ya tene ĩla ĩtendeeasya. Ala mookie vala ve Yoana maumĩte “Yelusaleme na Yutia na nthĩ syonthe ila syathyũlũlũkĩte Yolotani.” (Mathayo 3:5) Na aingĩ moo nĩmeelilile na amavatisa kwa kũmainda kĩwʼũnĩ Ũsĩnĩ wa Yolotani. Nĩkĩ wamavatisaa?

Yoana avatisaa andũ ala maumbũlĩte naĩ syoo kuma ngoonĩ ĩtina wa kũmanya kana mayaatĩĩaa ũtianĩo wa Mĩao ũla Ngai watianĩe namo. (Meko ma Atũmwa 19:4) Ti andũ onthe moonanasya wendi wa kwĩlila na kwoou mayĩthĩwa maĩle kũvatiswa. Na nĩkyo kĩtumi yĩla atongoi ma ndĩni, Avalisi na Asatukai, mookie vala ve Yoana, wametie “ũsyao wa nzoka mbai.” Asyokie amea atĩĩ: “Syaai ũsyao ũkwonanyʼa nĩmwĩlilĩte. Mũikasũanĩe ngoonĩ syenyu mũkyasya, ‘Avalaamu nĩwe ĩthe waitũ.’ Nũndũ nĩmwĩa kana Ngai nũtonya kũmũkĩlĩlya Avalaamu syana kuma mavianĩ aa. Yu ĩthoka nĩyiĩtwe matinanĩ ma mĩtĩ. Kwoou kĩla mũtĩ ũtasyaaa ũsyao mũseo ũkatemwa na kwĩkwʼa mwakinĩ.”—Mathayo 3:7-10.

Andũ aingĩ nĩmendeeawʼa nĩ kũmwĩthukĩĩsya Yoana nĩkwĩthĩwa ũvoo ũla watavanasya waĩ na ũtonyi mũno. Na nũndũ wa ũu, nĩwavatisie andũ aingĩ. Maũndũ asu nĩmatumie athembi na Alivai matũmwa makamũkũlye atĩĩ: “We nue ũũ?”

Yoana ameie atĩĩ: “Tinyie Klĩsto.”

Namo mamũkũlya: “Kwoou we nue Eliya?”

Nake amasũngĩa amea: “Tinyie we.”

Masyokie mamũkũlya atĩĩ: “We nue ũla Mwathani?” Maneeneaa ĩũlũ wa Mwathani mũnene ũla Mose waĩtye kana akooka.—Kũtũngĩlĩlwa Kwa Mĩao 18:15, 18.

Yoana amasũngĩie amea: “Aiee!”

Nũndũ mayaaĩanĩwa nĩ ũndũ wamasũngĩie, maendeeie kũmũkũlya atĩĩ: “We nue ũũ? Tũtavye nĩ kana tũkamasũngĩe ala matũtũmĩte. Wĩenda kwasya nue ũũ?” Yoana amasũngĩie amea atĩĩ: “Nyie nĩ mũndũ ũkũneena na wasya mũnene weũnĩ, akyasya, ‘Lũngalyai nzĩa ya Yeova,’ o tondũ mwathani Isaia waisye.”—Yoana 1:19-23.

Yĩla wamasũngĩie, masyokie mamũkũlya, “Nĩkĩ ĩndĩ ũũvatisa ethĩwa tuuwe Klĩsto kana Eliya kana ũla Mwathani?” Nake amasũngĩa amea: “Nyie nĩvatisaa na kĩwʼũ. Ĩndĩ ve ũmwe ũũngamĩte katĩ wenyu mũtamwĩsĩ, ũla wũkĩte ĩtina wakwa.”—Yoana 1:25-27.

Yoana nĩwaeleisye nesa kana aĩ aseũvye nzĩa kwa kũtetheesya andũ methĩwe na ngoo nzeo nĩ kana mamwĩtĩkĩle Masia ũla wathanĩtwe, ũla waĩ atwʼĩke Mũsumbĩ. Aineena ĩũlũ wa Masia aisye atĩĩ: “Ũla wũkĩte ĩtina wakwa e na vinya kwĩ inyie, o na ndyaĩlĩte kũmumya iatũ syake.” (Mathayo 3:11) O na Yoana asyokie asya: “Ũla wũkĩte ĩtina wakwa nĩ mũnene kwĩ nyie, nũndũ aĩ kwʼo mbee wakwa.”—Yoana 1:15.

Kwoou, ndeto ila Yoana wawetie asya; “Ĩlilei, nũndũ Ũsumbĩ wa ĩtu nĩ mũthengeeu” syaĩ sya ĩvinda yĩla yaĩle. (Mathayo 3:2) Syaĩ itetheesye andũ mamanye kana wĩa wa Mũsumbĩ ũla wanyuvĩtwe nĩ Yeova, nake nĩ Yesũ Klĩsto, wakilyĩ kwambĩĩa.