Nĩkĩ Nĩ Ũseo Kũekea Andũ Ala Angĩ?

Vetelo nĩweewie Yesũ ainengane ũtao ĩũlũ wa ũndũ ana-a-asa maemanwa maĩle kũmina thĩna ũsu me oka. Ĩndĩ, veonekana Vetelo endaa kũelewa nesa ki nĩ mavinda meana mũndũ waĩle kũekea ũla ũngĩ.

Vetelo akũlilye-ĩ: “Mwĩaĩi, ethĩwa mwana-a-asa nĩwambĩtĩsya, naĩle kũmũekea mavinda meana ata? Nĩ mavinda mũonza?” Atongoi amwe ma ndĩni mamanyĩasya kana mũndũ aĩle kũekea ũla ũngĩ mavinda atatũ tũ. Kwoou Vetelo nũtonya kwĩthĩwa oonaa kana yĩla waekea mwana-a-asa “mavinda mũonza” eeka kĩla kyaĩle vyũ.—Mathayo 18:21.

Ĩndĩ, kũtala nĩ mavinda meana mũndũ waekea ũla ũngĩ kũyosanĩte na momanyĩsyo ma Yesũ. Nĩkyo kĩtumi Yesũ wamũkanisye Vetelo amwĩa atĩĩ: “Nĩkwĩa kana, ti mavinda mũonza, ĩndĩ nĩ mavinda 77.” (Mathayo 18:22) Kwa ndeto ingĩ, Yesũ oonanasya kana Vetelo ndaaĩle kũtala nĩ mavinda meana ata waekea mwana-a-asa.

Yesũ nĩwatavisye Vetelo na ala angĩ mamwĩthukĩĩsye ngelekanyʼo ya kũmatetheesya mone vata wa kũekea. Ngelekanyʼo ĩsu yaĩ ĩũlũ wa ngombo yaemiwe nĩ kwĩthĩwa na tei ta vwana wayo. Vwana ũsu ũla waĩ mũsumbĩ nĩwendaa ngombo syake imũĩve kĩla waitaĩte. Ngombo ĩmwe ĩla yataĩtwe talendi ila mbingĩ vyũ, nasyo syaĩ talendi 10,000 [kana ndinalĩ 60,000,000] nĩyaetiwe vala ve vwana. Ngombo ĩsu ndyaĩ ĩtonya kũĩva talendi isu. Kwoou, mũsumbĩ nĩwaumisye mwĩao mũndũ ũsu, mũka, na syana syake ithoowʼe nĩ kana aĩvwe. Ngombo ĩsu nĩyamũtulĩlye ndu vwana wayo na yamwĩsũva ĩimwĩa: “Mbũmĩĩsye na nĩngũĩva kyonthe kĩla ũndaĩte.”—Mathayo 18:26.

Mũsumbĩ ũsu nĩweewʼĩie ngombo ĩsu tei na kwoou amĩekea kĩla wamĩtaĩte. Ĩtina wa ũu, ngombo ĩsu nĩyaendie na yeethĩa ngombo ĩngĩ yamĩtaĩte ndinalĩ 100. Nĩyakwatie ngombo ĩsu na yamita ĩkyasya: “Ndĩve kyonthe kĩla ngũtaĩte.” Ngombo ĩla yataĩtwe ndinalĩ 100 nĩyatulilye ndu maaũnĩ ma ngombo ĩsu, na yamwĩsũva yaĩtye: “Mbũmĩĩsye na ngakũĩva.” (Mathayo 18:28, 29) Ĩndĩ, ngombo ĩsu yaekeiwe nĩ mũsumbĩ ndyaĩ na tei take. Yaisye ngombo ĩsu yĩkwʼe yela nginya yĩla ĩkaĩva kyonthe kĩla yataĩtwe o na kau yamĩtaĩte o ndinalĩ nini.

Yesũ nĩwaendeeie kũtavya amanyĩwʼa make kana yĩla ngombo ila ingĩ syoonie kĩla kyeekĩka nĩsyaendie na syatavya vwana wasyo. Vwana ũsu nĩwathatie mũno na atũmana ngombo ĩsu na amĩtavya atĩĩ: “Ngombo nthũku, yĩla ũnambĩsũvie nĩnĩnakũekeie kyonthe kĩla nĩnakũtaĩte. O naku ndwaĩle kwĩthĩwa ũnamĩwʼĩie tei ngombo ĩla ĩngĩ o ũndũ nĩnakwĩwʼĩie tei?” Mũsumbĩ ũsu wathatĩte mũno nĩwanenganie ngombo ĩsu ĩte tei kwa asikalĩ ma yela nginya yĩla ĩkaĩva kyonthe kĩla wamĩtaĩte. Yesũ aminĩĩie kwa kwasya: “O nake Asa wakwa wa ĩtunĩ akeekana nenyu oou, ethĩwa kĩla ũmwe wenyu ndaekeaa mwana-a-asa wake kuma ngoonĩ.”—Mathayo 18:32-35.

Ngelekanyʼo ĩsu yĩtũmanyĩsya ĩsomo ya vata mũno ĩũlũ wa kũekea! Ngai atũekeete mavĩtyo maingĩ mũno. Kwoou, no twasye kana mavĩtyo ala tũvĩtĩawʼa nĩ ana-a-asa nĩ manini mũno maelekanwʼa na ala tũvĩtĩasya Ngai. O na ũu wĩ o vo, Yeova nũtũekeaa mavinda ngili mbingĩ mũno ĩndĩ ti o ĩvinda yĩmwe. Kwoou, o naitũ nĩtwaĩle kũekea ana-a-asa ala matũvĩtĩsya o na ethĩwa tũvĩtĩwʼe mũno wĩana ata. O tondũ Yesũ wamanyĩisye nthĩnĩ wa Ũtavanyʼa wa Kĩĩmanĩ, Ngai ‘akatũekea mathiĩ maitũ, o tondũ ithyĩ tũmaekeaa ala me na thiĩ naitũ.’—Mathayo 6:12.