ĨSOMO YA 17

Kũneena kwa Nzĩa Ĩkũeleeka

1 Akolintho 14:9

KWA ŨKUVĨ: Tetheesya ethukĩĩsya maku maelewe ũvoo waku nesa.

Soma ũvoo waku nesa ũũelewe. Elewa ũvoo waku nesa nĩ kana wĩthĩwe ũtonya kũwumya kwa nzĩa yĩ laisi ũitũmĩa ndeto syaku mwene.
Tũmĩa sendenzi nguvĩ na syĩ laisi. Tũmĩa sendenzi nguvĩ na syĩ laisi kũelesya maũndũ nesa nĩ kana ethukĩĩsya maelewe kĩla ũũmamanyĩsya.

Ndũkaneenee maũndũ mate ma lasima ala matonya kũvũavũanyʼa kana kũnosya ethukĩĩsya maku. Tũmĩa ndeto syĩ laisi kũeleeka vandũ va kũtũmĩa ndeto syĩ vinya.
Elesya ndeto ila itesĩkĩe. Ndũkatũmĩe mũno ndeto itesĩkĩe nĩ ethukĩĩsya maku. Ethĩwa no nginya ũtũmĩe ndeto ĩtesĩkĩe, mĩelesye. Ethĩwa no nginya ũwete mũndũ ũwetetwe Mbivilianĩ ĩndĩ ũtesĩkĩe mũno, maelesye aĩ ũũ. Na ethĩwa no nginya ũwete ithimo sya tene kana syĩthĩo sya tene, elesya.