MOSŨNGĨO MA MAKŨLYO MA MBIVILIA
Naaũ makathi ĩtunĩ, na makathi kwĩka ata kwʼo?
Andũ aingĩ mũno mekwatasya makathi ĩtunĩ makwʼa. Yesũ nĩwawetie kana atũmwa make aĩkĩĩku makekala ku. O na atanamba kũkwʼa, nĩwamathie kana e na Ĩthe wake makamaseũvĩsya vandũ.—Soma Yoana 14:2.
Nĩkĩ andũ makathayũũkwʼa mathi ĩtunĩ? Makeeka ata kwʼo? Yesũ eeie atũmwa make kana makathi kũsumbĩka. Makeethĩwa masumbĩkĩte nthĩ.—Soma Luka 22:28-30; Ũvuanʼyo 5:10.
Nĩ andũ onthe aseo maendaa ĩtunĩ?
Nthĩnĩ wa nthĩ mbingĩ no andũ avũthũ methĩawa manyuvĩtwe masumbĩke ala angĩ. O ta ũu, no twasye kana ala mathayũũkawʼa nĩ Yesũ mathi ĩtunĩ nĩ avũthũ. Nĩkĩ? Nũndũ maendaa kũu mesumbĩka nthĩ. (Luka 12:32) O na Mbivilia nĩwetete ũtalo wa asu mesumbĩka na Yesũ.—Soma Ũvuanʼyo 14:1.
Yesũ nũseũvĩtye mawĩkalo ĩtunĩ kwondũ wa amwe ma aatĩĩi make. We nĩwĩsĩ makatethya wĩa mwaũ kũu?
Ala me na wĩkwatyo wa kũthi ĩtunĩ timo me oka makaathimwa. Andũ angĩ aĩkĩĩku ala menyivĩsye Ũsumbĩ wa Yesũ makatanĩa kwĩkala kũũ nthĩ tene na tene. Ĩvindanĩ yĩu nthĩ ĩkatwʼĩkĩthwʼa nzaũ. (Yoana 3:16) Amwe ala makekala nthĩ ĩsu nzaũ makeethĩwa manavonoka kwanangwa kwa nthĩ ĩno nthũku. Namo angĩ makeethĩwa makwie na kwoou makathayũũkwʼa nĩ kana mekale nthĩ ĩsu.—Soma Savuli 37:29; Yoana 5:28, 29.