MOSŨNGĨO MA MAKŨLYO MA MBIVILIA
Kĩeleelo kya kũsyoka kwa Klĩsto nĩ kyaũ?
Yesũ Klĩsto atanamba kwambata ĩtunĩ mwaka wa 33, nĩwathanie kana akasyoka. Eevwʼananisye na mũndũ ũmwe mũnene ũla waendie nthĩ sya kũasa na ĩtina wa ĩvinda yĩasa asyoka e na ũkũmũ wa kũsumbĩka. Kĩeleelo kya kũsyoka kwa Yesũ nĩ kũetee andũ silikalĩ nzeo.—Soma Luka 19:11, 12.
Yesũ akaetee andũ silikalĩ nzeo
Yesũ aĩ asyoke e na mwĩĩ ũilyĩ ata? Athayũũkĩtwʼe e kyũmbe kya veva kĩtatonya kwoneka. (1 Vetelo 3:18) Amina kũthayũũka, Yesũ ambatie ĩtunĩ na ekala kwʼokonĩ kwa aũme kwa Ngai. (Savuli 110:1) Ĩtina wa ĩvinda yĩasa, nĩwaetiwe mbee wa Yeova Ngai, ‘Mũtumĩa wa Matukũ’ ũla wamũnengie ũkũmũ wa kũsumbĩka andũ. Kwoou Yesũ ndaĩ asyoke e na mwĩĩ wa kĩ-mũndũ, ĩndĩ aĩ asyoke e Mũsumbĩ ũtoneka na metho.—Soma Ndanieli 7:13, 14.
Yesũ akeeka ata asyoka?
Yesũ akasyoka atenekee e vamwe na alaĩka make, na akeethĩwa okĩte kũsilĩla andũ. Akaananga ala athũku, ĩndĩ ala metĩkĩlaa kana we nĩ Mũsumbĩ aimanenga thayũ ũtathela.—Soma Mathayo 25:31-33, 46.
Ũsumbĩ wa Yesũ ũkamĩalyũla nthĩ yĩthĩwe nzaũ. Na ala akwʼũ aimathayũũkya nĩ kana matanĩe thayũ nthĩnĩ wa nthĩ ĩsu nzaũ.—Soma Savuli 37:29; Yoana 11:25.