We Ngai Nũkũthĩnĩkĩaa?

Syo ndeto isu sya Ndaviti sya kana Ngai nũmũlilikanaa nĩsyosanĩte na kĩlĩko? We Ngai nũkũthĩnĩkĩaa? Andũ aingĩ ũmũnthĩ monaa wĩ ũndũ wĩ vinya kũĩkĩĩa kana Ngai wĩ vinya w’onthe nũtonya kwendeew’a nĩmo. Nĩkĩ monaa ũu?

Kĩtumi kĩmwe nĩ kana Ngai e kĩvathũkany’o vyũ na andũ. Nũndũ Ngai e ĩũlũ mũno, kwake mbaĩ nima “nĩ ta kavoloto ke ndoonĩ, na nitalawa ta kĩtoo kĩvinyu kĩthiminĩ.” (Isaia 40:15) Mũandĩki ũmwe ũtaĩkĩĩaa Ngai aisye kana “nĩ ũndũ wa mĩng’athĩlĩĩlyo vyũ kũĩkĩĩa kana ve Ngai wendeeaw’a nue, na maũndũ ala wĩkaa.”

Kĩtumi kĩngĩ nĩ kana andũ amwe monaa mwĩkalĩle woo no ũtume Ngai ũtamathĩnĩkĩa. Kwa ngelekany’o, mũndũũme ũmwe wĩtawa Jim aĩtye atĩĩ: “Navoyaa Ngai kĩla ĩvinda anenge mũuo na ũtonyi wa kwĩsiĩĩa, ĩndĩ nakilasya o nekalanga ndithilĩka ĩngĩ. Ĩtina nesie kũtw’a kana naĩ mũthũku vyũ na Ngai ndaĩ esa kũndethya.”

Kwa w’o Ngai e vaasa na andũ ũkethĩa ndamonaa ta kĩndũ? Ngai ethĩawa na woni mwaũ kwelekela syũmbe syake ila syĩ na naĩ? Vai mũndũ ũtonya kũelesya ũvoo wa w’o ĩũlũ wa Ngai na kũsũngĩa makũlyo asu kwondũ wake, ate o Ngai amũnengie ũmanyi. Ĩndĩ, Ngai nĩwaandĩkĩthisye Mbivilia kwondũ witũ na nĩtũtavĩtye kana we ti Ngai ũtaũnganaa na andũ. Mbivilia yaĩtye kana “nde kũasa na kĩla ũmwe waitũ.” (Meko ma Atũmwa 17:27) Nthĩnĩ wa ilungu inya ila iatĩĩe, nĩtũkwĩmanyĩsya maũndũ ala Ngai ũwetete ĩũlũ wa ũndũ wendeeaw’a nĩ andũ, na ũndũ weekie ũu kwelekela andũ o taitũ.