KYONGO KYA ĨTHANGŨ YA MBEE | WE NGAI NĨWENDEEAW’A NUE?
Ngai Nĩwendaa Wĩthĩwe Mũnyanyae
“Vai mũndũ ũtonya kũka kwakwa, ateũkusw’a nĩ Asa ũla wandũmie.” —YOANA 6:44.
KĨLA KĨTUMAA AMWE METHĨWA NA NZIKA: Andũ aingĩ ala maĩkĩĩaa Ngai mayĩw’aa me anyanyae make. Mũndũ mũka ũmwe wĩtawa Christina wa kuma nthĩ ya Ireland na ũla waendaa kanisanĩ kĩla kyumwa aisye ũũ: “Namwonaa o ta Ngai ũla wombie kĩla kĩndũ.” Aendeee kwasya, “Ĩndĩ ndyamwĩsĩ. Vai ĩvinda naaĩw’a nĩ vakuvĩ nake.”
KĨLA NDETO YA NGAI ĨMANYĨASYA: Ĩla tweew’a twĩ atuanĩe nĩ nthĩ, Yeova ndatwĩkĩasya ngoo ĩndĩ nũendeeaa kũtũtethya. Yesũ nĩwatũmĩie ngelekany’o kwonany’a ũndũ Ngai ũtũsũvĩaa ĩla waisye atĩĩ: “Ethĩwa mũndũ o na wĩva e na malondu ĩana, na yĩmwe yamo yĩkyaa, ndeũtia ala mĩongo kenda na kenda, na akĩthi iĩmanĩ kũmantha yĩla yau?” Ũndũ ũsu wĩtũmanyĩsya kyaũ? Yesũ aisye atĩĩ: “No ta ũu ti kwenda kwa Ĩthe wenyu ũla wĩ ĩtunĩ, kamwe ka tũũ tũnini kae.”—Mathayo 18:12-14.
Kĩla “kamwe ka tũũ tũnini” nĩ ka vata mũno kwa Ngai. We ‘amanthaa ata ala au’? Ĩandĩko yĩla yĩwetetwe mwambĩlĩlyonĩ wa kĩlungu kĩĩ, yonanĩtye kana Yeova ekaa kũmakusya.
Ũmũnthĩ naaũ ala mathokeaa andũ mĩsyĩ kwoo na kũndũ kũngĩ, nĩ kana mamatavye ũvoo ũla wĩ Mbivilianĩ ĩũlũ wa Ngai?
Kwasũanĩa ũndũ Ngai woosie ĩtambya akusye andũ ala maĩ na ngoo nzeo methĩwe anyanyae. Ĩvindanĩ ya atũmwa, Ngai nĩwatũmie mũmanyĩw’a Mũklĩsto, Vilivu, akakomane na mũnene ũmwe wa Ethiovia, nĩ kana amũtetheesye kũelewa wathani ũla wasomaa. (Meko ma Atũmwa 8:26-39) Ĩtina wa ĩvinda, Ngai nĩwasyokie atũma Vetelo kwa mũnene wa nguthu ya asikalĩ ma nthĩ ya Lomi weetawa Kolinelio, ũla wavoyaa na watataa kũmũthaitha Ngai. (Meko ma Atũmwa 10:1-48) O na ĩngĩ, Ngai nĩwatongoeisye mũtũmwa Vaulo na ala maĩ nake nginya ũsĩnĩ ũla waĩ vakuvĩ na mũsyĩ wa Vilivi. Ĩla mavikie vau, nĩmeethĩie mũndũ mũka ũmwe “wathaithaa Ngai” na ũla wetawa Litia, na “Mwĩaĩi amũvingũa ngoo yake, nĩ kana amethukĩĩsye maũndũ ala maneeniwe nĩ Vaulo.”—Meko ma Atũmwa 16:9-15.
Maũndũ asu onthe twaneenea meonany’a kana Yeova nĩwaĩkĩĩthisye kana ala mamũmanthaa nĩmakwatie mwanya wa kũmũmanya. Ũmũnthĩ naaũ ala mathokeaa andũ mĩsyĩ kwoo, na kũndũ kũngĩ nĩ kana mamatavye ũvoo ũla wĩ Mbivilianĩ ĩũlũ wa Ngai? Andũ aingĩ matonya kwasya, “Nĩ Ngũsĩ sya Yeova.” Ĩkũlye atĩĩ, ‘Ngai nũtonya kwĩthĩwa aimatũmĩa nĩ kana mandetheesye nĩthĩwe mũnyanyae?’ Nĩtũũkwĩkĩa vinya ũvoye Ngai aũtetheesye wĩtĩkĩle kũkusw’a nĩwe nĩ kana ũtw’ĩke mũnyanyae.a
a Nĩ kana ũkwate ũvoo mwingangĩ, sisya vitio ĩla yĩ na kyongo Nĩkĩ Waĩle Kwĩmanyĩsya Mbivilia? Kĩsesenĩ kya www.jw.org/kam