Ngai Nũtonya Kũũkiakisya

KĨLA KĨTUMAA AMWE METHĨWA NA NZIKA: Ĩla andũ amwe mekwenda ũkiakisyo monaa kũmũkũlya Ngai amatetheesye momĩanĩsye na mathĩna moo ne kwĩyenda. Mũndũ mũka ũmwe wĩtawa Raquel aĩtye atĩĩ: “Ĩla noona ũndũ andũ aingĩ ĩũlũ wa nthĩ meũthĩna, nonaa mathĩna makwa mate vala maĩ na kwoou ndiemwa nĩ kwĩtya Ngai ũtethyo.”

KĨLA NDETO YA NGAI ĨMANYĨASYA: Ngai nĩwalikĩlĩile maũndũ kwa nzĩa nene nĩ kana atetheesye andũ na aimakiakisya. Kĩla mũndũ ĩũlũ wa nthĩ nĩwatiĩwe naĩ, na nũndũ wa ũu ndesa kwĩanĩsya vyũ kwenda kwa Ngai. Ĩndĩ, Ngai “nĩwe watwendie ithyĩ, na atũma Mwana wake [Yesũ Klĩsto] ethĩwe nthembo ya wĩw’anĩthyo kwondũ wa naĩ sitũ.” (1 Yoana 4:10) Kwoou ĩla Ngai waumisye Mwana wake Yesũ akw’a, nĩwatumie twĩthĩwa tũtonya kũekewa naĩ sitũ, tũkethĩwa na wasya mũtheu wa ngoo, na tũkethĩwa na wĩkwatyo wa thayũ wa tene na tene nthĩnĩ wa nthĩ nzaũ.a Ĩndĩ ĩkũlyo nĩ, Nthembo ĩsu ya wovosyo yaĩ kwondũ wa andũ onthe ĩũlũ wa nthĩ, kana yonanasya Ngai nĩwendeeaw’a nue?

Kwasũanĩa ĩũlũ wa mũtũmwa Vaulo. Eewie mũyo mũno nũndũ wa nthembo ya wovosyo ya Yesũ Klĩsto nginya aandĩka ũũ: ‘Nĩngwĩkala mũĩkĩĩonĩ, mũĩkĩĩo ũla wĩ nthĩnĩ wa Mwana wa Ngai, ũla wambendie, na eenengane kwondũ wakwa.’ (Akalatia 2:20) Kwa w’o Yesũ akwie Vaulo atatw’ĩkĩte Mũklĩsto. Ĩndĩ Vaulo oonaa nthembo ĩsu ne mũthĩnzĩo wake kuma kwa Ngai.

O ta ũu, nthembo ĩsu yaumiw’e nĩ Yesũ nĩ mũthĩnzĩo waku kuma kwa Ngai. Mũthĩnzĩo ũsu wonanasya ũndũ Ngai ũkwonaa wĩ wa vata. No ũkũnenge “ũkiakisyo ũtathela na wĩkwatyo mũseo,” na ũu ũituma ‘wĩlũlũmĩlya nthĩnĩ wa kĩla wĩa mũseo na ndeto.’—2 Athesalonika 2:16, 17.

Yesũ aumisye thayũ wake wĩthĩwe nthembo vakuvĩ myaka 2,000 mĩvĩtu. Nĩ kyaũ kyonanasya kana ũmũnthĩ Ngai nĩwendaa twĩthĩwe anyanyae.