Tũmĩa Ndeto ya Ngai Nũndũ yĩ Thayũ!

1, 2. Yeova atũmie Mose akeke ata, na amũĩkĩĩthisye kyaũ?

KWASŨANĨA ũkatw’ĩka nue ũũthi kũũngama mbee wa mũsumbĩ ũla mũnene vyũ ĩũlũ wa nthĩ ũneene kwondũ wa andũ ma Yeova. Ũtonya kwĩw’a ata? Nĩvatonyeka ũkew’a ũmakĩte, ũtatonya, na wĩ mũtelemu. Ũtonya kwĩyũmbany’a ata nĩ kana ũkaneene nake nesa? We wĩka ata nĩ kana ũneene wĩ na ũkũmũ ta ũtũmĩtwe nĩ Ngai?

² Mose eeyĩthĩile ũndũnĩ ũilyĩ ũsu. O na kau Mose “aĩ mũuu mũno, kũvĩtũka andũ onthe ala maĩ ĩũlũ wa nthĩ,” Yeova amwĩie nũkũmũtũma kũla kwĩ Valao nĩ kana athi akovosye andũ make kuma ũkombonĩ Misili. (Mot. 12:3) Valao aĩ mũndũ wĩ kĩvũthya na mũng’endu. (Kuma 5:1, 2) O na ũu wĩ o vo, Yeova endaa Mose athi akatavye Valao aeke andũ make ta milioni itatũ, ala wamatw’ĩkĩthĩtye ngombo syake, mathi. Nĩkyo kĩtumi Mose wakũlilye Yeova atĩĩ: “Nyie nĩ ũũ, nĩende kwa Valao, na nĩ kana nyie numye ana ma Isilaeli Misili?” Mose eew’aa atatonya kwĩanĩsya ũndũ ũsu. Ĩndĩ Yeova amũĩkĩĩthya kana ndaĩ athi e weka. Amwĩie: “Vate ndĩi ngeethĩwa vamwe naku.”—Kuma 3:9-12.

3, 4. (a) Nĩ maũndũ meva matumaa Mose ethĩwa na wia? (b) Nĩ maũndũ meva matonya kũtuma wĩw’a ta Mose?

³ Nĩ maũndũ meva matumaa Mose ethĩwa na wia? Nĩwakĩaa nũndũ oonaa Valao ndesa kũthokya kana kwĩthukĩĩsya mũndũ ũtũmĩtwe nĩ Yeova Ngai. O na ĩngĩ, Mose oonaa Aisilaeli maiĩkĩĩa kana Yeova nĩwamũnyuvĩte nĩ kana amatongoesye kuma Misili. Nĩkyo kĩtumi Mose weeie Yeova atĩĩ: “Ĩndĩ, sisya, matikambĩtĩkĩla, kana kwĩthukĩĩsya wasya wakwa: nũndũ makasya, Yeova ndaakumĩlĩla.”—Kuma 3:15-18; 4:1.

⁴ No twĩmanyĩsye maũndũ ma vata mũno kumana na ũndũ Yeova wasũngĩie Mose, na maũndũ ala meekĩkie ĩtina wa vau. Vate nzika nũtonya kwĩthĩwa ũtakesa kũũngama mbee wa mũnene wa silikalĩ. Ĩndĩ, we nĩwĩw’aa ve vinya kũtavya andũ ala ũkomanaa namo ũvoo ĩũlũ wa Ngai na Ũsumbĩ wake? Ethĩwa nĩwĩw’aa ve vinya, kwasũanĩa kĩla ũtonya kwĩmanyĩsya kumana na kĩla kyamũkwatie Mose.

“KĨLA KĨ KW’OKONĨ KWAKU NĨ KYAŨ?”

5. Yeova anengie Mose kyaũ, na kyamũtetheeisye ata aeka kwĩthĩwa na wia? (Sisya visa ĩthangũnĩ ya 13.)

⁵ Ĩla Mose woonethisye Ngai kana andũ mayĩĩthukĩĩsya ndeto syake, Ngai nĩwamũtetheeisye nĩ kana aeke kwĩthĩwa na wia. Mbivilia yaĩtye ũũ: “Na Yeova amũkũlya [Mose], Kĩla kĩ kw’okonĩ kwaku nĩ kyaũ? Na asũngĩa, Nĩ ndata. Na amwĩa, Mĩkye nthĩ. Na amĩkya nthĩ, na yatw’ĩka nzoka; na Mose amĩkĩa. Na Yeova amwĩa Mose, Tambũũkya kw’oko kwaku ũmĩkwate mwĩthe (na atambũũkya kw’oko amĩkwata, na yatw’ĩka ndata ĩ kw’okonĩ kwake); nĩ kana metĩkĩle atĩ Yeova, [Ngai] wa aaĩthe moo . . . , nũkumĩlĩle.” (Kuma 4:2-5) Ndeto isu syĩonany’a kana Yeova nĩwanengie Mose kĩndũ kya kũĩkĩĩthya kana nĩwe wamũtũmĩte. Ndata ĩla wakwete nĩyatw’ĩkie nzoka kwa vinya wa Ngai! Kyama kyu kyaĩ kĩtetheesye andũ mamanye kana Mose atũmĩtwe nĩ Ngai na aĩ na ũkũmũ kuma kwake. Nĩkyo kĩtumi Yeova wamwĩie: “[Kua] ndata ĩno kw’okonĩ kwaku ĩla wĩkaa syama isu nayo.” (Kuma 4:17) Ĩtina wa ũu, Mose aĩ atonya kũthi kũũngama mbee wa Valao e na ũkũmbaũ, nĩ kana aneene kwondũ wa Ngai ũla wa w’o na kwondũ wa andũ make nũndũ aĩ na ũkũmũ kuma kwa Ngai.—Kuma 4:29-31; 7:8-13.

6. (a) Nĩ kyaũ kĩla twaĩle kwĩthĩwa nakyo ĩla tũũtavany’a, na nĩkĩ? (b) Elesya “ndeto ya Ngai ĩ thayũ” kwa nzĩa yĩva, na ũndũ ne “nthangaau,” kana yĩ ũtonyi.

⁶ O naitũ no tũkũlw’e ĩkũlyo o ta yĩu ĩla twathi kũtavany’a. No tũkũlw’e-ĩ: “Kĩla kĩ kw’okonĩ kwaku nĩ kyaũ?” Mavinda maingĩ twĩthĩawa tũkuĩte Mbivilia twĩyũmbanĩtye kũmĩtũmĩa. O na kau andũ amwe nĩmatonya kwona Mbivilia o ta mavuku ala angĩ, Yeova aneenaa naitũ kwĩsĩla Ndetonĩ ĩsu yake mbeveee. (2 Vet. 1:21) Yĩthĩawa na mawatho ma Ngai ala makeanĩw’a ĩvinda yĩla Ũsumbĩ wake ũkethĩwa ũsumbĩkĩte. Nĩkyo kĩtumi mũtũmwa Vaulo waandĩkie ũũ: “Ndeto ya Ngai ĩ thayũ, na nĩ nthangaau [yĩ ũtonyi].” (Soma Aevelania 4:12.) Ndeto ya Ngai yĩ thayũ ata? Nũndũ mawatho onthe ma Yeova makaaĩla, maikalea kwĩanĩa. (Isa. 46:10; 55:11) Ĩla mũndũ wamanya kana Ndeto ya Yeova yĩthĩawa yĩilyĩ ũu, kĩla ũkũsoma Mbivilianĩ no kĩthĩwe na ũtonyi thayũnĩ wake.

7. Tũtonya ata kũtũmĩa “ũndũ waĩle ndeto ya ũla w’o”?

⁷ Yeova nũtũnengete Ndeto yake yĩ thayũ na nĩtwaĩle kũmĩtũmĩa tũĩkĩĩthye kana ndeto sitũ nĩ sya kũĩkĩĩka na nĩwe ũtũtũmĩte. Ĩtina wa Vaulo kũandĩkĩa Aevelania, athangaaisye Timotheo atate ũndũ ũtonya atũmĩe “ũndũ waĩle ndeto ya ũla w’o.” (2 Tim. 2:15) Naitũ tũtonya kũtũmĩa ũtao ũsu wa Vaulo ata? Kwa kũsoma na wasya maandĩko ala tũnyuvĩte nesa nũndũ maandĩko asu nĩmatonya kũkiita ngoo sya ala meũtwĩthukĩĩsya. Tulakiti ila syaumiw’e mwaka 2013 iseũvĩtw’e nĩ kana itũtetheesye kwĩka ũu.

SOMA ĨANDĨKO ĨNYUVE NESA!

8. Mũsyaĩĩsya ũmwe wa ũthũkũmi aisye ata ĩũlũ wa ila tulakiti nzaũ?

⁸ Tulakiti isu nzaũ syonthe iseũvĩtw’e ũndũ ũmwe. Kwoou ĩla mũndũ wamanya ũndũ ũtonya kũtũmĩa tulakiti ĩmwe ethĩawa atonya kũtũmĩa ila ingĩ o ũu. Yo nĩ laisi kũtũmĩa tulakiti isu? Mũsyaĩĩsya ũmwe wa ũthũkũmi wa vandũ vetawa Hawaii, Amelika, aandĩkie ũũ: “Tũineesĩ ũndũ [tulakiti isu] ikwĩthĩwa syĩ nzeo ũtavany’anĩ wa nyũmba na nyũmba vamwe na kũndũ kũla kwĩthĩawa andũ aingĩ.” Esĩte kwĩthĩa kana ũndũ tulakiti isu iandĩkĩtwe ũtumaa andũ masũngĩa makũlyo nesa na ũu ũituma mũea ngewa nesa vyũ. Mũsyaĩĩsya ũsu wa ũthũkũmi onaa kana tulakiti isu itumaa andũ methĩwa meyũmbanĩtye kũsũngĩa mĩtũkĩ nũndũ syĩ na makũlyo me na mosũngĩo maingĩ nĩ kana mũndũ anyuve ũsũngĩo ũla ũkwendeew’a nĩw’o. Kwoou, mwene nyũmba ndethĩawa aithĩnĩka, aimena kumya ũsũngĩo ũla ũtaĩle.

9, 10. (a) Tulakiti sitũ iseũvĩtw’e ata ũkethĩa no itũtetheesye tũtũmĩe Mbivilia? (b) Nĩ tulakiti syĩva we ũtũmĩĩte na ũkona syĩ na mosyao maseo, na nĩkĩ?

⁹ Kĩla tulakiti yĩ na ĩandĩko yĩnyuvĩtwe nesa yĩla tũtonya kũsomea mwene nyũmba. Kwa ngelekany’o, sũanĩa tulakiti ĩla yĩtawa Mo Mathĩna Makathela? O na ethĩwa ĩla wakũlya mwene nyũmba ĩkũlyo yĩu anyuva ũsũngĩo ũla waĩtye “ĩĩ,” “aiee,” kana “nĩvatonyeka,” ndũkatindĩe kwongeleela ũndũ ũngĩ, vandũ va ũu, sisya ĩthangũ yĩla yĩatĩĩe nthĩnĩ wa tulakiti ĩsu na ũkĩmwĩa: “Ũũ nĩw’o Mbivilia yaĩtye.” Ĩtina wa ũu soma ĩandĩko ya Ũvuan’yo 21:3, 4.

¹⁰ O ta ũu, ĩla ũũtũmĩa tulakiti Ũmyonaa Ata Mbivilia? vayĩthĩwa thĩna o na mwene nyũmba akanyuva ũsũngĩo wĩva katĩ wa ala mosũngĩo atatũ me ĩthangũnĩ ya mbee. Ĩka kũvingũa ĩthangũ yĩla yĩatĩĩe na ũimwĩa, “Mbivilia yaĩtye kana ‘kĩla Ũandĩko nĩwaveveewe nĩ Ngai.’” O na no wongele kũmwĩa, “Ĩandĩko yĩu yĩ na maũndũ angĩ maingangĩ.” Ĩtina wa ũu no ũvue Mbivilia yaku na ũisoma ĩandĩko ya 2 Timotheo 3:16, 17 yonthe.

11, 12. (a) Nĩ kwa nzĩa yĩva ũtonya kũtũmĩa tulakiti nĩ kana ũtavany’a waku wĩthĩwe wĩ wa kwendeesya? (b) Tulakiti itonya kũũtetheesya ata wĩyũmbany’e kũsyokea andũ ala mekwendeew’a?

¹¹ Ũndũ mwene nyũmba ũkũkwĩthukĩĩsya no kũũtetheesye kũmanya wĩsoma na ũineenea ũvoo wĩana ata kuma tulakitinĩ ĩsu. O na ethĩwa mwene nyũmba akeeka ata, ũndũ ũla wa vata nĩ kana ũkeethĩwa wamũtiĩa tulakiti na wamũsomea ĩandĩko o na ethĩwa no mũsoa ũmwe kana ĩlĩ. Ĩtina wa ũu, no wĩse kũsyoka mũkaendeesya ũneenany’a.

¹² Kĩla tulakiti yĩ na ĩkũlyo ungu wa kyongo, “Kwasũanĩa Ĩkũlyo Yĩĩ” na maandĩko ũtonya kũneenea ĩla wasyokea mwene nyũmba. Ĩkũlyo yĩu yĩ ĩthangũnĩ ya ĩtina ya kĩla tulakiti. Nthĩnĩ wa tulakiti Wĩ na Woni Mwaũ Ĩũlũ wa Ĩvinda Yĩla Yũkĩte? ĩkũlyo yĩla yĩvo ya kũneenea na mwene nyũmba ĩla wĩmũsyokea nĩ “Ngai akaalyũla ata nthĩ ĩno yĩthĩwe yĩ nzeo?” O na ĩngĩ, ve ĩandĩko ya Mathayo 6:9, 10 na Ndanieli 2:44. Na kwondũ wa tulakiti Mo Andũ Ala Makwie Nĩmatonya Kwĩthĩwa Thayũ Ĩngĩ? ĩkũlyo yĩla yĩvo nĩ, “Nĩkĩ tũkũaa na kũkw’a?” Namo maandĩko ala mekĩĩtwe vo nĩ Mwambĩlĩlyo 3:17-19 na Alomi 5:12.

13. Elesya ũndũ mũndũ ũtonya kũtũmĩa tulakiti kwambĩĩa kwĩmanyĩsya Mbivilia vamwe na andũ.

¹³ Tulakiti isu iseũvĩtw’e sya kũtũtetheesya twambĩĩe kwĩmanyĩsya Mbivilia vamwe na andũ. Ĩla mũndũ watũmĩa ũvano wa QR ũla wĩ tulakitinĩ, ũvano ũsu nũmũlikasya Kĩsesenĩ kitũ. Vau Kĩsesenĩ akoona ũvoo ũũmũthangaasya emanyĩsye Mbivilia. O na ĩngĩ tulakiti isu nĩsyonanĩtye mbulosua Ũvoo Mũseo Kuma kwa Ngai! Kĩla tulakiti nĩwetete ĩsomo ĩna yĩla mũndũ waĩle kũsoma nthĩnĩ wa mbulosua ĩsu. Kwa ngelekany’o, tulakiti Nũũ Ũla Ũsumbĩkĩte Nthĩ? yonanĩtye kana mũndũ aĩle kũsoma ĩsomo ya 5 ya mbulosua ĩsu. Nayo tulakiti Nĩ Kyaũ Kĩtonya Kũtuma Mũsyĩ Wĩthĩwa na Ũtanu? yonanĩtye kana mũndũ aĩlĩte kũsoma ĩsomo ya 9. Tulakiti isu iseũvĩtw’e itũtetheesye tũtũmĩae Mbivilia ĩvinda ya mbee ĩla twathokea mwene nyũmba vamwe na ĩla twamũsyokea. O na ĩngĩ, ũu nũtonya kũtuma twambĩĩa kwĩmanyĩsya Mbivilia vamwe na andũ aingĩ. Nĩ ũndũ ũngĩ wĩva tũtonya kwĩka nĩ kana tũtũmĩe Ndeto ya Ngai nesa ĩla tũũtavany’a?

NEENA NA ANDŨ ĨŨLŨ WA ŨNDŨ ŨLA ŨMAKONETYE

14, 15. Ũtonya kũatĩĩa woni wa Vaulo ata kwelekela ũtavany’a?

¹⁴ Vaulo aĩ na mea ma kũelewa kĩla kyaĩ ilĩkonĩ sya andũ “aingĩ” ĩla ũkũtavany’a. (Soma 1 Akolintho 9:19-23.) Nĩkĩ? Nũndũ endaa ‘amone Ayuti, ala me mĩaonĩ, ala mate na mĩao, na aisyona syonze.’ Kĩeleelo kyake kyaĩ kũvikĩa “andũ onthe, nĩ kana kwa nzĩa syonthe [atonye] kũmatangĩĩa amwe.” (Meko 20:21) Tũtonya kũatĩĩa woni wa Vaulo ata ĩla tũkwĩyũmbany’a kũtavya “andũ onthe” ala me kĩsionĩ kitũ ũla w’o?—1 Tim. 2:3, 4.

¹⁵ Kĩla mwei Ũthũkũmi Witũ wa Ũsumbĩ nũneeneaa maũndũ amwe tũtonya kũtũmĩa ĩla tũũtavany’a. No ũtate kũmatũmĩa. Ĩndĩ ethĩwa ve maũndũ angĩ me ilĩkonĩ sya andũ ala me kĩsionĩ kyaku, no ũsũanĩe nzĩa ingĩ ila itonya kũkiita ngoo syoo. Sũanĩa ĩũlũ wa vala wĩkalaa, andũ ala mekalaa vo, na maũndũ ala mamathĩnasya. Ĩtina wa ũu, sũanĩa ĩandĩko yĩla yĩkonanĩtye na mavata moo. Mũsyaĩĩsya ũmwe wa mũthyũlũlũko easya ũũ ĩũlũ wa ũndũ wĩkaa e na mũka nĩ kana matũmĩe Mbivilia ĩla meũtavany’a: “Andũ aingĩ kĩsionĩ kitũ nĩmatwĩtĩkĩlasya tũsome mũsoa o ũmwe ethĩwa twĩneena o kwa ũkuvĩ. Twamina kũkethany’a namo tũvingũĩte Mbivilia sitũ, nĩtũsomaa ĩandĩko.” Kwasũanĩa ngelekany’o ii syĩ tũlungunĩ tũũ tũatĩĩe sya maũndũ amwe monekete me maseo ũtavany’anĩ. Syĩ na maũndũ ma kũneenea, makũlyo, na maandĩko ala ũtonya kũtata kũtũmĩa kĩsionĩ kyaku.

16. Elesya ũndũ ĩandĩko ya Isaia 14:7 yĩtonya kũtũmĩwa ũtavany’anĩ.

¹⁶ Ethĩwa wĩkalaa kĩsionĩ kĩthĩawa na mathĩna ma mũuo, wakomana na mũndũ no ũmũkũlye atĩĩ: “We nĩwonaa ta ve ĩvinda yĩvika kũtangaaswe ũũ: ‘Nthĩ yonthe nĩthũmũĩte, na nĩvindĩtye: nĩmakwatĩtye kwina’? Ũu nĩw’o Mbivilia yaĩtye ĩandĩkonĩ ya Isaia 14:7. O na eka ũu, Mbivilia yĩ na mawatho maingĩ ma Ngai ĩũlũ wa ũndũ kũkethĩwa mũuo ĩvinda yũkĩte.” Ĩtina wa ũu, no ũmũsomee amwe ma mawatho asu Mbivilianĩ.

17. Tũtonya kũtũmĩa ĩandĩko ya Mathayo 4:4 ata ĩla tũũtavany’a?

¹⁷ Aũme aingĩ kĩsionĩ kyenyu nĩmethĩawa na thĩna wa kwĩanĩsya mavata ma andũ ma mĩsyĩ yoo? Ethĩwa ũu nĩw’o vailyĩ, no wambĩĩe ũneeni waku kwa kũkũlya ĩkũlyo yĩĩ: “Yo mũndũũme aĩle kwĩthĩwa aikwata mbesa siana ata nĩ kana mũsyĩ wake wĩthĩwe wĩ na ũtanu?” Amina kũsũngĩa no ũmũtavye ũũ: “Aũme aingĩ makwataa mbesa mbingĩ kwĩ isu ĩndĩ mĩsyĩ yoo ndĩthĩawa na ũtanu. Kwoou, nĩ kyaũ kyendekaa?” Ĩtina wa ũu soma ĩandĩko ya Mathayo 4:4 na ũimũkũlya kana no ende kwĩmanyĩsya Mbivilia.

18. Ũtonya kũtũmĩa ata ĩandĩko ya Yelemia 29:11 nĩ kana ũkiakisye angĩ?

¹⁸ Andũ kĩsionĩ kyenyu nĩmatonya kwĩthĩwa maithĩnĩka nũndũ wa mũisyo ũnamakwatie mĩtũkĩ? Ethĩwa vailyĩ ũu, no wambĩĩe kũneena na mũndũ kwa kũmwĩa atĩĩ: “Nooka vaa kwaku nĩ na kĩeleelo kya kũũkiakisya. (Soma Yelemia 29:11.) We nĩwoona maũndũ elĩ ala Ngai ũtwendeaa? Maũndũ asu nĩ ‘mũuo’ na ‘wĩkwatyo.’ Nĩwoona kana Ngai endaa twĩkale thayũ mũseo? Ĩndĩ ũu ũtonyeka ata?” Ĩtina wa ũu no ũmwony’e ĩsomo yĩla yaĩlĩte nthĩnĩ wa mbulosua Ũvoo Mũseo.

19. Elesya ũndũ ĩandĩko ya Ũvuan’yo 14:6, 7 yĩtonya kũtũmĩwa ĩla mũndũ ũkũneena na andũ mendete ndĩni.

¹⁹ We wĩkalaa kĩsionĩ kĩ andũ mendeeaw’a nĩ ndĩni? Ethĩwa wĩkalaa kĩsionĩ kĩilyĩ ũu, no wambĩĩe kũneena na mũndũ kwa kũmũkũlya atĩĩ: “Mũlaĩka akoka kũneena naku, we no ũmwĩthukĩĩsye? (Soma Ũvuan’yo 14:6, 7.) Nũndũ mũlaĩka ũsu easya ‘kĩai Ngai,’ we tyo wende kũmanya eweta Ngai wĩva? Mũlaĩka ũsu aĩtye kana nĩ ‘ũla wombie ĩtu na nthĩ.’ We awetaa ũũ?” Ĩtina wa ũu no ũsome ĩandĩko ya Savuli 124:8 yĩla yaĩtye: “Ũtethyo witũ wĩ syĩtwanĩ ya Yeova, ũla watw’ĩkĩthisye ĩtu na nthĩ.” Na ĩndĩ, no ũmũtavye kana nĩwĩyũmbanĩtye kũmũelesya ĩũlũ wa Yeova Ngai.

20. (a) Ĩandĩko ya Nthimo 30:4 yĩtonya kũtũmĩwa ata ĩla mũndũ ũkũmanyĩsya ũngĩ ĩũlũ wa ĩsyĩtwa ya Ngai? (b) Ve ĩandĩko we ũtũmĩaa na andũ makendeew’a?

²⁰ No wambĩĩsye kũneena na mũndũ wa mũika kwa kũmũtavya atĩĩ: “No nende kũũsomea ĩandĩko yĩkũlĩtye makũlyo ma vata mũno. (Soma Nthimo 30:4.) Vai mũndũ waaĩka maũndũ ala mawetetwe ĩandĩkonĩ yĩu, kwoou no nginya wĩthĩe yĩneenea Mũmbi witũ.a Tũtonya kũmanya ĩsyĩtwa yake ata? No nĩkwony’e yo Mbivilianĩ.”

TŨMĨA ŨTONYI WA NDETO YA NGAI ĨLA ŨŨTAVANY’A

21, 22. (a) Ĩandĩko ĩnyuve nesa yĩtonya kũvĩndũa thayũ wa mũndũ ata? (b) Ũtw’ĩte kwĩka ata ĩla ũũtavany’a?

²¹ Ndwamba kũmanya ĩtambya yĩla andũ mekwosa ĩla wamasomea ĩandĩko yĩnyuvĩtwe nesa. Kwa ngelekany’o, Ngũsĩ ilĩ nthĩ ya Australia nĩsyavikie kwa mũndũ mũka ũmwe wa mũika na ũmwe wasyo amũkũlya atĩĩ: “We nĩwĩsĩ ĩsyĩtwa ya Ngai?” Ĩtina wa ũu Ngũsĩ ĩsu nĩyamũsomeie ĩandĩko ya Savuli 83:18. Mũndũ mũka ũsu easya atĩĩ: “Naseng’ie mũno.” Aendeee kwasya: “Ĩla [Ngũsĩ isu] syaendie, natwaie ngalĩ maili 35 (kĩlomita 56) nginya ndukanĩ ya mavuku nĩ kana nĩmanye ũndũ Mbivilia ingĩ syaĩtye na ĩndĩ nasisya kana nĩngwona ĩsyĩtwa yĩu mavukunĩ ala maeleasya ndeto syĩ kĩvathũkany’o. Ĩla naminie kwĩthĩwa na mũĩkĩĩo vyũ kana ĩsyĩtwa ya Ngai nĩ Yeova, neekũlilye nĩ maũndũ angĩ meva ndesĩ.” Ĩtina wa kavinda kanini, mũndũ mũka ũsu na mũndũũme ũla wesie kũmũtwaa nĩmambĩĩe kwĩmanyĩsya Mbivilia na mesa kũvatiswa.

²² Ndeto ya Ngai nĩvĩndũaa mĩkalĩle ya andũ ala mamĩsomaa na nĩtumaa andũ methĩwa na mũĩkĩĩo nthĩnĩ wa mawatho ma Yeova. (Soma 1 Athesalonika 2:13.) Mbivilia yĩ ũtonyi na nĩkiitaa ngoo sya andũ kwĩ ndeto o na syĩva ila tũtonya kũtavya mũndũ. Kyu nĩkyo kĩtumi, vatonyeka, twaĩle kũtũmĩa Ndeto ya Ngai ĩla tũũtavany’a, nũndũ yĩ thayũ!