Ũndũ Tũtonya Kwambĩĩsya Ũneenanyʼa na Andũ Tũtũmĩĩte Tulakiti

Kwambĩĩa Mwei wa 1, 2018 ĩthangũ ya mbee ya Kavuku ka Ũmbano wa Mwĩkalĩle wa Aklĩsto yĩthĩĩtwe na kĩlungu kyonanĩtye maũndũ ala tũtonya kũtũmĩa ũtavanyʼanĩ. Nĩtwĩthĩĩtwe tũithangaawʼa twĩthĩwe tũineena na andũ ũtavanyʼanĩ vandũ va kũmanenga mavuku. Vitio ila ineeneaa ũndũ tũtonya kwasya syĩthĩĩtwe iitũmĩwa kũtetheesya atavanyʼa mamanye ũndũ matonya kũtũmĩa Mbivilia yĩ yoka kwambĩĩsya ũneenanyʼa. Ĩndĩ ũu nĩ kwonanyʼa kana tũyaĩle kũtũmĩa mavuku yĩla tũũtavanyʼa nyũmba na nyũmba? Aiee! Kwa ngelekanyʼo, tulakiti nĩ nzeo mũno kwondũ wa kwambĩĩsya ũneenanyʼa. Yĩla ũũtũmĩa tulakiti no ũtũmĩe nzĩa ĩno:

1. Kũlya mũndũ ĩkũlyo yĩla yĩ ĩthangũnĩ ya mbee na ũyeteela anyuve ũsũngĩo ũmwe vau.

2. Mwonyʼe ũsũngĩo kuma ĩandĩkonĩ (kana maandĩkonĩ) ala me mwambĩĩonĩ wa ĩthangũ ya kelĩ. Ethĩwa ve ĩvinda somai na mũineenea ũvoo ũla wĩ vau tulakiti nthĩnĩ.

3. Mũtiĩe tulakiti na ũimwĩkĩa vinya amĩsome yonthe.

4. Ũtanamba kũthi mwonyʼe vala vaandĩkĩtwe “Kwasũanĩa Ĩkũlyo Yĩĩ,” na ũimwĩa kana wasyoka mũkasũngĩa ĩkũlyo yĩu mũtũmĩĩte Mbivilia.

Wasyoka sũngĩa ĩkũlyo yĩu na ũimũtiĩa ĩkũlyo yĩngĩ yĩla mũkaneenea wasyoka ĩngĩ. No ũnyuve ĩkũlyo yĩmwe kuma kĩsesenĩ kitũ kana kuma ĩvukunĩ yĩla yĩwetetwe ĩthangũnĩ ya ĩtina ya tulakiti. Mũthenya o ũsu kana o mũthenya ũngĩ woona vaĩlĩte no ũmũnenge mbulosua Ũvoo Mũseo Kuma kwa Ngai! kana ĩvuku yĩngĩ nthĩnĩ wa Syĩndũ Ila Tũtũmĩaa Mũno Kũmanyĩsya.