Tulakiti Nzaũ Iseũvĩtwʼe kwa Nzĩa ya Kwendeesya
1. Nĩ kyaũ kĩseũvĩtwʼe kwa nzĩa ya kwendeesya kĩnaumiwʼe tũtũmĩe ũtavanyʼanĩ?
1 Tulakiti itano nzaũ nĩsyaumiwʼe Ũmbanonĩ wa Kĩvalo wa 2013, ũla waĩ na kyongo “Ndeto ya Ngai Nĩyo Wʼo!” Tulakiti ĩngĩ, Ũvoo wa Ũsumbĩ Na. 38, ĩla yĩ na kyongo “Mo Andũ Ala Makwie Nĩmatonya Kwĩthĩwa Thayũ Ĩngĩ?” nĩnongelilwe tulakitinĩ isu itano. Tulakiti isu syĩ thanthatũ iseũvĩtwʼe kwa nzĩa ya kwendeesya. Nĩkĩ iseũvĩtwʼe ũu? Ĩla tũũtavanyʼa nyũmba na nyũmba, tũtonya kũitũmĩa nesa ata?
2. Nĩkĩ tulakiti isu iseũvĩtwʼe kwa nzĩa nzaũ?
2 Nĩkĩ Iseũvĩtwʼe Ũu?: Nĩ kana twĩthĩwe atavanyʼa aseo ĩla tũũtavanyʼa nyũmba na nyũmba, no nginya twĩke maũndũ aa ana: (1) Kũlya mwene nyũmba ĩkũlyo ya kũmũtetheesya eeyĩelesye. (2) Mũsomee ĩandĩko. (3) Mũnenge kĩndũ kya kũsoma. (4) Weta ĩkũlyo yĩla mũkasũngĩa ĩla ĩngĩ, na mũivanga ĩla wĩsyoka. Tulakiti ii nzaũ iseũvĩtwʼe itũtetheesye kũatĩĩa maũndũ asu ana.
3. Tũtonya kũnengane tulakiti ii nzaũ ata?
3 Ũndũ Ũtonya Kũitũmĩa: (1) Wamina kũkethya mwene nyũmba, mwonyʼe ĩkũlyo yĩla yĩ vu ĩũlũ na mosũngĩo mayo atatũ, na ĩndĩ ũimũkũlya ũndũ ũtonya kũsũngĩa. (2) Vua tulakiti na mũineenea kongo “Mbivilia Yaĩtye Ata?” Ethĩwa nĩvatonyeka, soma ĩandĩko yĩu Mbivilianĩ. Ethĩwa mwene nyũmba e na mwanya, neeneai kongo kala ke vau ĩtheo konanĩtye ũndũ ũvoo ũsu ũtonya kũmũtethya. (3) Mũnenge tulakiti na ũimwĩa ese kwĩsomea ũvoo ũsu ũngĩ. (4) Ũtanamba kũthi, mwonyʼe ĩkũlyo yĩla yĩ ĩtina wa tulakiti ungu wa kongo “Kwasũanĩa Ĩkũlyo Yĩĩ” na mũivanga ũsyoke mũke kwona ũndũ Mbivilia yaĩtye ĩũlũ wa ũndũ ũsu.
4. Tũtonya kũtũmĩa tulakiti ii nzaũ ata ĩla twasyokea mũndũ?
4 Kũsyokea mũndũ nĩ ũndũ wĩ laisi. Tũmĩa maandĩko ala me ĩtina wa tulakiti nĩ kana ũsũngĩe ĩkũlyo yĩla watiie wamwonyʼa ĩvinda ya mbee. Ũtanamba kũthi, mwonyʼe visa wa mbulosua Ũvoo Mũseo ũla wĩ tulakitinĩ ĩsu. Mwonyʼe mbulosuanĩ ĩsu ĩsomo yĩla yĩneenee mũnango ũndũ ũla mwaneenea, na ĩndĩ ũimũnenga mbulosua. Eetĩkĩla kwosa mbulosua, vangai ĩla ũkasyoka mũneenee ĩsomo yĩu. Weeka ũu, ũkeethĩwa wakwata mũmanyĩwʼa wa Mbivilia. Kana vandũ va kũmũnenga mbulosua, no ũmũnenge tulakiti ĩngĩ na mũivanga mũke kũmĩneenea wasyoka ĩngĩ.
5. Tulakiti syĩthĩawa na ũtethyo mwaũ wĩanĩ wa kũtavanyʼa?
5 Kwa ĩvinda ya myaka mbee wa 130, twĩthĩĩtwe tũitũmĩa tulakiti ũtavanyʼanĩ. O na kau iyĩthĩawa iseũvĩtwʼe ũndũ ũmwe, nitethetye andũ aingĩ mũno. Ekai tũtũmĩe tulakiti ii nzaũ iseũvĩtwʼe kwa nzĩa ya kwendeesya tũtetheesye andũ makwate ũmanyi wa Mbivilia.—Nth. 15:7a.