We Nĩwĩkaa Ũndũ Ngai Wendete?

“Ũndũ o na wĩva ũla wenda ndavasyae na ngakwĩkaa w’o.” Ti laisi kũtavya mũndũ ũtamwĩsĩ kana mũndũ mwĩsene o vanini ndeto isu. Ĩndĩ ndwamba kũemwa nĩ kwĩa mũnyanyau ũu. Andũ me ndũũ nĩmendaa kũtethany’a ĩla ve vata.

Mbivilia yonanasya kana Yeova nĩwĩkaa maũndũ ala matumaa athaithi make methĩwa me atanu. Kwa ngelekany’o, Mũsumbĩ Ndaviti, ũla waĩ na ngwatanĩo ndũmu vamwe na Ngai, aisye ũũ: “Nĩ maingĩ mũno mawĩa maku ma ũseng’ya ala ũtethetye, we Yeova Ngai wakwa, na mosũanĩo maku ala melekele ithyĩ . . . Nĩ maingĩ ũndũ matatonya kũtalĩka.” (Savuli 40:5) O na eka ũu, Yeova nĩwĩkaa ala matamwĩsĩ maũndũ maseo, ‘aimausũĩsya lĩu na ũtanu ngoonĩ syoo.’—Meko ma Atũmwa 14:17.

Nũndũ Yeova nũtanĩaa kwĩka maũndũ ala matonya kũtanĩthya andũ, nĩ ũndũ wosanĩte na kĩlĩko kũsũanĩa kana anyanyae ma Ngai maĩlĩte kwĩka maũndũ ala matonya ‘kũtanĩthya ngoo’ yake. (Nthimo 27:11) Ĩndĩ ũtonya kwĩka ata nĩ kana ũmwendeesye Ngai? Mbivilia ĩsũngĩĩte ũũ: “Mũikolwe nĩ kwĩka nesa na kũolanĩla: nũndũ Ngai nĩwendeeaw’a nĩ nthembo ta isu.” (Aevelania 13:16) Yo ũu nĩ kwonany’a kana kwĩka ũla ũseo na kũĩsanĩa na ala angĩ nokw’o kwendekaa nĩ kana tũmwendeesye Yeova?

Mbivilia yaĩtye ũũ: “Vate mũĩkĩĩo kũitonyeka kũmwendeesya.” (Aevelania 11:6) O na ĩngĩ Mbivilia yaĩtye kana “Avalaamu nĩwamũĩkĩĩie Ngai” na ĩtina wa ũu “ambĩĩa kwĩtwa mũnyanyae wa Ngai.” (Yakovo 2:23, The Holy Bible in Current Kikamba Language) O nake Yesũ Klĩsto oonanisye kana nĩ ũndũ wa vata ‘kũmũĩkĩĩa Ngai’ nĩ kana tũtanĩe moathimo kuma kwake. (Yoana 14:1) Kwoou ũtonya kwĩka ata nĩ kana wĩthĩwe na mũĩkĩĩo ũla Ngai wendaa anyanyae methĩwe naw’o? No wambĩĩe kwa kwĩmanyĩsya Ndeto ya Ngai, Mbivilia, ũteũtĩĩa. Weeka ũu ũkakwata “ũmanyi wa kwenda kwake” na ũimanya ũndũ ũtonya “kũmwendeesya vyũ.” Na ĩndĩ o ũndũ ũkũendeea kũkwata ũmanyi wa w’o ĩũlũ wa Yeova na kũtũmĩa maũndũ ala ũkwĩmanyĩsya ĩũlũ wa mĩao yake mĩlũngalu, now’o mũĩkĩĩo waku ũkongelekaa na now’o ũkakũthengeea mũnango.—Akolosai 1:9, 10.