“Ũla wĩ na Itho Ĩlau Akaathimwa”

KUMA tene kumya nthembo kwĩthĩĩtwe kwĩ kwa vata ũthaithinĩ wa wʼo. Aisilaeli maumasya nthembo sya nyamũ, namo Aklĩsto mesĩkĩe nesa na “nthembo ya ndaĩa.” Ĩndĩ ve o nthembo ingĩ imũtanĩthasya Ngai mũno. (Aevl. 13:15, 16) Ngai nũtũathimaa na tũkekala twĩ atanu ĩla twaumya nthembo ta isu. Kwasũanĩa ngelekanyʼo ii iatĩĩe.

Aana aĩ mũthũkũmi mũĩkĩĩku wa Ngai na nĩwendaa mũno kũkwata kavĩsĩ, ĩndĩ ndaĩ atonya kũsyaa. Na kwoou nĩwamũvoyie Yeova amwĩa kana amũtetheesya asyae kavĩsĩ, ‘akakanengane kwa Yeova mĩthenya yonthe ya thayũ wako.’ (1 Sam. 1:10, 11) Aana nĩwesie kũitava na asyaa kavĩsĩ waketie Samueli. Aaĩsya Samueli nĩwamũtwaie ĩeemanĩ ya kũmbanĩa nĩ kana eanĩsye wĩvĩto wake. Yeova nĩwaathimie Aana nũndũ wa ũlau wake. Nĩwesie kũsyaa syana ingĩ itano na mwana wake, Samueli, nĩwatwʼĩkie mwathani na ũmwe wa ala maandĩkie Mbivilia.—1 Sam. 2:21.

O ta Aana na Samueli, ũmũnthĩ Aklĩsto me na mwanya wa kwĩyumya vyũ mamũthũkũme Mũmbi woo. Yesũ nĩwathanie kana kyonthe kĩla tweeyĩima nĩ kana tũmũthaithe Yeova kĩkaathimwa mũno.—Mko. 10:28-30.

Ĩvindanĩ ya atũmwa, kwaĩ mũndũ mũka Mũklĩsto weetawa Ndolokasi weeyĩimaa maũndũ nĩ kana atetheesye ala angĩ. Eesĩkĩe nesa na “meko maseo ala wekaa vamwe na kumya motethyo.” Ĩndĩ ũndũ wa kũmakya nĩ kana avikie vandũ “akwatwa nĩ ũwau, na akwʼa,” na kĩu nĩkyatumie kĩkundi kĩmeta mũno. Ĩla amanyĩwʼa mamanyie kana Vetelo e kĩsionĩ, nĩmamũkũlilye oke na ndakekale. Kwasũanĩa mũyo ũla meewie Vetelo avika na athayũũkya Ndolokasi! Ndolokasi nĩwe wa mbee kũwetwa Mbivilianĩ aithayũũkwʼa nĩ mũtũmwa. (Meko 9:36-41) Ngai ndoolĩtwe nĩ maũndũ ala Ndolokasi weekĩte. (Aevl. 6:10) O na maũndũ ala weekie nĩmaandĩkiwe Ndetonĩ ya Ngai nĩ kana matũtetheesye kwĩyĩelekanyʼa nake.

O nake mũtũmwa Vaulo aĩ ngelekanyʼo nzeo mũno nũndũ nĩwatũmĩaa ĩvinda yake kũtetheesya angĩ na kũmethukĩĩsya. Aandĩkĩie ana-a-asa ala maĩ Kolintho amea atĩĩ: “Nyie nganengane na ũtanu mwingĩ na kwĩnengane vyũ kwondũ wenyu.” (2 Ako. 12:15) Vaulo nĩweeyoneie kana kwĩyumya ũtethye angĩ nĩkũtumaa wĩkala wĩ mwĩanĩe, ĩndĩ ũndũ ũla wa vata nĩ kana kũtumaa Yeova akũathima na aikwenda mũno.—Meko 20:24, 35.

Kwoou no twasye tũte na nzika kana Yeova nũtanaa ĩla twatũmĩa ĩvinda yitũ na vinya witũ nĩ kana tũtetheesye ana-a-asa na tũitetheesya wĩanĩ wa Ũsumbĩ. Ĩndĩ vo ve ũndũ ũngĩ tũtonya kwĩka tũkakwata kwʼoko wĩa wa kũtavanyʼa ĩũlũ wa Ũsumbĩ? Ĩĩ! O na kau nĩtũmũtaĩaa Ngai twatũmĩa ĩvinda yitũ na vinya witũ, o nayo mĩvothi ĩla tumasya nĩmũtaĩaa. Mĩvothi ĩsu nĩtumaa wĩa wa nthĩ yonthe wa kũtavanyʼa ũsonga na mbee. Kwa ngelekanyʼo, nĩtũmĩawa kũtetheesya amisonalĩ na athũkũmi ala angĩ ma ĩvinda yonthe ma mwanya. Na eka ũu, mĩvothi ĩla tumasya nĩyo ĩtetheeasya wĩanĩ wa kũseũvya na kũalyũla mavuku na vitio, nĩyo ĩtetheeasya ĩvinda ya mĩisyo, na ĩla kũkwakwa Nyũmba sya Ũsumbĩ. Nĩtwĩkalei twĩsĩ kana “ũla wĩ na itho ĩlau akaathimwa.” Ũndũ ũngĩ nĩ kana ĩla twanenga Yeova syĩndũ sitũ ila sya vata nĩtũtumaa ataĩwa.—Nth. 3:9; 22:9.

Ũndũ Amwe Maumasya Mĩvothi Kwondũ Wa Wĩa Wa Nthĩ Yonthe

O tondũ kwailyĩ ĩvindanĩ ya mũtũmwa Vaulo, ũmũnthĩ aingĩ ‘nĩmaiaa’ kĩndũ kana makavangĩĩa mbesa siana ũndũ mũna na maisyĩkĩa ĩsandũkũnĩ ya kĩkundi yĩla yĩandĩkĩtwe, “Wĩa wa Nthĩ Yonthe.” (1 Ako. 16:2) Kĩla mwei, ikundi nitũmaa mbesa isu ovisinĩ wa Ngũsĩ sya Yeova ũla ũũngamĩe wĩa kĩsionĩ kyasyo. O na no ũtũme mĩvothi yaku mwene ovisinĩ wa ũvonge wa Ngũsĩ sya Yeova, ũla ũũngamĩe nthĩ ĩla wĩkalaa. Ethĩwa nũkwenda kũmanya vala waĩle kũtũma mĩvothi ĩsu, neena na ovisi wa ũvonge. No ũkwate namba sya ovisi wa ũvonge nthĩnĩ wa www.jw.org. Mĩvothi ĩla ũtonya kũtũma ĩmwe kwa ĩmwe nĩyonanĩtwʼe vaa ĩtheo. Ĩndĩ sũanĩa ĩla ĩkwosana na vala wĩkalaa.

MĨVOTHI ĨLA YUMAWʼA VATE MŨVANGO WA KŨTŨNGĨWA

Ĩĩ nĩ mĩvothi ĩla mũndũ ũtonya kũnengane atũmĩĩte vengi kana kaati sya vengi. Movisinĩ amwe ma ũvonge andũ nĩmaumasya mĩvothi ĩsu kwĩsĩla kĩsese kya jw.org kana kĩsese kĩngĩ kĩla kĩtĩkĩlĩtwʼe.
Mĩvothi ya mbesa na syĩndũ ingĩ ta mbete, mbangili, kana syĩndũ ingĩ sya thooa mũnene. Andĩka valũa ũeleetye kana waumya mĩvothi ĩsu ũte na mũvango wa kũtũngĩwa ĩngĩ.

MĨVOTHI ĨTONYA KŨTŨNGĨWA ŨLA UMĨTYE

Ĩĩ nĩ mĩvothi ya mbesa ĩtonya kũtũngĩwa ũla waumya ethĩwa nũkwenda.
Andĩka valũa ũeleetye kana no ũtũngĩwe mĩvothi ĩsu wamyenda.

NZĨA INGĨ SYA KUMYA MĨVOTHI

O vamwe na kumya mĩthĩnzĩo ya mbesa na syĩndũ ingĩ sya thooa mũnene, ve nzĩa ingĩ ũtonya kũtũmĩa nĩ kana ũtetheesye wĩa wa Ũsumbĩ nthĩ yonthe. Nzĩa isu nĩsyonanĩtwʼe vaa ĩtheo. Ũtanamba kũtwʼa nĩ nzĩa yĩva katĩ wa isu ũkwenda kũtũmĩa kumya mĩvothi, neena na ovisi wa ũvonge ũla ũũngamĩe kĩsio kyenyu nĩ kana ũmanye nĩ nzĩa syĩva itũmĩawa nthĩ yenyu. Nũndũ kĩla nthĩ yĩ mĩao yĩ kĩvathũkanyʼo na nzĩa syĩ kĩvathũkanyʼo sya kumya koti, nũseo ũkamba kũneena na andũ ala me na ũtũĩka ĩũlũ wa mĩao na ĩũlũ wa kumya koti ũtambĩte kũnyuva nzĩa ĩla ũũtũmĩa kumya mĩvothi.

Inisualenzi (insurance) na Mĩvango ya Litaya: Ii nĩ mbesa ila mũndũ ũĩvawa alitaya, ila wiĩte akaondinĩ etũmĩa alitaya, venzeni (pension), kana sya inisualenzi ila mũndũ ũandĩkaa onanĩtye ikanengwa ovisi wa ũvonge wa Ngũsĩ sya Yeova ĩtina wa kũlitaya kana kũkwʼa.

Mbesa syĩ Akaondinĩ (bank accounts): Ii nĩ mbesa syĩ akaondinĩ ila mũndũ ũtonya kũandĩkĩthya syĩnengwa ovisi wa ũvonge wa Ngũsĩ sya Yeova kwosana na mĩao ya vengi sya kwoo.

Nyũmba Kana Kĩtheka: Ĩĩ nĩ mĩvothi ĩla mũndũ ũtonya kũnenga ovisi wa ũvonge wa Ngũsĩ sya Yeova. Yaĩle kwĩthĩwa ne nyũmba kana kĩtheka kĩtonya kũthoowʼa. No avange kumya ate na mũvango wa kũtũngĩwa ĩngĩ, kana ethĩwa nĩ nyũmba ya kwĩkala, no aandĩke onanĩtye kana akwʼa, ĩkeethĩwa yĩ ya ovisi wa ũvonge wa Ngũsĩ sya Yeova.

Wĩlũ (wills and trusts): Malĩ kana mbesa nitonya kũandĩkĩthwʼa syĩnengwa ovisi wa ũvonge wa Ngũsĩ sya Yeova. Mũndũ no eke ũu kwa kũandĩka valũa wosanĩte na mĩao wonanĩtye kana ovisi wa ũvonge nĩwʼo ũkatiĩwa malĩ ĩtina wa kũkwʼa. Mũvango ũũ no ũolange koti ũla mũndũ waĩle kũĩva.

Nĩ kana mũndũ aumye mĩvothi atũmĩĩte nzĩa isu, nĩ ũndũ wa vata akavangĩĩa tene kĩla ũkaumya. Nĩ kana andũ mamanye ũndũ matonya kumya mĩvothi matũmĩĩte nzĩa ta isu, mbulosua yĩtawa Charitable Planning to Benefit Kingdom Service Worldwide nĩyumĩtwʼe kwa kĩthyomo kya Kĩsũngũ na kya Spanish. Kĩeleelo kyayo nĩ kwonyʼa andũ nzĩa syĩ kĩvathũkanyʼo ila matonya kumya mĩthĩnzĩo kana makonanyʼa ũndũ syĩndũ syoo syĩtũmĩwa makwʼa. Ũvoo ũla wĩ mbulosuanĩ ĩsu no wĩthĩwe ũtatonya kũtũmĩwa vyũ nthĩ ĩla wĩkalaa nũndũ kĩla nthĩ yĩthĩawa na mĩao yayo ya kumya koti kana mĩao ĩngĩ. Andũ aingĩ nĩmatũmĩĩte nzĩa ila syonanĩtwʼe mbulosuanĩ ĩsu kũtetheesya ũthaithi witũ, wĩa wa kũtavanyʼa, na wa kumya ũtethyo ĩla kweethĩwa na mĩisyo, o na kũtũmĩa nzĩa isu nĩkũtumaa maolangwa koti. Ethĩwa nthĩ ĩla wĩkalaa yĩ na mbulosua ĩsu na nũkwenda kũmĩsoma, kũlya mũandĩki wa kĩkundi kyenyu aũnenge.

Nĩ kana ũkwate ũvoo mwingangĩ, neena na ovisi wa ũvonge, kana ũthi kĩsesenĩ kya jw.org/kam, na watheea vaaya nthĩ, tina vala vaandĩkĩtwe “Umya Mũvothi Kwondũ wa Wĩa Witũ wa Kũtavanyʼa.”