“Wĩa Nĩ Mũnene”

ĨVINDA yĩmwe kwaĩ ũmbano wa vata mũno Yelusaleme. Mũsumbĩ Ndaviti oombanĩte na anene me mbee ũsumbĩnĩ, anene ma nyũmba ya ũsumbĩ, na ngũmbaũ syonthe. Onthe nĩmatanie mũno ĩla meewie Ndaviti aimatangaasĩa ũndũ wa mwanya mũno. Amatavisye kana Yeova nĩwanengete mwana wake, Solomoni, wĩa wa kwaka ĩkalũ ĩnene mũno kwondũ wa ũthaithi wa ũla Ngai wa wʼo. Mũsumbĩ ũsu wa Isilaeli, ũla ĩvindanĩ yĩu waĩ mũkũũ, nĩwaveveewe amanya ũndũ ĩkalũ yĩu yaĩle kwakwa, na ĩndĩ amũtavya mwana wake, Solomoni. Ndaviti eeie andũ asu woombanĩte namo atĩĩ: “Wĩa nĩ mũnene; nũndũ ĩ nyũmba nene mbanakavye ti kwondũ wa mũndũ, ĩndĩ kwondũ wa Yeova Ngai.”—1 Mav. 28:1, 2, 6, 11, 12; 29:1.

Ĩtina wa ũu Ndaviti amakũlilye: “Nũũ ĩndĩ ũla ũnũkwĩnengane na ngoo ya kwenda evathanʼye ũmũnthĩ ethĩwe mũtheu kwa Yeova [kana “amũnenge Yeova mũthĩnzĩo,” NWT]?” (1 Mav. 29:5) Keka waĩ vo we wĩthĩwa weekie ata? We nĩwĩthĩwa weeyumisye na ngoo ya kwenda ũkwate kwʼoko wĩa ũsu ũnenevete ũu? Aisilaeli nĩmeeyumisye matetheesye o na mateũtindĩa. O na eka ũu, “matanie, nũndũ nĩmanenganie na kwenda kwa ngoo, nũndũ nĩmamumĩsye Yeova makyenda na ngoo mbĩanĩu.”—1 Mav. 29:9.

Myaka mingĩ ĩtina wa vau, Yeova nĩwambĩĩisye mũvango ũngĩ mũseango o na kwĩ ĩkalũ yĩu. Nĩwaseũvisye ĩkalũ ĩnene ya kĩ-veva, nayo nĩ mũvango ũla wĩkĩte kwĩsĩla nthembo ĩla Yesũ waumisye nĩ kana andũ matonye kũmũthaitha. (Aevl. 9:11, 12) Yeova aendeee kũtetheesya andũ ata mewʼanĩthwʼe nake? Amatetheeasya kwĩsĩla wĩa witũ wa kũtwʼĩkĩthya andũ amanyĩwʼa. (Mt. 28:19, 20) Nũndũ wa wĩa ũsu, kĩla mwaka andũ milioni mbingĩ nĩmatwʼĩkĩthawʼa amanyĩwʼa, na ngili mbingĩ sya asu nĩmavatisawa. O na ĩngĩ kĩla mwaka ikundi maana maingĩ nĩsyambĩĩawʼa.

Nũndũ wa wongeleku ũsu, nĩvethĩĩtwe vata wa kũtumbĩthya mavuku maingangĩ maeleetye Mbivilia, vata wa kwaka na kũtũngĩĩa Nyũmba mbingangĩ sya Ũsumbĩ, na vata wa kũmantha kũndũ kwingangĩ kwa kwĩkĩa maũmbano manene. We nũkwĩtĩkĩla kana wĩa witũ wa kũtavanyʼa ũvoo mũseo nĩ mũnene na wĩ na mosyao maseo?—Mt. 24:14.

Kũmwenda Ngai na mũtũi na kũmanya kana wĩa wa kũtavanyʼa nĩwaĩle kũtethwʼa na mĩtũkĩ nĩkũtumaa andũ ma Ngai ‘menengane na ngoo ya kwenda’ nĩ kana mamũnenge mũthĩnzĩo wa mĩvothi yoo. Nĩtũtanaa mũno nũndũ wa ‘kũmũtaĩa Yeova na syĩndũ sitũ.’ O na nĩtũtanaa kwona ũndũ mĩvothi ĩsu twaumya ĩtũmĩawa nesa nĩ kana ĩtetheesye wĩanĩ ũsu mũnene waatethwʼa nĩ andũ!—Nth. 3:9.

Ũndũ Amwe Maumasya Mĩvothi Kwondũ Wa Wĩa Wa Nthĩ Yonthe

Ũmũnthĩ Aklĩsto aingĩ ‘nĩmaiaa’ kĩndũ kana makavangĩĩa mbesa siana ũndũ mũna na maisyĩkĩa ĩsandũkũnĩ ya kĩkundi yĩla yĩandĩkĩtwe, “Wĩa wa Nthĩ Yonthe.” (1 Ako. 16:2) Kĩla mwei, ikundi nitũmaa mbesa isu ovisinĩ wasyo wa ũvonge. O na no ũtũme mĩvothi yaku mwene ovisinĩ wa ũvonge wa Ngũsĩ sya Yeova, ũla ũũngamĩe nthĩ yenyu. Ethĩwa nũkwenda kũmanya vala waĩle kũtũma mĩvothi ĩsu, neena na ovisi wa ũvonge. No ũkwate namba sya ovisi wa ũvonge nthĩnĩ wa www.jw.org. Mĩvothi ĩla ũtonya kũtũma ĩmwe kwa ĩmwe nĩ:

MĨVOTHI ĨLA YUMAWʼA VATE MŨVANGO WA KŨTŨNGĨWA

Ĩĩ nĩ mĩvothi ĩla mũndũ ũtonya kumya atũmĩĩte kaati sya vengi kana atũmĩĩte simũ. Movisinĩ amwe ma ũvonge andũ nĩmaumasya mĩvothi ĩsu kwĩsĩla kĩsese kya jw.org kana kĩsese kĩngĩ kĩla kĩtĩkĩlĩtwʼe.
Mĩvothi ya mbesa na syĩndũ ingĩ ta mbete, mbangili, kana syĩndũ ingĩ sya thooa mũnene. Andĩka valũa ũeleetye kana waumya mĩvothi ĩsu ũte na mũvango wa kũtũngĩwa ĩngĩ.

MĨVOTHI ĨTONYA KŨTŨNGĨWA ŨLA UMĨTYE

Ĩĩ nĩ mĩvothi ya mbesa ĩtonya kũtũngĩwa ũla waumya ethĩwa nũkwenda.
Andĩka valũa ũeleetye kana no ũtũngĩwe mĩvothi ĩsu wamyenda.

NZĨA INGĨ SYA KUMYA MĨVOTHI

O vamwe na kumya mĩthĩnzĩo ya mbesa na syĩndũ ingĩ sya thooa mũnene, ve nzĩa ingĩ ũtonya kũtũmĩa nĩ kana ũtetheesye wĩa wa Ũsumbĩ nthĩ yonthe. Nzĩa isu nĩsyonanĩtwʼe vaa ĩtheo. Ũtanamba kũtwʼa nĩ nzĩa yĩva katĩ wa isu ũkwenda kũtũmĩa kumya mĩvothi, neena na ovisi wenyu wa ũvonge nĩ kana ũmanye nĩ nzĩa syĩva itũmĩawa nthĩ yenyu. Nũndũ kĩla nthĩ yĩ mĩao yĩ kĩvathũkanyʼo na nzĩa syĩ kĩvathũkanyʼo sya kumya koti, nũseo ũkamba kũneena na andũ ala me na ũtũĩka ĩũlũ wa mĩao na ĩũlũ wa kumya koti ũtambĩte kũnyuva nzĩa ĩla ũũtũmĩa kumya mĩvothi.

Inisualenzi (insurance): Ii nĩ mbesa sya litaya, venzeni (pension), kana sya inisualenzi ila mũndũ ũandĩkaa onanĩtye ikanengwa ovisi wa ũvonge wa Ngũsĩ sya Yeova ĩtina wa kũlitaya kana kũkwʼa.

Mbesa syĩ Akaondinĩ (bank accounts): Ii nĩ mbesa syĩ akaondinĩ ila mũndũ ũtonya kũandĩkĩthya syĩnengwa ovisi wa ũvonge wa Ngũsĩ sya Yeova kwosana na mĩao ya vengi sya kwoo.

Nyũmba Kana Kĩtheka: Ĩĩ nĩ mĩvothi ĩla mũndũ ũtonya kũnenga ovisi wa ũvonge wa Ngũsĩ sya Yeova. Yaĩle kwĩthĩwa ne nyũmba kana kĩtheka kĩtonya kũthoowʼa. No avange kumya ate na mũvango wa kũtũngĩwa ĩngĩ, kana ethĩwa nĩ nyũmba ya kwĩkala, no aandĩke onanĩtye kana akwʼa, ĩkeethĩwa yĩ ya ovisi wa ũvonge wa Ngũsĩ sya Yeova.

Wĩlũ (wills and trusts): Malĩ kana mbesa nitonya kũandĩkĩthwʼa syĩnengwa ovisi wa ũvonge wa Ngũsĩ sya Yeova. Mũndũ no eke ũu kwa kũandĩka valũa wosanĩte na mĩao wonanĩtye kana ovisi wa ũvonge nĩwʼo ũkatiĩwa malĩ ĩtina wa kũkwʼa. Mũvango ũũ no ũolange koti ũla mũndũ waĩle kũĩva.

Nĩ kana mũndũ aumye mĩvothi atũmĩĩte nzĩa isu, nĩ ũndũ wa vata akavangĩĩa tene kĩla ũkaumya. Nĩ kana andũ mamanye ũndũ matonya kumya mĩvothi matũmĩĩte nzĩa ta isu, mbulosua yĩtawa Charitable Planning to Benefit Kingdom Service Worldwide nĩyumĩtwʼe. Mbulosua ĩsu ĩkwatĩkanaa kwa kĩthyomo kya Kĩsũngũ na kya Spanish, na kĩeleelo kyayo nĩ kwonyʼa andũ nzĩa syĩ kĩvathũkanyʼo ila matonya kumya mĩthĩnzĩo kana makonanyʼa ũndũ syĩndũ syoo syĩtũmĩwa makwʼa. Ũvoo ũla wĩ mbulosuanĩ ĩsu no wĩthĩwe ũtatonya kũtũmĩwa vyũ nthĩ yenyu nũndũ kĩla nthĩ yĩthĩawa na mĩao yayo ya kumya koti kana mĩao ĩngĩ. Andũ aingĩ nĩmatũmĩĩte nzĩa ila syonanĩtwʼe mbulosuanĩ ĩsu kũtetheesya ũthaithi witũ, wĩa wa kũtavanyʼa, na wa kumya ũtethyo ĩla kweethĩwa na mĩisyo, o na kũtũmĩa nzĩa isu nĩkũtumaa maolangwa koti. Ethĩwa nthĩ yenyu yĩ na mbulosua ĩsu na nũkwenda kũmĩsoma, kũlya mũandĩki wa kĩkundi kyenyu aũnenge.

Nĩ kana ũkwate ũvoo mwingangĩ, neena na ovisi wenyu wa ũvonge, kana ũthi kĩsesenĩ kya jw.org/kam, na wakĩvingũa oou vaaya nthĩ vinyĩĩa vala vaandĩkĩtwe “Umya Mũvothi Kwondũ wa Wĩa Witũ wa Kũtavanyʼa.”