MOSŨNGĨO MA MAKŨLYO MA MBIVILIA
Nĩ maũndũ maũ tweteele kwona ĩvindanĩ yĩla yũkĩte?
Kĩkw’ũ kya Yesũ kĩtonya kũtuma ata kwĩthĩwa na andũ mendanĩte?
Vate nzika andũ meendeea kwĩka maendeeo maũndũnĩ ma saenzi. Ĩndĩ yo ve ũndũ andũ mesa kwĩka makekalany’a nesa na kũsũvĩana ene kwa ene? Aiee. Ũmũnthĩ andũ aingĩ methĩawa matongoew’e nĩ ĩtomo na kwĩyenda. Ĩndĩ Ngai e na mĩvango mĩseo ya ĩvinda yũkĩte kwondũ wa andũ.—Soma 2 Vetelo 3:13.
Ndeto ya Ngai nĩeleetye ĩũlũ wa ĩvinda yũkĩte yĩla andũ onthe makethĩwa mendanĩte. Andũ makekala mate na wia na vai mũndũ ũkatuma makĩa.—Soma Mika 4:3, 4.
Nĩ kyaũ kĩkatuma andũ maeka kwĩyenda?
Ngai ndoombĩte mũndũ e na mwĩkalĩle mũthũku wa kwĩyenda. Ĩndĩ ĩla mũndũ wa mbee watwie kũlea kũmwĩw’a Ngai, nĩweethĩiwe na naĩ. Twaumisye mwĩkalĩle ũsu mũthũku wa kwĩyenda kuma kwa Atamu. Ĩndĩ Ngai akatũmĩa Yesũ kũvetangĩa andũ naĩ.—Soma Alomi 7:21, 24, 25.
Kwosana na kwenda kwa Ngai, Yesũ nĩwaumisye nthembo kwĩsĩla kĩkw’ũ kyake na aveta maũndũ mathũku ala maetiwe nĩ kũlea kwĩw’a kwa Atamu. (Alomi 5:19) Kwoou kwĩsĩla kĩkw’ũ kya Yesũ andũ me na wĩkwatyo mũseo wa ĩvinda yũkĩte wa kũthaw’a kuma mwĩkalĩlenĩ mũthũku wa kwĩyenda kũla kũtumaa andũ meka maũndũ mathũku.—Soma Savuli 37:9-11.