Nue Ũkenyuvĩa Ũndũ Ĩvinda Yaku Yũkĩte Yĩkethĩwa Yĩilyĩ!

NO ŨNYUVE ŨNDŨ ĨVINDA YAKU YŨKĨTE YĨKETHĨWA YĨILYĨ? Andũ amwe maĩkĩĩaa kana mũndũ ndatonya kwĩnyuvĩa ũndũ ĩvinda yake yũkĩte yĩkethĩwa yĩilyĩ, nũndũ andũ mekaa kũvangĩĩwa maũndũ. Ĩla maema kwĩanĩsya mĩvango ĩmwe meĩ nayo, maasya kana meĩvangĩĩwe ũu.

Andũ angĩ nĩmatũlĩkaa ngoo moona matatonya kwĩvathana na maũndũ ala me nthĩ ĩno twĩkalaa ĩte ũsili wa katĩ. Nĩmatonya kwĩthĩwa matataa ũndũ matonya mekale nesa ĩndĩ maikwatwa nĩ maũndũ ta kaũ, ũngʼendu, mĩisyo, mowau, na ũu ũyananga mĩvango yoo. Kĩu kĩtumaa mekũlya, ‘Ve na vata mwaũ wa kũthĩnĩka ĩũlũ wa ĩvinda yũkĩte?’

Nĩ wʼo kana maũndũ ala matũkwataa kĩla mũthenya no mavĩndũe mĩvango yitũ vyũ. (Mũtavanʼya 9:11) Ĩndĩ, nue waĩle kwĩnyuvĩa kwĩkala tene na tene ĩvinda yũkĩte. Vate nzika, Mbivilia yonanĩtye kana nue waĩle kwĩnyuvĩa ũndũ ĩvinda yaku yũkĩte yĩkethĩwa yĩilyĩ. Kwasisya ũndũ yaĩtye.

Mose, ũla watongoesye mbaĩ ya Isilaeli, atavisye andũ makilyĩ kũvika Nthĩ ya Watho ndeto ii: “Nĩniĩte mbee waku thayũ na kĩkwʼũ, ũathimo na kĩumo: kwondũ wa ũu nyuva thayũ, nĩ kana wĩkale thayũ, we na ũsyao waku; na kũmwenda Yeova Ngai waku, na kwĩthukĩĩsya wasya wake, na kũlũmanʼya nake.”—Kũtũngĩlĩlwa Kwa Mĩao 30:15, 19, 20.

Ngai nĩwoovoisye Aisilaeli kuma ũkombonĩ Misili na amanenga wĩkwatyo wa kwĩkala Nthĩ ya Watho me atanu na me na mũuo. Ĩndĩ mayesaa kũkwata maũndũ asu oou matekĩte ũndũ. Nĩ kana makwate moathimo asu maaĩle ‘kũnyuva thayũ.’ Mesaa kwĩka ũu ata? ‘Kwa kũmwenda Ngai, kwĩthukĩĩsya wasya wake, na kũlũmanyʼa nake.’

O naitũ ũmũnthĩ twĩ na ũtwi ta ũsu twaĩle kwĩka, na ũtwi ũla tũkwĩka nĩwʼo ũkwonanyʼa ũndũ ĩvinda yitũ yũkĩte yĩkethĩwa yĩilyĩ. Twanyuva kũmwenda Ngai, kwĩthukĩĩsya wasya wake, na kũlũmanyʼa nake, tũkeethĩwa tũinyuva thayũ ũtathela nthĩnĩ wa nthĩ nzaũ. Ĩndĩ maũndũ asu monanasya ata na tũtonya kũmeanĩsya ata?

NYUVA KŨMWENDA NGAI

Ndaĩa ĩla nene ya Ngai nĩ wendo. Mũtũmwa Yoana aveveeiwe aandĩka atĩĩ: “Ngai nĩ wendo.” (1 Yoana 4:8) Nĩkyo kĩtumi ĩla Yesũ wakũlilwʼe mwĩao ũla mũnene nĩ wĩva, wasũngĩie atĩĩ: “Mwende Mwĩaĩi Ngai waku na ngoo yaku yonthe, na thayũ waku wʼonthe, na kĩlĩko kyaku kyonthe.” (Mathayo 22:37) Mũsingi wa ngwatanĩo ya wʼo na Yeova Ngai waĩle kwĩthĩwa ne wendo na ti wia kana wĩwi ũtaumĩte ngoonĩ. Ĩndĩ, nĩkĩ twaĩle kũnyuva kũmwenda Ngai?

Wendo wa Yeova kwa andũ no ũndũ ũmwe na wendo wa mũsyai kwa syana. O na kau asyai ti eanĩu na me na naĩ, nũndũ wa wendo nĩmataaa syana syoo, makasyĩkĩa vinya, makaitetheesya, na makaikanyʼa nũndũ meenda syĩthĩwe na ũtanu na iiendeea nesa. Asyai mendaa kyaũ kuma kwa syana syoo nũndũ wa maũndũ asu? Mendaa syana syoo imende na iyĩkĩa ngoonĩ kĩla asyai moo maimanyĩĩtye nĩ kana itetheke. Ti ũndũ wosanĩte na kĩlĩko kana Ĩthe witũ wa ĩtunĩ endaa tũtũnge mũvea kwondũ wa maũndũ onthe ala ũtwĩkĩte?

ĨTHUKĨĨSYE WASYA WAKE

Nthĩnĩ wa kĩthyomo kya mbee kĩla Mbivilia yaandĩkiwe nakyo, mavinda maingĩ ndeto “kwĩthukĩĩsya” yonanasya “kwĩwʼa.” Ũu nĩ wʼo twonanasya ĩla twatavya kana, “Ĩthukĩĩsye asyai maku.” O ta ũu kwĩthukĩĩsya wasya wa Ngai kwonanasya kwĩmanyĩsya na kwĩwʼa kĩla waneena. Nũndũ tũitonya kwĩwʼa wasya wa Ngai o tondũ twĩwʼaa wasya wa mũndũ, tũmwĩthukĩĩasya kwa kũsoma na kũtũmĩa kĩla kĩ Ndetonĩ yake, Mbivilia.—1 Yoana 5:3.

Nĩ kana Yesũ onanyʼe vata wa kwĩthukĩĩsya wasya wa Ngai, ĩvinda yĩmwe aisye atĩĩ: “Mũndũ ndekalaa thayũ kwondũ wa kĩmũtũ kyoka, ĩndĩ kwondũ wa kĩla ndeto yumaa kanywʼanĩ wa Ngai.” (Mathayo 4:4) O na kau lĩu nĩ wa vata mwĩĩnĩ kwitũ, kwĩthĩwa na ũmanyi wa Ngai nĩ kwʼo kwa vata vyũ. Nĩkĩ? Mũsumbĩ Solomoni aisye atĩĩ: “Ũĩ nĩ ũsũvĩo, o tondũ mbesa nĩ ũsũvĩo; ĩndĩ ũseo mũnene wa ũmanyi nĩ, atĩ ũĩ nũsũvĩaa thayũ wa ũla wĩ nawʼo.” (Mũtavanʼya 7:12) Ũmanyi na ũĩ kuma kwa Ngai no ũtũsũvĩe ũmũnthĩ na ũkatũtetheesya tũkeka motwi ma ũĩ ala matonya kũtuma tũkwata thayũ ũtathela ĩvinda yũkĩte.

LŨMANYʼA NAKE

Kwalilikana ngelekanyʼo ya Yesũ ĩla twaneenea kĩlungunĩ kĩla kyathela, vala waisye atĩĩ: “Mbingĩlo nĩ ntheke, na nzĩa nĩ nziĩĩe, ĩla ĩelete thayũnĩ, nao nĩ avũthũ ala mamyonaa.” (Mathayo 7:13, 14) Nĩ kana twĩthĩwe tũtonya kwĩsĩla nzĩanĩ ya mũthemba ũsu, nũseo tũkekala vakuvĩ na mũndũ ũtonya ũtũtongoesya nĩ kana tũvike vala tũendete, navo nĩ kũkwata thayũ ũtathela. Kwoou, twĩ na kĩtumi kĩseo kya kwĩkala vakuvĩ na Ngai. (Savuli 16:8) Ĩndĩ tũtonya kwĩka ũu ata?

Kĩla mũthenya, ve maũndũ maingĩ wĩthĩaa no nginya wĩke na angĩ maingĩ mũno wĩthĩawa ũyenda kwĩka. Maũndũ asu no maingĩve mũno na makaũvĩngĩĩsa ũkethĩa ndwĩ na ĩvinda yĩtoetye ya kũsũanĩa kĩla Ngai ũkwenda twĩke. Nĩkyo kĩtumi Mbivilia ĩtũlilikanasya atĩĩ: “Ĩsũvĩei ĩndĩ nesa ũndũ mũendaa, ti ta ala mate na ũĩ, ĩndĩ ta ala oĩ; mũkĩtangĩĩa ĩvinda, nĩkwĩthĩwa mĩthenya nĩ myathe.” (Aeveso 5:15, 16) Twĩkalaa vakuvĩ na Ngai kwa kwona ngwatanĩo yitũ vamwe nake ne wʼo ũndũ ũla wa vata vyũ thayũnĩ witũ.—Mathayo 6:33.

NUE WAĨLE KWĨNYUVĨA

O na kau vai ũndũ ũtonya kwĩka ũkavĩndũa maũndũ ma ĩvinda ĩvĩtu, ve maũndũ ũtonya kwĩka nĩ kana we vamwe na endwa maku mwĩthĩwe na ĩvinda yũkĩte ĩseo. Mbivilia yonanasya kana Ĩthe witũ wa ĩtunĩ, Yeova Ngai, nũtwendete mũno na nĩwendaa tũmanye kĩla wendaa twĩke. Kwasisya ndeto sya mwathani Mika:

“Nake nũkwonetye ũndũ ũseo, we mũndũ; na ũndũ ũla Yeova ũnũkũandũa kwaku nĩ mwaũ, ate o kwĩkaa ũlũngalu, na kwendaa ũseo, na kũendanasya na Ngai waku?”—Mika 6:8.

We nũkwĩtĩkĩla kũthokwʼa nĩ Yeova mũendanasye na ũikwata moathimo ma tene na tene ala ũkanenga ala maendanasya nake? Nue waĩle kwĩnyuvĩa!