Yĩla Mathĩna Matuma Wenda Kwĩyĩtũka

Kwa ngelekanyʼo, mũndũ mũka wĩtawa Sallya kuma Amelika, nĩwaaisye syĩndũ mbingĩ yĩla kweethĩiwe na kĩuutani kĩnene mũno. Aĩtye atĩĩ: “Maũndũ ala mangwatie matumie nĩwʼa nde na vinya wa kũendeea kũmĩanĩsya na mathĩna. Mĩthenya mingĩ nĩneewʼaa ta nĩvikie mũthya na kwoou ndyenda kwĩyĩtũka.”

Thĩna ũngĩ ũtonya kũkwata mũndũ nĩ kũkwʼĩĩwa nĩ mũndũ wendete. Mũndũ mũka wĩtawa Janice, kuma Australia, easya: “Yĩla imwana syakwa ilĩ syakwie, maũndũ makwa mavalaanile vyũ nginya weethĩa no mũvaka nĩtate ũndũ ndonya nĩwʼe kavaa. Namwĩsũvie Ngai namwĩa-ĩ: ‘Mwa, ndyĩsa kũmĩĩsya mbee wa vau! Eka ngome ndakokĩla ĩngĩ.’”

Nake Daniel nĩweewie woo mũno yĩla kĩveti kyake kyeethĩiwe kĩte kĩĩkĩĩku. Aĩtye atĩĩ: “Yĩla kĩveti kyakwa kyandavisye kana kĩthĩĩtwe kĩte kĩĩkĩĩku, neewie naũmĩa mũno ngoonĩ weethĩa nĩĩwʼa ta natonywa na kavyũ ngoonĩ. Woo ũsu wekalile myei kauta ũyĩsa kũthela.”

Ĩkaseti yĩĩ ya Mũsyaĩĩsya nĩyonanĩtye kana nĩvatonyeka mũndũ akatanĩa kwĩkala thayũ o na yĩla

• Kweethĩwa na mĩisyo mĩthũku vyũ

• Mũndũ twendete wakwʼa

• Ũla ũtwaanĩte nake weethĩwa ate mũĩkĩĩku

• Wawaa ũwau mũthũku

• Ũkwĩwʼa ũyenda kwĩyĩtũka

Ekai yu twambe kwona ũndũ tũtonya kwĩka yĩla twakwatwa nĩ mĩisyo mĩthũku vyũ.